സൂപ്പര്‍സ്റ്റാര്‍ രജനീകാന്തിന്റെ രാഷ്ട്രീയ പ്രവേശനത്തിന് പിന്നാലെ അദ്ദേഹത്തിന്റെ പുതിയ വെബ്‌സൈറ്റായ രജനിമണ്ട്രത്തില്‍ മൂന്ന് ലക്ഷത്തിലധികം പേര്‍ രജിസ്റ്റര്‍ ചെയ്തു. പത്ത്‌ലക്ഷത്തിലധികം സന്ദര്‍ശകരാണുള്ളത്. ഇത് ദിവസവും കൂടിക്കൂടി വരുന്നു. രാഷ്ട്രീയ പ്രവേശനത്തോട് അനുബന്ധിച്ചാണ് പുതിയ വെബ്‌സൈറ്റ് ആരംഭിച്ചത്. തമിഴ്‌നാട്ടില്‍ നിലവിലുള്ള ഫാന്‍സ് ക്ലബുകള്‍ കൂടാതെ രജിസ്റ്റര്‍ ചെയ്യാത്ത അന്‍പതിനായിരത്തിലധികം ഫാന്‍സ് ക്ലബുകളുണ്ട്. അവരെയെല്ലാം ഒരുകുടക്കീഴില്‍ കൊണ്ടുവരുന്നതിന്റെ ഭാഗമായാണ് വെബ്‌സൈറ്റ് രൂപീകരിച്ചത്. ആന്‍ഡ്രോയിഡ് ഫോണില്‍ വെബിന്റെ ആപ്പ് ഡൗണ്‍ലോഡ് ചെയ്ത് ഉപയോഗിക്കാനുമാകും. 

രജിസ്റ്റര്‍ ചെയ്യാത്ത ഫാന്‍ ക്ലബുകളും അതുപോലെ ആയിരക്കണക്കിന് ആരാധകരുമാണ് തനിക്കുള്ളതെന്നും അവരെയെല്ലാം തന്റെ രാഷ്ട്രീയ ഉദ്യമത്തിലേക്ക് കൊണ്ടുവരുകയാണ് രജനിമണ്ട്രം കൊണ്ട് ഉദ്ദേശിക്കുന്നതെന്ന് രജനീകാന്ത് പുറത്ത് വിട്ട വീഡിയോയില്‍ പറയുന്നു. എല്ലാത്തരത്തിലുള്ള ആളുകളെയും ഒരു പ്ലാറ്റ്‌ഫോമില്‍ കൊണ്ടുവന്ന് തമിഴ്‌നാട്ടില്‍ സദ്ഭരണം കാഴ്ചവയ്ക്കുകയാണ് ലക്ഷ്യമെന്നും താരം വ്യക്തമാക്കി. 67ാം വയസിലാണ് താരം രാഷ്ട്രീയ പ്രവേശനം നടത്തുന്നത്. അതേസമയം രജനീകാന്തിനെതിരെ ചില സംഘടനകളും വ്യക്തികളും രംഗത്ത് എത്തിയിട്ടുണ്ട്. തമിഴ്‌നാട്ടുകാരനല്ലാത്തയാള്‍ രാഷ്ട്രീയത്തിലിറങ്ങണ്ട എന്നാണിവരുടെ വാദം. 

മുന്‍ തമിഴ്‌നാട് മുഖ്യമന്ത്രി എം.ജി.ആര്‍ മലയാളിയാണ്. ജയലളിത കര്‍ണാടക സ്വദേശിയും. ഇരുവരും സിനിമയിലൂടെയാണ് ജനഹൃദയങ്ങളെ കീഴടക്കിയത്. എം.ജി.ആര്‍ കോണ്‍ഗ്രസിലൂടെയാണ് രാഷ്ട്രീയത്തിലെത്തിയത്. 1953ല്‍ അദ്ദേഹം ദ്രാവിഡ മുന്നേറ്റ കഴകവുമായി സഹകരിച്ചു. 1972ല്‍ കരുണാനിധിയുമായി അഭിപ്രായവ്യത്യാസം ഉണ്ടായതിനെ തുടര്‍ന്ന് അണ്ണാഡി.എം.കെ രൂപീകരിച്ചു. 1977ല്‍ മുഖ്യമന്ത്രിയായി. തന്റെ രാഷ്ട്രീയനിലപാടുകള്‍ വ്യക്തമാക്കാന്‍ അദ്ദേഹം സിനിമകളെ ഉപയോഗിച്ചിരുന്നു. രജനീകാന്തിന് അത് സാധിക്കില്ല. 77ലും 80ലും 84ലും എം.ജി.ആര്‍ അധികാരത്തിലേറി. എം.ജി.ആറിനൊപ്പം രാഷ്ട്രീയ പ്രവര്‍ത്തനം തുടങ്ങിയ ജയലളിത, 1987ല്‍ അദ്ദേഹം മരിച്ച ശേഷം പാര്‍ട്ടിയിലെ അധികാരകേന്ദ്രമായി 89ലെ തെരഞ്ഞെടുപ്പില്‍ അധികാരം നഷ്ടപ്പെട്ടു. 91ല്‍ ജയലളിത മുഖ്യമന്ത്രിയായി. പിന്നീട് രണ്ട് തവണ മുഖ്യമന്ത്രി പദത്തിലെത്തി.