ഉത്തരേന്ത്യയിലെ അതിരൂക്ഷമായ ഉഷ്ണതരംഗത്തില്‍ മരിച്ചവരുടെ എണ്ണം 87 ആയി. 24 മണിക്കൂറിനുള്ളില്‍ ഒഡിഷയില്‍ 46 പേര്‍ക്ക് ജീവന്‍ നഷ്ടമായെന്നാണ് റിപ്പോര്‍ട്ടുകളുള്ളത്.

ഉത്തര്‍പ്രദേശ്, ബിഹാര്‍, ജാര്‍ഖണ്ഡ്, രാജസ്ഥാന്‍ സംസ്ഥാനങ്ങളിലും കൊടുംചൂടില്‍ മരണസംഖ്യ ഉയരുന്നു. ഉത്തര്‍പ്രദേശില്‍ യഥാര്‍ഥ മരണസംഖ്യ മൂടിവയ്ക്കുന്നതായി ആരോപണം ഉയര്‍ന്നു. ഉച്ചനേരം പുറത്ത് ജോലി ചെയ്തവരാണ് മരിച്ചവരില്‍ ഏറിയപങ്കുമെന്ന് ഒഡിഷ പൊതുജനാരോഗ്യ ഡയറക്ടര്‍ നീലകാന്ത് ശര്‍മ പറഞ്ഞു.

ശനിയാഴ്ച അവസാനഘട്ട വോട്ടെടുപ്പ് നടന്ന ഒഡിഷയില്‍ 45 ഡിഗ്രി സെല്‍ഷ്യസ് വരെ താപനില രേഖപ്പെടുത്തി. കഴിഞ്ഞദിവസങ്ങളില്‍ താപനില 50 ഡിഗ്രിയോളമെത്തിയ ഡല്‍ഹിയില്‍ ശനിയാഴ്ച ശക്തമായ പൊടിക്കാറ്റ് വീശിയതിന് പിന്നാലെ ചൂട് നേരിയ തോതില്‍ കുറഞ്ഞു. ബിഹാറിലെ റോത്താസ് ജില്ലയില്‍ ലോക്സഭാ തെരഞ്ഞെടുപ്പ് ഡ്യൂട്ടിയിലായിരുന്ന നാലു സുരക്ഷാ ഉദ്യോഗസ്ഥര്‍ ഒരാഴ്ചയ്ക്കിടെ സൂര്യാഘാതമേറ്റുമരിച്ചു.