ബോളിവുഡ് നടന്‍ ആമിര്‍ഖാന്റെ അസഹിഷ്ണുതാ പരാമര്‍ശത്തെ വിമര്‍ശിച്ച പ്രതിരോധ മന്ത്രി മനോഹര്‍ പരീക്കറിന് ബി.ജെ.പി എം.പി സുബ്രഹ്മണ്യന്‍ സ്വാമിയുടെ പിന്തുണ. പരീക്കറിന്റെ പരാമര്‍ശത്തില്‍ ഇത്രയും ബഹളം എന്തിനാണ്?. ആമിറിന് ജന്മഭൂമിയെ സ്‌നേഹിക്കാന്‍ കഴിയുന്നില്ലെങ്കില്‍ അദ്ദേഹത്തിന് ഒരു അധ്യാപകന്റെ ആവശ്യമുണ്ടെന്നും സുബ്രഹ്മണ്യന്‍ സ്വാമി ട്വീറ്റ് ചെയ്തു. 

പരീക്കറിന്റെ പരാമര്‍ശത്തെ എതിര്‍ത്ത് പ്രതിപക്ഷ പാര്‍ട്ടികള്‍ രംഗത്തെത്തിയതോടെയാണ് പിന്തുണയുമായി സ്വാമി രംഗത്തെത്തിയത്. ആമിറിനെ പരീക്കര്‍ രാജ്യദ്രോഹിയെന്ന് വിളിച്ചത് ശരിയായില്ല. രാജ്യത്തെയല്ല ആമിര്‍ വിമര്‍ശിച്ചത്. മറിച്ച്, ഭരണസംവിധാനം പരാജയപ്പെട്ട സര്‍ക്കാറിനെയാണെന്നും എന്‍.സി.പി നേതാവ് മാജിദ് മേനോന്‍ പറഞ്ഞു. 

കഴിഞ്ഞദിവസം ഒരു പുസ്തക പ്രകാശന ചടങ്ങിലാണ് ആമിറിന്റെ പേര് പരാമര്‍ശിക്കാതെ പരീക്കര്‍ വിമര്‍ശിച്ചത്. തന്റെ ഭാര്യക്ക് രാജ്യം വിടണമെന്ന് ആഗ്രഹമുണ്ടെന്ന് മുമ്പ് ഒരു നടന്‍ പറഞ്ഞിരുന്നു. അഹങ്കാരം നിറഞ്ഞ പ്രസ്താവനയാണിത്. രാജ്യത്തെ കുറിച്ച് ഇത്തരമൊരു പ്രസ്താവന നടത്തുന്നവരെ ഒരു പാഠം പഠിപ്പിക്കുകയാണ് വേണ്ടത് എന്നാണ് പരീക്കര്‍ പറഞ്ഞത്. 

എന്നാല്‍ പരീക്കറിന്റെ പ്രസ്താവനയെ വിമര്‍ശിച്ച് കോണ്‍ഗ്രസ് രംഗത്തെത്തിയിരുന്നു. ആക്രമണങ്ങളില്‍ നിന്നും ജനങ്ങളെ സംരക്ഷിക്കുന്നതിന് പകരം സ്വന്തം ജനങ്ങളെ ഭീഷണിപ്പെടുത്താനാണ് പരീക്കര്‍ ശ്രമിക്കുന്നതെന്ന് കോണ്‍ഗ്രസ് നേതാവ് രണ്‍ദീപ് സിങ് സുര്‍ജേവാല ട്വീറ്റ് ചെയ്തു. 

കഴിഞ്ഞവര്‍ഷം നവംബറിലാണ് അസഹിഷ്ണുതയെത്തുടര്‍ന്നുള്ള അക്രമസംഭവങ്ങള്‍ രാജ്യത്തു നിരന്തരം അരങ്ങേറുന്നതിനാല്‍ ഇനി രാജ്യംവിട്ടുപോകേണ്ടി വരുമോയെന്ന ആശങ്ക ഭാര്യ കിരണ്‍ ആമിറിനോട് പങ്കുവെച്ചുവെന്ന് പറഞ്ഞത്.