ജയലളിതയുടെ സഹോദരപുത്രി ദീപ ജയകുമാറിനെ കാണാനില്ലെന്ന് റിപ്പോര്‍ട്ട്. ജയലളിതയെ ഓര്‍മ്മിപ്പിക്കുന്ന ശാരീരിക സാമ്യതകളുള്ള ദീപയെ കാണാനില്ലെന്ന് സഹോദരി അമൃതയെ ഉദ്ധരിച്ച് പുറത്തുവിട്ടിരിക്കുന്നത് ഒരു ബംഗളൂരു പത്രമാണ്. തിങ്കളാഴ്ച താന്‍ ചെന്നൈയിലേക്ക് പോയെങ്കിലും ദീപയെ എങ്ങും കണ്ടെത്താനായില്ലെന്നുമാണ് അമൃത പറയുന്നത്.

ജയലളിതയുടെ സംസ്‌ക്കാര ചടങ്ങുകള്‍ മുതല്‍ വെളിച്ചത്തേക്ക് വന്ന ദീപയുടെ വീട് പൂട്ടിയിട്ട നിലയിലാണ്. വേലക്കാരിയെയും അവിടെയെങ്ങും കാണാനില്ല. തിങ്കളാഴ്ച മുതല്‍ താന്‍ ദീപയെ ഫോണില്‍ വിളിക്കുകയാണ് കിട്ടുന്നില്ല. ശശികലയ്ക്ക് എതിരേ രൂക്ഷ വിമര്‍ശനം നടത്തിയ സാഹചര്യത്തില്‍ തനിക്ക് ഭീതിയുണ്ടെന്നും ജയലളിതയുടെ സഹോദരിയുടെ മകള്‍ കൂടിയായ അമൃത പറഞ്ഞു.

ജയലളിതയുടെ മരണത്തിന് പിന്നാലെ ജയയുടെ ഏറ്റവും അടുത്ത ആളായി പരിഗണിക്കുന്ന ശശികലയ്ക്കും എഐഎഡിഎംകെയിലെ അവരുടെ അടുത്ത പാര്‍ട്ടി നേതാക്കള്‍ക്കുമെതിരേ നേരത്തേ ദീപ ശക്തമായി പ്രതികരിച്ചിരുന്നു.
ജയയുടെ സഹോദരി ഷൈലജയുടെ മകളായ അമൃത ബംഗലുരുവിലാണ് താമസിക്കുന്നത്. ശശികലയും അനുയായികളും തങ്ങളുടെ മാതൃസഹോദരിയുടെ സ്വത്തും അധികാരവും തട്ടിയെടുത്തെന്നും അമൃതയും ആരോപിച്ചു. ആശുപത്രിയില്‍ കഴിയുന്ന കാലം മുതല്‍ ജയലളിതയെ കാണാന്‍ ശ്രമിച്ചെങ്കിലും നടന്നില്ല. ശശികലയ്‌ക്കെതിരേ ആരോപണം ഉന്നയിച്ചതിന് പിന്നാലെ ഈ പ്രശ്‌നം മുമ്‌ബോട്ട് കൊണ്ടുപോകാനും ഇക്കാര്യം ചെന്നൈയിലെ വീട്ടില്‍ ദീപയുമായി ചര്‍ച്ച ചെയ്യാനും തീരുമാനിച്ചിരുന്നതായും അമൃത പറഞ്ഞു.

ജയലളിതയ്ക്ക് എന്താണ് അസുഖമെന്നോ എന്തു തരം ചികിത്സയാണ് നടത്തിയിരുന്നതെന്നോ അറിയില്ല. ഹൃദയസ്തംഭനം എന്ന് മാത്രമാണ് കേട്ടത്. കോണ്‍ഗ്രസ് നേതാവ് രാഹുല്‍ ഗാന്ധിക്ക് പോലും ജയലളിതയെ കാണാന്‍ അനുമതി കിട്ടിയില്ല. ശശികലയുടെ ഉരുക്കുമുഷ്ടി തനിക്കും നേരിടേണ്ടി വന്നു. ആശുപത്രിയുടെ ഗേറ്റില്‍ വെച്ചു തന്നെ പോലീസ് തടഞ്ഞെന്നും അമൃത പറയുന്നു. 1996 നും 98 നും ഇടയില്‍ മൂന്ന് തവണ മാത്രമാണ് ജയലളിതയെ പോയസ് ഗാര്‍ഡനില്‍ ചെന്ന് കാണാന്‍ അനുമതി ലഭിച്ചത്. ശശികല പോയ ശേഷം ബന്ധുക്കളെ സെക്രട്ടറിയേറ്റിലാണ് കണ്ടിരുന്നതെന്നും പറഞ്ഞു. 2015 ലായിരുന്നു ജയലളിതയുടെ സഹോദരിയും അമൃതയുടെ മാതാവുമായ ഷൈലജ മരിച്ചത്. വിവരം മാധ്യമങ്ങളെ അറിയിക്കരുതെന്ന് അന്ന് ജയലളിത ആവശ്യപ്പെട്ടിരുന്നു.

ജയലളിതയുടെ സഹോദരന്‍ ജയകുമാറിന്റെ പുത്രിയാണ് ദീപ. ജയലളിതയുടെ അന്ത്യകര്‍മ്മ ചടങ്ങുകള്‍ക്ക് എത്തിയ ദീപ അനേകരുടെ ശ്രദ്ധ കവര്‍ന്നിരുന്നു. അന്ത്യകര്‍മ്മങ്ങള്‍ക്ക് ചുറ്റും കൂടിയ ആരാധകരുടെ ഇടയിലൂടെ കടന്നു പോകുമ്പോള്‍ ചില സ്ത്രീകള്‍ ദീപയെ കാണാന്‍ തങ്ങളുടെ അമ്മയെ പോലെ ഉണ്ടെന്ന് പറയുകയും സ്‌നേഹം പ്രകടിപ്പിക്കുകയും ചെയ്തിരുന്നു. തുടര്‍ന്ന് പോലീസ് ഇടപെട്ട് ദീപയെ സ്ഥലത്തു നിന്നും പുറത്തേക്ക് കൊണ്ടുപോകുകയായിരുന്നു.