കാനഡയെ വിറപ്പിച്ച കുപ്രസിദ്ധ സീരിയല്‍ കില്ലര്‍ റോബര്‍ട്ട് പിക്ടണ്‍ (74) കൊല്ലപ്പെട്ടു. ക്യുബെക്കിലെ ജയിലില്‍ കഴിഞ്ഞ ഇയാളെ സഹതടവുകാരന്‍ ആക്രമിച്ചിരുന്നു. ആശുപത്രിയില്‍ ചികിത്സയിലിരിക്കെ വെള്ളിയാഴ്ച മരിച്ചു. മേയ് 19നായിരുന്നു പിക്ടണ്‍ ആക്രമിക്കപ്പെട്ടത്. സംഭവത്തില്‍ സഹതടവുകാരനായ മാര്‍ട്ടിന്‍ ചാറെസ്റ്റിനെ (51) പൊലീസ് കസ്റ്റഡിയിലെടുത്തു.

ഇയാള്‍ ഒരുതരം ഹാന്‍ഡില്‍ കൊണ്ട് പിക്ടണിന്റെ തലയില്‍ കുത്തിയെന്നാണ് വിവരം. 1995 - 2001 കാലയളവില്‍ 49 സ്ത്രീകളെ പിക്ടണ്‍ കൊന്നെന്ന് കരുതുന്നു. 26 കേസുകളില്‍ കുറ്റം ചുമത്തി. ആറ് എണ്ണത്തില്‍ കുറ്റക്കാരനെന്ന് തെളിഞ്ഞു. ഇരകളെ കഴുത്ത് ഞെരിച്ച് കൊന്ന ശേഷം മൃതദേഹം പന്നികള്‍ക്ക് ഭക്ഷിക്കാന്‍ നല്‍കുന്നതായിരുന്നു ഇയാളുടെ രീതി. വാന്‍ക്യുവറിലുള്ള ഇയാളുടെ പന്നി ഫാമില്‍ നിന്ന് 33 സ്ത്രീകളുടെ മൃതദേഹാവശിഷ്ടങ്ങള്‍ കണ്ടെടുത്തിയിരുന്നു. 2002ലാണ് ഇയാള്‍ പൊലീസ് പിടിയിലായത്.

വാന്‍ക്യുവറില്‍ നിന്ന് കാണാതായ സ്ത്രീകളെ തേടിയുള്ള പൊലീസിന്റെ അന്വേഷണം ഒടുവില്‍ പിക്ടണില്‍ എത്തിച്ചേരുകയായിരുന്നു. 2007ല്‍ പിക്ടണിന് കോടതി ജീവപര്യന്തം തടവ് വിധിച്ചു. 25 വര്‍ഷത്തിന് ശേഷം മാത്രം പരോള്‍ നല്‍കിയാല്‍ മതിയെന്നും കോടതി ഉത്തരവിട്ടു. ലൈംഗികത്തൊഴിലാളികളും മയക്കുമരുന്നിന് അടിമപ്പെട്ട സ്ത്രീകളുമായിരുന്നു പിക്ടണിന്റെ പ്രധാന ഇരകള്‍. 1978 - 2001 കാലയളവില്‍ വാന്‍ക്യുവറില്‍ നിന്ന് 65 സ്ത്രീകളെ കാണാതായെന്നാണ് കണക്ക്.