ആഡംബരപ്പേന, വാഴക്കുളം മെയ്ഡ്!
ഇന്ത്യയിലെ ലക്ഷ്വറി പേന വിപണി 1200 കോടിയുടേതാണ്. പേനയില്ലാതെയും വിരല്ത്തുമ്പുകൊണ്ടെഴുതാവുന്ന ഡിജിറ്റല് കാലഘട്ടത്തിലും ആഡംബരപ്പേനകള്ക്ക് ആവശ്യക്കാരേറുകയാണ്. കോര്പറേറ്റ് ഗിഫ്റ്റിങ് സെഗ്മെന്റില് പ്രമുഖ സ്ഥാനം ഇപ്പോഴും പേനയ്ക്കാണ്. സ്വര്ണം കൊണ്ടു നിര്മിച്ചതും വൈരക്കല്ലുകളുള്ളതുമായ ലക്ഷങ്ങള് വിലമതിക്കുന്ന പേനകള് ഓണ്ലൈന് വിപണിയിലും നന്നായി വിറ്റുപോകുന്നുണ്ട്.
വിദേശപ്പേനകള് മാത്രം നിറഞ്ഞുനിന്ന ഈ മേഖലയിലേക്കു കേരളത്തില് നിന്നുള്ള ഒരു കമ്പനിയുമുണ്ട് ഇപ്പോള്. റൈറ്റോള് എന്ന ബ്രാന്ഡിലൂടെ മേഖലയിലെത്തിയിരിക്കുന്നത് പ്രമുഖ ഭക്ഷ്യോല്പന്ന കമ്പനിയായ ബ്രാഹ്മിണ്സ് ആണ്. പൂര്ണമായും ഇറക്കുമതി ചെയ്യുന്ന ഭാഗങ്ങള് ഉപയോഗിച്ച് കൈകൊണ്ടു പേന നിര്മിക്കുന്ന നാലു യൂണിറ്റുകള് രാജ്യത്തുണ്ട്. എറണാകുളത്തെ വാഴക്കുളത്തുള്ള യൂണിറ്റിലും പേന നിര്മിക്കും. മെയ്ക് ഇന് ഇന്ത്യ പ്രോജക്ടിന്റെ ഭാഗമായാണ് പേനകള് ഇന്ത്യയില് നിര്മിക്കുന്നതെന്ന് റൈറ്റോള് സിഇഒ ശ്രീനാഥ് വിഷ്ണു പറയുന്നു.
ക്രോസും മോ ബ്ലായും ജോസഫ് ലാമിയും ഡ്യുപോണ്ടുമൊക്കത്തന്നെയായിരുന്നു ഇന്ത്യന് പെന് വിപണിയിലും നിറഞ്ഞുനിന്നത്. എന്നാല് കേരളത്തില് ഇതുവരെ റൈറ്റോള് മുന്നൂറിലേറെ പേനകള് വിറ്റതായി ശ്രീനാഥ് പറഞ്ഞു. 5000 രൂപയില് വില തുടങ്ങും. റോള്സ് റോയ്സ് കമ്പനിക്കു വേണ്ടി മാത്രം 15 പേന നിര്മിച്ചു നല്കി. 2014 വരെ 400 കോടി രൂപയുടേതായിരുന്നു ഇന്ത്യയില് ആഡംബരപ്പേന വിപണി. എന്നാല് 2015-ല്ത്തന്നെ 700 കോടി കടന്നു. ഇപ്പോള് 1200 കോടിയുടേതാണു വിപണി.
പ്രസിഡന്റ് സീരീസില് സ്വര്ണപ്പേനകളാണ് റൈറ്റോള് അവതരിപ്പിച്ചത്. സ്വര്ണത്തിലും മില്ക് പ്രോട്ടീനിലും നിര്മിച്ചവ. പോക്കറ്റില് കുത്തിവയ്ക്കുമ്പോള് വളഞ്ഞുപോകാതിരിക്കാന് 18 കാരറ്റ് സ്വര്ണത്തിലാണു പേനയുടെ ഭാഗങ്ങള് നിര്മിച്ചിരിക്കുന്നത്. രണ്ടര ലക്ഷം രൂപ വരെയാണ് ഇത്തരം സ്വര്ണപ്പേനകളുടെ വില. ഡോക്ടര്മാര്ക്കായി ഡിസൈന് ചെയ്ത ആര്ടീരിയ പേനയിലും സ്വര്ണം ഉപയോഗിച്ചിട്ടുണ്ട്. ക്ലിപ്പും സെന്റര് ബാന്ഡുമാണ് സ്വര്ണത്തിലുള്ളത്. മുംബൈ, ഹൈദരാബാദ്, ജയ്പുര് എന്നീ യൂണിറ്റുകള്ക്കുപുറമെ വാഴക്കുളത്തും പേന നിര്മാണ യൂണിറ്റുണ്ട്. ഹാന്ഡ്മെയ്ഡ് പേനകളായതിനാലും അത്രയേറെ സൂക്ഷ്മത വേണ്ടതിനാലും ഒരു ദിവസം ഒരു യൂണിറ്റില് നിര്മിക്കുന്നതു മൂന്നു പേനകള് മാത്രം. ഒരു ഡിസൈനില് ഒരു പേന മാത്രമേ നിര്മിക്കൂ. പ്രീമിയം ഹാര്ഡ്വുഡ്, ട്രൂസ്റ്റോണ്, കേസിന്, മാര്ബിള് അക്രിലിക് മിശ്രിതം തുടങ്ങിയവകൊണ്ടുള്ള പേനയ്ക്കാവശ്യമായ ബാരല് നി!ര്മിച്ചെടുക്കാന് ആറു മണിക്കൂര് വേണം. ഇറക്കുമതി ചെയ്യുന്ന ഘടകഭാഗങ്ങളില് 40 ശതമാനം മൂല്യവര്ധന നടത്തുമെന്നും ശ്രീനാഥ് വിഷ്ണു പറയുന്നു.
പ്രസിഡന്റ് സീരീസിനു പുറമെ, ആല്ബര്ട് മെമ്മോറിയല്, അലക്സാന്ഡ്ര, കാനറി വാര്ഫ്, ചെയര്മാന്സ് ട്വിസ്റ്റ്, വെസ്റ്റ് മിനിസ്റ്റര്, മാര്ഗരറ്റ്, തുടങ്ങി ഒന്പതു പ്രമുഖ മോഡലുകളും ഇപ്പോള് വിപണിയിലെത്തിക്കഴിഞ്ഞു. ഇവയില് ആറു മോഡലുകള് ഫൗണ്ടന് പേനകളും ബോള് പോയിന്റ് പേനകളും റോളര് ബോള് പേനകളുമുണ്ട്. സ്വര്ണത്തോടൊപ്പം ക്രോമിയം, പ്ലാറ്റിനം, റോഡിയം എന്നിവ പൂശിയ പേനകളുമുണ്ട്. ഇംഗ്ലണ്ടില്നിന്നുള്ള പ്രമുഖ ഹാന്ഡ് മെയ്ഡ് പേന നിര്മാതാവായ റോണ് കാഡി എന്നറിയപ്പെടുന്ന റൊണാള്ഡ് കെ. കാഡിയുമായി ചേര്ന്നാണ് റൈറ്റോള് ആഡംബരപ്പേനകള് വിപണിയിലിറക്കുന്നത്. കൈ ഉപയോഗിച്ചു മരം കടഞ്ഞെടുക്കുന്ന വുഡ് ടേണിങ്ങില് 28 വര്ഷത്തെയും പെന് ടേണിങ്ങില് 15 വര്ഷത്തെയും അനുഭവസമ്പത്തുണ്ട് റോണ് കാഡിക്ക്.
www.rytol.shop എന്ന ഓണ്ലൈന് സൈറ്റില് മാത്രമേ പേനകള് ലഭ്യമാക്കൂ. ലോജിസ്റ്റിക്സില് അധിക ശ്രദ്ധ ആവശ്യമായതിനാല് മറ്റ് ഓണ്ലൈന് സൈറ്റുകള് വഴി പേന ലഭ്യമാക്കാന് ഇപ്പോള് പദ്ധതിയില്ലെന്നും ശ്രീനാഥ് പറയുന്നു.
https://www.facebook.com/Malayalivartha