കേന്ദ്ര സര്‍ക്കാരിന്റെ വികലമായ മെഡിക്കല്‍ നയത്തിനെതിരെ ഐ എം എ യുടെ നേതൃത്വത്തില്‍ നാളെ രാജ്യവ്യാപകമായി ഡോക്ടര്‍മാര്‍ പണിമുടക്കും. സംസ്ഥാനത്ത് നാളെ രാവിലെ ആറ് മുതല്‍ വൈകിട്ട് ആറ് വരെ മുഴുവന്‍ ആശുപത്രികളിലേയും ഡോക്ടര്‍മാര്‍ പണിമുടക്കുമെന്ന് ഐ.എം എ സംസ്ഥാന പ്രസിഡന്റ് ഡോ.ഇ കെ ഉമ്മറും, സെക്രട്ടറി ഡോ.എന്‍.സുള്‍ഫിയും വാര്‍ത്താകുറിപ്പില്‍ അറിയിച്ചു. സാധാരണ നിലയില്‍ നാളെ ഒ.പിയും മറ്റ് സേവനങ്ങളും ഉണ്ടാകില്ല. എന്നാല്‍ അത്യാഹിത വിഭാഗത്തില്‍ അവശ്യ സേവനം ഉറപ്പാക്കും. പണിമുടക്കുന്ന ഡോക്ടര്‍മാര്‍ രാവിലെ 11 മണിക്ക് രാജ്ഭവന്‍ മാര്‍ച്ചും നടത്തും. ഇവരോടൊപ്പം രാജ്യവ്യാപകമായി മെഡിക്കല്‍ വിദ്യാര്‍ത്ഥികളും പണിമുടക്കും. ഇതിനോടകം തന്നെ സംസ്ഥാനത്ത് മെഡിക്കല്‍ വിദ്യാര്‍ത്ഥികള്‍ രാജ്ഭവന് മുന്നില്‍ അനിശ്ചിതകാല നിരാഹാര സമരം ആരംഭിച്ചു കഴിഞ്ഞു.

പണിമുടക്കിലേക്ക് തള്ളിവിട്ട സാഹചര്യങ്ങള്‍

1 ആധുനിക വൈദ്യശാസ്ത്രം പ്രാക്ടീസ് ചെയ്യാനുള്ള അധികാരം ആയുഷിന് ചെറിയ കോഴ്‌സിലൂടെ നല്‍കാനുള്ള നീക്കം വ്യാപകമായ വ്യാജ വൈദ്യത്തിന് ഇടയാക്കും.ഇത് പൊതുജനാരോഗ്യത്തെ വന്‍ ആപത്തിലേക്ക് നയിക്കും

2. എം ബി ബി എസ് ബിരുദം നേടിയ ഡോക്ടര്‍മാര്‍ വീണ്ടും പ്രാക്ടീസ് ചെയ്യാനുള്ള അനുവാദം ലഭിക്കാന്‍ ലൈസന്‍സ് പരീക്ഷ കൊണ്ടുവരാനുള്ള നീക്കം ഡോക്ടര്‍മാരുടെ ക്ലിനിക്കല്‍ വൈദഗ്ദ്യം കുറക്കുമെന്നല്ലാതെ എന്‍ട്രന്‍സ് മാഫിയയെ സഹായിക്കാനുള്ള നീക്കമാണ്.

3. സ്വകാര്യ മെഡിക്കല്‍ കോളേജുകളിലെ 60 മുതല്‍ 100 ശതമാനം വരെ സീറ്റില്‍ ഫീസ് നിയന്ത്രണം എടുത്ത് കളയുന്നത് കാരണം മെഡിക്കല്‍ വിദ്യാഭാസം സാധാരണക്കാര്‍ക്ക് ചിലവേറിയതാകും

4. മെഡിക്കല്‍ കോളേജ് അനുവദിക്കുന്നതിലും, പരിശോധിക്കുന്നതിലും വ്യാപകമായ
അഴിമതി ഉണ്ടാക്കാവുന്ന നിയമങ്ങളാണ് നാഷണല്‍ മെഡിക്കല്‍ കമ്മീഷന്‍ (എന്‍.എം.സി) ബില്ലില്‍ ഉള്ളത്.

5. ജനാധിപത്യ പരമായുള്ള മെഡിക്കല്‍ കൗണ്‍സിലിന് പകരം കേന്ദ്ര സര്‍ക്കാര്‍ നോമിനേറ്റ് ചെയ്യുന്ന ' നാഷണല്‍ മെഡിക്കല്‍ കമ്മീഷന്‍ (എന്‍.എം.സി) ജനാധിപത്യ സ്വഭാവവും സംസ്ഥാനങ്ങള്‍ക്കുള്ള പ്രതിനിധ്യവും ഇല്ലാതാക്കും.