ഇന്ത്യയിലാകെ ഒരുപോലെ തരംഗം തീര്‍ത്ത ചിത്രമാണ് '96'. സംവിധായകന്‍ പ്രേംകുമാര്‍ സംവിധാനം ചെയ്ത ചിത്രത്തില്‍ റാമായി വിജയ് സേതുപതിയും ജാനുവായി തൃഷയും ജീവിക്കുകയായിരുന്നു. 2018ലെ ഏറ്റവും മികച്ച തെന്നിന്ത്യന്‍ ചിത്രമെന്ന നേട്ടവും 96 സ്വന്തമാക്കി. ഇപ്പോഴും 96 തരംഗം അവസാനിച്ചിട്ടില്ല.

തന്റെ കരിയറില്‍ ഇത്രയും മനോഹരമായ ചിത്രം സമ്മാനിച്ച പ്രിയ സംവിധായകന് സ്‌നേഹസമ്മാനമായി റോയല്‍ എന്‍ഫീല്‍ഡ് ബൈക്ക് സമ്മാനിച്ചിരിക്കുകയാണ് വിജയ് സേതുപതി. മൂന്നു ലക്ഷം രൂപയോളം വില വരുന്ന ഒരു ബുള്ളറ്റാണ് പ്രേം കുമാറിന് മക്കള്‍ സെല്‍വന്‍ സമ്മാനിച്ചത് എന്നാണ് തമിഴകത്തു നിന്നു വരുന്ന വാര്‍ത്ത. '0096' എന്നതാണ് ബുളളറ്റിന്റെ രജിസ്‌ട്രേഷന്‍ നമ്പര്‍ എന്നത് മക്കള്‍ സെല്‍വന്റെ സമ്മാനത്തിന് ഇരട്ടിമധുരം സമ്മാനിക്കുന്നു. ബുള്ളറ്റ് പ്രേമി കൂടിയായ വിജയ് സേതുപതിയുടെ ഈ സമ്മാനത്തെ നെഞ്ചോട് ചേര്‍ക്കുകയാണ് പ്രേം കുമാറും.

തൃഷയും വിജയ് സേതുപതിയും ആദ്യമായി ഒരുമിച്ച ചിത്രം കൂടിയായിരുന്നു '96'. ചിത്രത്തില്‍ ഒരു ഫോട്ടോഗ്രാഫറായാണ് വിജയ് സേതുപതിയെത്തിയത്. സഹപാഠികളായിരുന്ന റാമും ജാനുവും വര്‍ഷങ്ങള്‍ക്ക് ശേഷം കണ്ടുമുട്ടുന്നതും '96' ബാച്ചിലെ വിദ്യാര്‍ഥികളുടെ ഒത്തുചേരലും തുടര്‍ന്നുണ്ടാകുന്ന സംഭവങ്ങളുമായിരുന്നു ചിത്രത്തിന്റെ പ്രമേയം.

ചിത്രം തമിഴില്‍ നേടിയ വിജയത്തിന്റെ പശ്ചാത്തലത്തില്‍ 96ന്റെ കന്നഡ, തെലുങ്ക് പതിപ്പുകളും അണിയറയില്‍ ഒരുങ്ങുകയാണ്. 96ന്റെ കന്നഡ പതിപ്പില്‍ ജാനുവായി ഭാവനയും റാമായി ഗണേശുമാണ് അഭിനയിക്കുന്നത്. 'റോമിയോ' എന്ന സൂപ്പര്‍ ഹിറ്റ് കന്നഡ ചിത്രത്തിനു ശേഷം ഭാവനയും ഗണേഷും വീണ്ടും ഒന്നിക്കുന്ന ചിത്രം കൂടിയാണിത്. ചിത്രത്തിന്റെ പേരിലും വ്യത്യാസമുണ്ട്. 96ന് പകരം 99 എന്നാണ് പേര്. 99 സംവിധാനം ചെയ്യുന്നത് പ്രീതം ഗുബ്ബിയാണ്. തെലുങ്കില്‍ സാമന്തയാണ് തൃഷയുടെ വേഷം ചെയ്യുന്നത്.

ചിനു രാമസ്വാമി സംവിധാനം മാമനിതന്‍ എന്ന ചിത്രത്തില്‍ അഭിനയിച്ചു വരികയാണ് വിജയ് സേതുപതി ഇപ്പോള്‍. ചിത്രത്തിന്റെ ഷൂട്ടിംഗിനായി ജനുവരി അവസാന ആഴ്ചകളില്‍ താരം കേരളത്തിലെത്തിയിരുന്നു. ആലപ്പുഴയാണ് ചിത്രത്തിന്റെ പ്രധാന ലൊക്കേഷനുകള്‍ ഒന്ന്. ചിനു രാമസ്വാമിയുടെയും വിജയ് സേതുപതിയും ഒന്നിക്കുന്ന നാലാമത്തെ ചിത്രമാണ് മാമനിതന്‍. മലയാളി താരം മണികണ്ഠന്‍ ആചാരിയും ചിത്രത്തിലുണ്ട്. ലുങ്കിയും കാക്കിയുടുപ്പുമണിഞ്ഞ തമിഴകത്തിന്റെ മക്കള്‍ സെല്‍വന്‍ വിജയ് സേതുപതിയുടെ തോളില്‍ കയ്യിട്ട് നില്‍ക്കുന്ന മണികണ്ഠന്റെ ചിത്രവും ആലപ്പുഴ ലൊക്കേഷന്‍ ചിത്രങ്ങളും ഇന്റര്‍നൈറ്റില്‍ വൈറലായിരുന്നു. ഷൂട്ടിംഗ് കാണാനെത്തിയവര്‍ക്കൊപ്പം സെല്‍ഫിയെടുത്തും കെട്ടിപ്പിടിച്ചുമൊക്കെ വിജയ് സേതുപതി മലയാളി ആരാധകരെ മുഴുവന്‍ കയ്യിലെടുക്കുന്ന കാഴ്ചകള്‍ക്കാണ് സമൂഹമാധ്യമങ്ങള്‍ സാക്ഷിയായത്. ആലപ്പുഴ ബീച്ചിലെ കയര്‍ കോര്‍പ്പറേഷന്‍ ഗോഡൗണിലും മാരാരികുളത്തുമായിരുന്നു പ്രധാനമായും ചിത്രത്തിന്റെ ഷൂട്ടിംഗ് നടന്നത്.