ഏറെ വിവാദങ്ങള്‍ക്ക് ശേഷം പത്മാവതി സിനിമയ്ക്ക് ഉപാദികളോടെ പ്രദര്‍ശിപ്പിക്കാന്‍ അനുമതി നല്‍കി. ചിത്രത്തിന്റെ പേര് പദ്മാവത് എന്നാക്കണമെന്നാണ് പ്രധാന നിര്‍ദ്ദേശം. ഉപാധികള്‍ നിര്‍മാതാക്കളെ അറിയിച്ചു. അവര്‍ അംഗീകരിച്ചാല്‍ യു/എ സര്‍ട്ടിഫിക്കറ്റ് നല്‍കും. 26 കട്ടുകളാണ് സെന്‍സര്‍ ബോര്‍ഡ് പറഞ്ഞിരിക്കുന്നത്. ഇത് നിര്‍മാതാക്കള്‍ അംഗീകരിക്കുമോ എന്നറിയില്ല. ചിത്രത്തിന്റെ തുടക്കത്തിലും ഇടവേളയിലും സിനിമയ്ക്ക് ചരിത്രവുമായി ബന്ധമില്ലെന്ന് എഴുതിക്കാണിക്കണമെന്നും നിര്‍ദ്ദേശമുണ്ട്. ജനുവരി ഒന്നിന് വിദഗ്ധസമിതി വീണ്ടും ചേരും. അന്ന് നിര്‍മാതാക്കളെയും സംവിധായകനെയും ക്ഷണിച്ചിട്ടുണ്ട്. അവരുടെ കൂടി അഭിപ്രായം ആരാഞ്ഞ ശേഷമായിരിക്കും അന്തിമതീരുമാനം എടുക്കുക.

ചരിത്രത്തെ വളച്ചൊടിക്കുന്നെന്ന് ആരോപിച്ച്, ഗുജറാത്ത്, ഹിമാചല്‍ തെരഞ്ഞെടുപ്പുകളുടെ പശ്ചാത്തലത്തിലാണ് സിനിമയുടെ റിലീസിംഗ് തടഞ്ഞത്. രജപുത്ര് രാഞ്ജിയായ പത്മാവതിയും അലാവുദ്ദീന്‍ ഖില്‍ജിയും തമ്മിലുള്ള പ്രണയം സിനിമയിലുണ്ടെന്നും സംവിധായകന്‍ സഞ്ജയ്‌ലീലാ ബെന്‍സാലി ചരിത്രത്തെ വളച്ചൊടിക്കുന്നെന്നും കാട്ടി തീവ്രഹിന്ദു സംഘടനയായ കര്‍ണസേന രംഗത്തെത്തിയിരുന്നു. സിനിമയുടെ ഷൂട്ടിംഗ് ഉള്‍പ്പെട തടസപ്പെടുത്തിയ ഇവര്‍, പത്മാവതിയായി അഭിനയിച്ച ദീപികാപദുക്കോണിന്റെ മൂക്ക് ചെത്തുമെന്ന് ഭീഷണിപ്പെടുത്തിയിരുന്നു. വിവദങ്ങള്‍ ആളിക്കത്തിയതോടെ നിര്‍മാതാക്കള്‍ ഡിസംബര്‍ ഒന്നിന് നടത്താനിരുന്ന റിലീസ് മാറ്റിവെച്ചു. ചിത്രംകണ്ട് വിലയിരുത്താന്‍ കേന്ദ്രവാര്‍ത്താ വിതരണ പ്രക്ഷേപണ മന്ത്രാലയം ആറംഗ വിദഗ്ധസമിതിയെ നിയമിച്ചു. ഇവര്‍ ഡിസംബര്‍ 28ന് ചിത്രം കണ്ടു. അതിന് ശേഷമാണ് സെന്‍സര്‍ ബോര്‍ഡ് പുതിയ നിര്‍ദ്ദേശം മുന്നോട്ട് വച്ചത്. 

രാജസ്ഥാനിലെ രജപുത്ര രാഞ്ജിയായിരുന്നു പദ്മാവതി. പത്മാവതിയോട് പ്രണയം തോന്നിയ അലാവുദ്ദീന്‍ഖില്‍ജി കൊട്ടാരം ആക്രമിച്ച് അവളെ സ്വന്തമാക്കാന്‍ ശ്രമിച്ചെങ്കിലും അവര്‍ ആത്മഹത്യ ചെയ്യുകയായിരുന്നെന്നാണ് പറയപ്പെടുന്നത്. ഇത് സിനിമയില്‍ വളച്ചൊടിച്ചെന്ന് ആരോപിച്ചാണ് രാജ്യത്തുടനീളം വിവാദം കത്തിപ്പടര്‍ന്നത്. യു.പി മുഖ്യമന്ത്രി യോഗി ആദിത്യനാഥ് ഉള്‍പ്പെടെയുള്ളവര്‍ സിനിമയ്‌ക്കെതിരെ രംഗത്തെത്തിയിരുന്നു. സിനിമയ്ക്ക് യു.പിയില്‍ അനുമതി നല്‍കില്ലെന്നായിരുന്നു പ്രസ്താവന. ഇതോടെ കോടതി ഇടപെട്ട് ഇവരെ വിലക്കി. സിനിമ കാണുംമുമ്പ് ഇത്തരത്തിലുള്ള അഭിപ്രായപ്രകടനങ്ങള്‍ മുഖ്യമന്ത്രി പദവിയിലിരിക്കുന്നയാള്‍ നടത്തരുതെന്നും കോടതി നിര്‍ദ്ദേശിച്ചിരുന്നു. മുമ്പ് ഉഠ്താ പഞ്ചാബ് എന്ന സിനിമയ്ക്ക് സെന്‍സര്‍ ബോര്‍ഡ് 83 കട്ട് നിര്‍ദ്ദേശിച്ചിരുന്നു. അതിനെതിരെ അണിയറപ്രവര്‍ത്തകര്‍ കോടതിയെ സമീപിച്ച് അനുകൂല വിധി നേടിയെടുത്തിരുന്നു.