അഗസ്റ്റ വെസ്റ്റ്‌ലന്‍ഡ് ഹെലികോപ്ടര്‍ ഇടപാടുമായി ബന്ധപ്പെട്ട് ഇന്ത്യയിലെ ഒരു രാഷ്ട്രീയ കുടുംബത്തിന് 114 കോടി രൂപ കൈക്കൂലി നല്‍കിയതായി വെളിപ്പെടുത്തല്‍. ഇടനിലക്കാരന്റെ സ്വകാര്യ ഡയറിയില്‍ നിന്നുള്ള വിവരങ്ങള്‍ ദേശീയമാധ്യമമായ ഇന്ത്യാ ടുഡേ പുറത്തു വിട്ടു. ഇന്ത്യയിലെ ഒരു രാഷ്ട്രീയ കുടുംബത്തിന് 16 മില്യണ്‍ യൂറോ കൈക്കൂലിയായി നല്‍കി എന്നതാണ് ഇടപാടിലെ ഇടനിലക്കാരനായി നിന്ന ക്രിസ്റ്റ്യന്‍ മിഷലിന്റെ ഡയറിയിലെ പ്രധാനവിവരം.

ക്രിസ്റ്റിയന്‍ മിഷേലിന്റെ സ്വകാര്യഡയറി, ഇമെയിലുകള്‍ എന്നിവയില്‍ നിന്നുള്ള വിവരങ്ങളാണ് ഇന്ത്യ ടുഡേ പുറത്തു വിട്ടിരിക്കുന്നത്. മൊത്തം 450 കോടിയോളം രൂപ വിവിധ രാഷ്ട്രീയനേതാക്കള്‍ക്കായി നല്‍കിയെന്നും ഡയറിയില്‍ പറയുന്നുണ്ട്.

2010ലാണ് അഗസ്റ്റ വെസ്റ്റ്‌ലന്‍ഡ് എന്ന കമ്ബനിയില്‍ നിന്നും 12 എ.ഡെബ്ല്യൂ 101 ഹെലികോപ്ടറുകള്‍ വാങ്ങുന്നതിനുള്ള കരാറില്‍ അന്നത്തെ യുപിഎ സര്‍ക്കാര്‍ ഒപ്പിട്ടത്. രാഷ്ട്രപതി, പ്രധാനമന്ത്രി തുടങ്ങിയ വിവിഐപികള്‍ക്ക് സഞ്ചരിക്കാനുള്ള അത്യാധുനിക ഹെലികോപ്ടറുകളായിരുന്നു ഇത്. പിന്നീട് അഴിമതി ആരോപണമുയര്‍ന്നതിനെ തുടര്‍ന്ന് 2013ല്‍ സര്‍ക്കാര്‍ ഈ കരാര്‍ റദ്ദാക്കി. യുപിഎ ഭരണകാലത്ത് നടന്ന ഈ വിവിഐപി ഇടപാടില്‍ നേരത്തെ വ്യോമസേന മേധാവി എസ്പി ത്യാഗിയെ സിബിഐ അറസ്റ്റ് ചെയ്തിരുന്നു.

ഇറ്റാലിയന്‍ പോലീസ് പിടിച്ചെടുത്ത് പിന്നീട് സിബിഐക്ക് കൈമാറിയ ക്രിസ്റ്റ്യന്‍ മിഷേലിന്റെ സ്വകാര്യരേഖകളില്‍ അഗസ്റ്റ വെസ്റ്റ്‌ലന്‍ഡിന്റെ മാതൃസ്ഥാപനമായ ഫിന്‍മെക്കാനിക്ക കമ്ബനി 52 മില്യണ്‍ ഡോളറാണ് അന്നത്തെ സര്‍ക്കാരില്‍ നിര്‍ണായക സ്വാധീനമുള്ള ചിലര്‍ക്ക് നല്‍കാനായി മാറ്റിവച്ചതെന്ന് പറയുന്നുണ്ട്.

ഹെലികോപ്ടര്‍ കരാര്‍ യാഥാര്‍ത്ഥ്യമാക്കുന്നതിന് വേണ്ടിയാണ് ഫിന്‍മെക്കാനിക്ക കമ്ബനി ക്രിസ്റ്റ്യന്‍ മിഷേല്ലിനെ ഇടനിലക്കാരനായി നിയമിക്കുന്നത്. പിന്നീടങ്ങോട്ട് ഈ കരാര്‍ യഥാര്‍ഥ്യമാക്കാനായി നടത്തിയ ശ്രമങ്ങളെക്കുറിച്ച് മിഷല്‍ അപ്പപ്പോള്‍ ബ്രീട്ടീഷ് കമ്ബനിയെ അറിയിച്ചിരുന്നു. ഫാക്‌സിലൂടേയും ഇമെയിലിലൂടേയുമാണ് ഈ വിവരങ്ങള്‍ മിഷേന്‍ കമ്ബനിയെ അറിയിച്ചത്.