ഐഎസ് തീവ്രവാദികള്‍ കേരളത്തിലും എത്തി നേതാക്കളെ വധിക്കാന്‍ പാക്കിസ്ഥാന്‍ സഹായം
ഗുജറാത്തിലെ അഹമ്മാദാബാദ് വിമാനത്താവളത്തില്‍ ഞായറാഴ്ച അറസ്റ്റിലായ നാല് ഇസ്ലാമിക് സ്റ്റേറ്റ് തീവ്രവാദികളുടെ ലക്ഷ്യം പലതായിരുന്നു. ഇന്ത്യയിലെ മുന്‍നിര നേതാക്കളെ വധിക്കുകയെന്നതായിരുന്നു ഇന്ത്യയില്‍ മാസങ്ങളായി പ്രവര്‍ത്തിച്ചുവന്നിരുന്ന നാലംഗ ഇസ്ലാമിക് തീവ്രവാദികളുടെ ഉന്നം. ആസന്ന ഭാവിയില്‍ ഇന്ത്യയുടെ ഭരണം പിടിച്ചെടുക്കുക ഉള്‍പ്പെടെ നീക്കങ്ങളിലേക്കായിരുന്നു പാക്കിസ്ഥാന്‍ നിയന്ത്രിത ഐഎസ് തീവ്രവാദികളുടെ ലക്ഷ്യം. കൊച്ചി ഉള്‍പ്പെടെ പ്രമുഖ നഗരങ്ങളില്‍ ബോംബ് സ്‌ഫോടനം നടത്തുക ഉള്‍പ്പെടെ വന്‍നീക്കങ്ങളോടെ ഇസ്ലാമിക് സ്റ്റേറ്റ് ഇന്ത്യയില്‍ ആസൂത്രിതമായ നീക്കങ്ങള്‍ നടത്തുകയാണെന്ന് രഹസ്യാന്യേഷണ വിഭാഗം കണ്ടെത്തിയിരുന്നതിന് പിന്നാലെയാണ് ശ്രീലങ്കയില്‍ നിന്നെത്തിയ നാലു തീവ്രവാദികളെ വിമാനത്താവളത്തില്‍ അറസ്റ്റുചെയ്തിരിക്കുന്നത്. ശ്രീലങ്കയിലെ കൊളംബോയില്‍ നിന്നും പാക്കിസ്ഥാന്റെ തുടര്‍ സഹായത്തോടെ ഇതേ സംഘം നിരവധി തവണ ഇന്ത്യന്‍ നഗരങ്ങളിലെത്തി വെടിക്കോപ്പുകള്‍ രഹസ്യകേന്ദ്രങ്ങളില്‍ ഒളിപ്പിച്ചുവരികയായിരുന്നു.
ശ്രീലങ്കന്‍ സ്വദേശികളായ മുഹമ്മദ് നുസ്രത്ത്, മുഹമ്മദ് നഫ്രാന്‍, മുഹമ്മദ് ഫാരിസ്, മുഹമ്മദ് റസ്ദീന്‍ എന്നിവരെയാണ് ഗുജറാത്ത് ഭീകരവിരുദ്ധ സ്‌ക്വാഡ് അഹമ്മദാബാദിലെ സര്‍ദാര്‍ വല്ലഭായി പട്ടേല്‍ അന്താരാഷ്ട്ര വിമാനത്താവളത്തില്‍നിന്ന് ഞായറാഴ്ച അറസ്റ്റ് ചെയ്തത്.
നാലു വര്‍ഷം മുന്‍പ് ഈസ്റ്റര്‍ ദിനത്തില്‍ ശ്രീലങ്കയിലെ വിവിധ ക്രൈസ്തവ ദേവാലയങ്ങളിലും ഹോട്ടലുകളും സ്‌ഫോടനം നടത്തി 400 പേരെ ചാവേര്‍ ആക്രമണത്തില്‍ അരുംകൊല ചെയ്ത സംഭവത്തിലും ഇസ്ലാമിക് തീവ്രവാദി സംഘങ്ങള്‍ക്ക് അടുത്ത പങ്കുള്ളതായി കണ്ടെത്തിയിരുന്നു. സമാനമായ രീതിയില്‍ ചാവേറുകളായി മാറി വന്‍ദുരന്തം സൃഷ്ടിക്കാനുള്ള തയാറെടുപ്പിലായിരുന്നു ഈ നാലു പേര്‍. ഇവര്‍ക്കൊപ്പം കണ്ണികളായി
ഇന്ത്യയില്‍ ഉള്‍പ്പെടെ ഒട്ടേറെ സഹായകളും ഉണ്ടായിരുന്നതായാണ് വിവരങ്ങള്‍ പുറത്തുവരുന്നത്.
ഇന്ത്യയില്‍ അന്വേഷണം കര്‍ക്കശമാക്കിയതോടെ ശ്രീലങ്ക കേന്ദ്രീകരിച്ചാണ് ഇസ്ലാമിക് തീവ്രവാദികള്‍ ഇന്ത്യയെ ലക്ഷ്യമിട്ട് കുറെക്കാലമായി കരുനീക്കങ്ങള്‍ നടത്തിവരുന്നത്.
സര്‍ദാര്‍ വല്ലഭ്ഭായ് പട്ടേല്‍ അന്താരാഷ്ട്ര വിമാനത്താവളത്തില്‍ വിമാനമിറങ്ങിയ നാലുപേരെയും അറസ്റ്റ് ചെയ്ത് ചോദ്യം ചെയ്തുവരികയാണ്. ഇന്ത്യയില്‍ ഡല്‍ഹി, മുംബൈ, സൂററ്റ്, അഹമ്മദാബാദ്, കല്‍ക്കട്ട, ചെന്നൈ ഉള്‍പ്പെടെ പലയിടങ്ങളിലും ചാവേറാക്രമണങ്ങള്‍ നടത്താന്‍ ഇതേ സംഘം പദ്ധതിയിട്ടിരുന്നുവെന്നും ഇവര്‍ക്ക് പാകിസ്ഥാനില്‍ നിന്ന് സഹായങ്ങള്‍ ലഭിച്ചുവെന്നും വ്യക്തമായിട്ടുണ്ട്.
ഐപിഎല്‍ മത്സരത്തിനായി ടീമുകള്‍ അഹമ്മദാബാദില്‍ എത്താനിരിക്കെയായിരുന്നു തീവ്രവാദികളുടെ അറസ്റ്റ്. ക്രിക്കറ്റ് സ്റ്റേഡിയങ്ങളില്‍ ഉള്‍പ്പെടെ ഇവര്‍ സ്‌ഫോടനം ആസൂത്രണം ചെയ്തിരുന്നതായാണ് സൂചനകള്‍ പുറത്തുവരുന്നത്.കൊച്ചിയിലും മുംബൈയിലും ഉള്‍പ്പെടെ യഹൂദരുടെ പ്രധാനകേന്ദ്രങ്ങളെയും ഹിന്ദു സംഘടനാ നേതാക്കളെയും ലക്ഷ്യമിടാന്‍ ഇവരെ ചുമതലപ്പെടുത്തിയിരുന്നുവെന്നാണ് പോലീസ് പറയുന്നത്.
ഗുജറാത്തില്‍ ചാവേര്‍ ആക്രമണങ്ങള്‍ നടത്താന്‍ പദ്ധതിയിട്ട ഇവര്‍ക്ക് പാകിസ്ഥാനില്‍ പ്രവര്‍ത്തിക്കുന്ന ഐഎസ് ഭീകരന്‍ അബുവുമായി നേരിട്ടു ബന്ധമുണ്ടെന്നും വ്യക്തമായിക്കഴിഞ്ഞു. ഇതേ തീവ്രവാദികള്‍ ആദ്യം കൊളംബോയില്‍ നിന്ന് ചെന്നൈയിലെത്തിയതായും ഈ മാസം 19ന് അഹമ്മദാബാദില്‍ എത്തിയതായും വിവരം ലഭിച്ചതിനെത്തുടര്‍ന്നാണ് അന്വേഷണം ഊര്‍ജിതമാക്കിയത്.
വിമാനത്താവളത്തില്‍നിന്ന് അറസ്റ്റിലായ നാല് പ്രതികളും ശ്രീലങ്കന്‍ പൗരന്മാരും ഇസ്ലാമിക് സ്റ്റേറ്റിന്റെ പരിശീലനം ലഭിക്കുന്ന ഭീകരരാണെന്ന് വ്യക്തമായിക്കഴിഞ്ഞു.
പ്രധാനമന്ത്രി നരേന്ദ്ര മോദിയുടെയും ആഭ്യന്തര മന്ത്രി അമിത് ഷായുടെയും സംസ്ഥാനമായ ഗുജറാത്ത് ഇസ്ലാമിക് ഭീകരര്‍ മാസങ്ങളായി ലക്ഷ്യംവച്ചതായി കണ്ടെത്തിയിരിക്കുന്നു. കഴിഞ്ഞ വര്‍ഷം ഓഗസ്റ്റില്‍ അല്‍ക്വയ്ദ ബന്ധമുള്ള മൂന്ന് തീവ്രവാദികളെ പേരെ രാജ്‌കോട്ടില്‍ നിന്ന് അറസ്റ്റ് ചെയ്തിരുന്നു.
അഹമ്മദാബാദില്‍ അറസ്റ്റിലായ നാലു തീവ്രവാദികളെയും ചോദ്യം ചെയ്തപ്പോള്‍ ഗുജറാത്തിലെ ഗാന്ധിനഗറിലുള്ള നാനാ ചിലോദയില്‍ നിന്ന് മൂന്ന് ലോഡഡ് പിസ്റ്റളുകളും ആയുധക്കോപ്പുകളും കണ്ടെടുക്കുകയും ചെയ്തിട്ടുണ്ട്.
ഇവരുടെ ലഗേജുകളില്‍ നിന്ന് നാല് പാസ്പോര്‍ട്ടുകള്‍, രണ്ട് മൊബൈല്‍ ഫോണുകള്‍, ഇന്ത്യന്‍, ശ്രീലങ്കന്‍ കറന്‍സികള്‍, ഇസ്ലാമിക് സ്റ്റേറ്റ് പതാക എന്നിവ പിടിച്ചെടുത്തിട്ടുണ്ട്.
പാകിസ്ഥാനില്‍ താമസിക്കുന്ന ശ്രീലങ്കന്‍ സ്വദേശിയായ അബു എന്നയാളുടെ നിര്‍ദേശപ്രകാരമാണ് തങ്ങള്‍ പ്രവര്‍ത്തിച്ചതെന്ന് പ്രതികള്‍ വെളിപ്പെടുത്തിയതായി ഗുജറാത്ത് ഡയറക്ടര്‍ ജനറല്‍ ഓഫ് പോലീസ് വികാസ് സഹായ് വ്യക്തമാക്കിട്ടുണ്ട്.
സമാനമായ ആയുധങ്ങള്‍ മറ്റെവിടെയെങ്കിലും സൂക്ഷിച്ചുവച്ചിട്ടുണ്ടോ എന്ന് കണ്ടെത്താനും ശ്രമം തുടരുകയാണ്. നാലുപേരും ഏതെങ്കിലും ചാവേര്‍ ആക്രമണം ആസൂത്രണം ചെയ്തിരുന്നോ എന്നതും അന്വേഷിച്ചുവരികയാണ്.
ലോകമെമ്പാടും യഹൂദരെയും ഹിന്ദുക്കളെയും ക്രിസ്ത്യാനികളെയും ഉന്‍മൂലനം ചെയ്യുകയെന്ന ലക്ഷ്യത്തിലാണ് ഇസ്ലാമിക് സ്റ്റേറ്റ് തീവ്രവാദികള്‍ ലോകമെമ്പാടും പ്രവര്‍ത്തിച്ചുവരുന്നത്.
https://www.facebook.com/Malayalivartha
