മുന്‍പ്രധാനമന്ത്രിയും കോണ്‍ഗ്രസ് നേതാവുമായ മന്‍മോഹന്‍സിങും മുന്‍ ഉപരാഷ്ട്രപതി ഹാമിദ് അന്‍സാരിയും കോണ്‍ഗ്രസ് നേതാവ് മണിശങ്കര്‍ അയ്യറുടെ സൗത്ത് ഡല്‍ഹിയിലെ വസതിയില്‍ വെച്ച് പാക് നയതന്ത്രജ്ഞനുമായി ചേര്‍ന്ന് ഗൂഢാലോചന നടത്തിയെന്ന പരാതിയില്‍ അന്വേഷണം ആവശ്യപ്പെട്ട് ബിജെപി നേതാവ് അഡ്വ. അജയ് അഗര്‍വാള്‍ സമര്‍പ്പിച്ച ഹരജിയില്‍ സാകേത് കോടതി ഇന്ന് വാദം കേള്‍ക്കും.
ഗുജറാത്ത് തെരഞ്ഞെടുപ്പ് വേളയില്‍ വലിയ ചര്‍ച്ചകള്‍ക്കും വിവാദങ്ങള്‍ക്കും വഴിവെച്ച ആരോപണം പ്രധാനമന്ത്രി നരേന്ദ്രമോദിയാണ് വെളിപ്പെടുത്തിയത്. തെരഞ്ഞെടുപ്പിന് ശേഷം ഇക്കാര്യം ഉന്നയിച്ച് പ്രതിപക്ഷം ലോക്‌സഭ തുടര്‍ച്ചയായി സ്തംഭിപ്പിച്ചപ്പോള്‍ ധനമന്ത്രി അരുണ്‍ ജെയ്റ്റ്‌ലി ഇക്കാര്യത്തില്‍ വിശദീകരണം നടത്തിയിരുന്നു. മന്‍മോഹന്‍സിംങിന്റെയും ഹമീദാ അന്‍സാരിയുടെയും സേവനങ്ങളെ മോദി വിലകുറച്ച് കാണുന്നില്ലെന്നാണ് ജയ്റ്റ്‌ലി വ്യക്തമാക്കിയത്.

കഴിഞ്ഞ ലോക്‌സഭാതെരഞ്ഞെടുപ്പില്‍ സോണിയ ഗാന്ധിക്കെതിരെ റായ്ബറേലിയില്‍ മത്സരിച്ചത് അഡ്വക്കേറ്റ് അജയ് അഗര്‍വാളായിരുന്നു. രാജ്യദ്രോഹ പ്രവര്‍ത്തിയില്‍ ഏര്‍പ്പെട്ട മണിശങ്കര്‍ അയ്യര്‍ അടക്കമുള്ളവരെ അറസ്റ്റ് ചെയ്ത് കേസ് എടുക്കാന്‍ ദില്ലി പൊലീസിന് നിര്‍ദ്ദേശം നല്‍കണമെന്നാണ് ഹര്‍ജിക്കാരന്റെ വാദം. പൊലീസിന്റെയും നാഷനല്‍ ഇന്‍വെസ്റ്റിഗേറ്റീവ് ഏജന്‍സിയുടെയും ശ്രദ്ധയില്‍ ഇക്കാര്യം അറിയിച്ചിട്ടും പ്രാധാന്യം കേസിന് നല്‍കിയില്ല. മണിശങ്കര്‍ അയ്യരുടെ വീട്ടില്‍ ചേര്‍ന്ന യോഗം ദേശസുരക്ഷയ്ക്ക് വലിയ ഭീഷണിയാണ് സൃഷ്ടിച്ചതെന്നും ഹരജിയില്‍ ആരോപിക്കുന്നു. പ്രധാനമന്ത്രി നടത്തിയ വെളിപ്പെടുത്തലിനെ തുടര്‍ന്ന് പ്രധാനമന്ത്രിയെ താണ ജാതിക്കാരന്‍ എന്ന രീതിയിലുള്ള പരാമര്‍ശം നടത്തിയ കോണ്‍ഗ്രനേതാവ് മണിശങ്കര്‍ അയ്യരെ കോണ്‍ഗ്രസ് പുറത്താക്കിയിരുന്നു. 

പാക്കിസ്ഥാനിലെ രാഷ്ട്രീയനേതാക്കളെ കൂട്ടുപിടിച്ച് മണിശങ്കര്‍ അയ്യര്‍ ഉള്‍പ്പെടെ തന്നെ തകര്‍ക്കാന്‍ ശ്രമിച്ചെന്നും മോദി ആരോപിച്ചിരുന്നു. എന്നാല്‍ നവാസ് ഷെരീഫിന്റെ മകളുടെ കല്യാണത്തിന് ക്ഷണിക്കാതെ പോയത് ആരാണെന്ന് എല്ലാവര്‍ക്കും അറിയാമെന്ന് കോണ്‍ഗ്രസ് തിരിച്ചടിച്ചിരുന്നു. നവാസ് ഷെരിഫുമായി ഇന്ത്യയിലെ ചില രാഷട്രീയ നേതാക്കള്‍ക്കും ബിസിനസുകാര്‍ക്കും ബിസിനസ് ബന്ധങ്ങളുണ്ടെന്ന് ആക്ഷേപമുണ്ട്. ബി.ജെ.പിയുമായി ബന്ധമുള്ള ചില കോര്‍പ്പറേറ്റുകള്‍ക്ക് നവാസ് ഷെരീഫുമായി ബിസിനസ് ഉണ്ടെന്നും അറിയുന്നു.