നൂതന സാങ്കേതിക വിദ്യകളില്‍ ആധിപത്യം വഹിക്കുന്നത് ഇന്ത്യ ഉള്‍പ്പെടെയുള്ള രാജ്യങ്ങളാണെന്ന് അമേരിക്കന്‍ സെനറ്റര്‍. ഇന്ത്യ കൂടാതെ റഷ്യയും ചൈനയും ഹൈപ്പര്‍ സോണിക് സംവിധാനത്തില്‍ ആധുനികവത്ക്കരിക്കപ്പെടുന്നുണ്ട് ഈ മൂന്ന് രാജ്യങ്ങള്‍ക്കും പുറകിലാണ് യുഎസ് എന്നും സെനറ്റര്‍ ജാക്ക് റീഡ് വ്യക്തമാക്കി.

അമേരിക്ക സാങ്കേതികതയില്‍ മുന്നില്‍ നില്‍ക്കുന്ന രാജ്യമാണ്. സാങ്കേതിക വിദ്യകളില്‍ അമേരിക്ക തന്നെയാണ് ആധിപത്യം പുലര്‍ത്തിയിരുന്നതും. എന്നാല്‍ ഇന്ന് അതല്ല അവസ്ഥ. ഹൈപ്പര്‍ സോണിക് ആയുധങ്ങളില്‍ ഇന്ത്യയും റഷ്യയും ചൈനയും ആധുനികത കൈവരിക്കുന്നുണ്ട്.

ഇനി രണ്ട് രാഷ്ട്രങ്ങള്‍ തമ്മിലല്ല മത്സരമെന്നും ലോകചരിത്രത്തില്‍ ആദ്യമായി ഒരു ത്രിരാഷ്ട്ര ആണവ മത്സരമാണ് നടക്കാന്‍ പോകുന്നത് എന്നും സെനറ്റര്‍ വ്യക്തമാക്കി. ലോകരാഷ്ട്രങ്ങളുടെ നേതാവ് എന്നറിയപ്പെടുന്ന അമേരിക്ക ഇപ്പോള്‍ പിന്തള്ളപ്പെട്ടിരിക്കുകയാണെന്നും അദ്ദേഹം ചൂണ്ടിക്കാട്ടി.

2020ല്‍ തന്നെ ഇന്ത്യ ലോകത്തെ ഹൈപ്പര്‍ സോണിക് മിസൈല്‍ ക്ലബ്ബില്‍ സ്ഥാനം നേടിയിരുന്നു. അന്ന് അമേരിക്കയ്ക്കും റഷ്യയ്ക്കും ചൈനയ്ക്കും പിന്നാലെ ഹൈപ്പര്‍ സോണിക് മിസൈലുകള്‍ വിക്ഷേപിക്കാനുള്ള സാങ്കേതികവിദ്യ കൈവശമുള്ള നാലാമത്തെ രാജ്യമായി ഇന്ത്യ മാറിയിരുന്നു.

2019 ലെ ഒരു ശ്രമം പരാജയപ്പെട്ടതിനുശേഷം, തദ്ദേശീയമായി വികസിപ്പിച്ച പ്രൊപ്പല്‍ഷന്‍ സംവിധാനം ഉപയോഗിച്ച് ഹൈസ്പീഡ് ടെക്‌നോളജി ഡെമോണ്‍സ്‌ട്രേറ്റര്‍ വെഹിക്കിളിന്റെ (എച്ച്എസ്ടിഡിവി) കന്നി പരീക്ഷണ പറക്കല്‍ വിജയകരമായി നടത്തിക്കൊണ്ടാണ് ഇന്ത്യ എലൈറ്റ് രാജ്യങ്ങളുടെ ക്ലബില്‍ അംഗമായത്.ഹൈപ്പര്‍ സോണിക്കിനേക്കാള്‍ വേഗമുള്ള മിസൈല്‍ ഇന്നുവരെ ഒരു രാജ്യവും കണ്ടുപിടിച്ചിട്ടില്ല. കൂറ്റന്‍ വിമാനവാഹിനിക്കപ്പലുകളെപ്പോലും വളരെ എളുപ്പം തകര്‍ക്കാന്‍ ഈ മിസൈലുകള്‍ക്ക് കഴിയും.

സെക്കന്റില്‍ രണ്ട് കിലോ മീറ്ററിലധികം സഞ്ചരിക്കാന്‍ ഹൈപ്പര്‍ സോണിക് മിസൈലുകള്‍ക്ക് സാധിക്കും. അടുത്ത അഞ്ച് വര്‍ഷത്തിനുള്ളില്‍ ഡി.ആര്‍.ഡി.ഒയ്ക്ക് ഹൈപ്പര്‍ സോണിക് മിസൈലുകള്‍ വികസിപ്പിക്കാനുള്ള ശേഷിയാണ് ഇതിലൂടെ നേടിയെടുത്തത്.

നിലവില്‍ ഹൈപ്പര്‍ സോണിക് മിസൈലുകളെ തടയാന്‍ കഴിയുന്ന മിസൈല്‍ സാങ്കേതിക വിദ്യ ഒരു രാഷ്ട്രങ്ങള്‍ക്കുമില്ല. ഒരു മിസൈലിനെ തടയണമെങ്കില്‍ ആ മിസൈലിനേക്കാള്‍ വേഗമാര്‍ജ്ജിക്കാന്‍ കഴിയുന്ന മറ്റൊരു മിസൈലിനു മാത്രമേ സാദ്ധ്യമാകൂ.

നാസ എക്‌സ് 43, ബോയിങ് എക്‌സ് 51 വേവ്‌റൈഡര്‍ തുടങ്ങിയ പ്രശസ്തമായ പരീക്ഷണ വിമാനങ്ങള്‍ ഈ വേഗം യാഥാര്‍ഥ്യമാക്കിയവയാണ്.ഇന്ത്യയുടെ തന്നെ അവതാര്‍ തുടങ്ങിയ ചെറുവിമാന സങ്കല്‍പവും ഇതിനെ അടിസ്ഥാനപ്പെടുത്തിയാണ്.ഭാവിയില്‍ ബഹിരാകാശ, പ്രതിരോധ, വ്യോമയാന രംഗങ്ങളില്‍ വിപ്ലവം സൃഷ്ടിക്കാവുന്ന ഒന്നായിട്ടാണ് ഹൈപ്പര്‍സോണിക് സാങ്കേതിക വിദ്യ കരുതപ്പെടുന്നത്.

നിലവില്‍ യുഎസ് മിസൈല്‍ ആയുധപ്പുരയില്‍ ഉള്ളതിനേക്കാള്‍ 17 മടങ്ങ് വേഗത്തില്‍ സഞ്ചരിക്കാന്‍ മിസൈലിന് കഴിവുണ്ടെന്ന് അദ്ദേഹം അവകാശപ്പെട്ടു. എന്നാലും ഹൈപ്പര്‍ സോണിക് മിസൈല്‍ പരീക്ഷണത്തില്‍ റഷ്യയാണ് മുന്‍പില്‍. കിന്‍ഷാല്‍ ഹൈപ്പര്‍സോണിക് മിസൈലണ് റഷ്യ പുറത്തിറക്കിയത്.

റഷ്യന്‍ മാദ്ധ്യമങ്ങളുടെ റിപ്പോര്‍ട്ട് അനുസരിച്ച് ഹൈപ്പര്‍സോണിക് ബൂസ്റ്റ്‌ഗ്ലൈഡ് വാഹനം കൊണ്ട് സജ്ജീകരിച്ചിരിക്കുന്ന തന്ത്രപരമായ ഭൂഖണ്ഡാന്തര ബാലിസ്റ്റിക് മിസൈല്‍ സംവിധാനമാണ് ഏറ്റവും പുതിയ മിസൈലായ അവാംഗാര്‍ഡ്, അന്തരീക്ഷത്തിലെ ഇടതൂര്‍ന്ന പാളികളില്‍ ശബ്ദത്തിന്റെ 20 ഇരട്ടി വേഗതയില്‍ പറക്കാന്‍ ഇതിനു കഴിയും.

റഷ്യയുടെ സിര്‍ക്കോണ്‍ എന്ന ഹൈപ്പര്‍സോണിക് മിസൈല്‍ പരീക്ഷണങ്ങളുടെ അന്തിമ ഘട്ടത്തിലാണ്. 2020 അവസാനമോ അടുത്തവര്‍ഷം ആദ്യമോ ഈ മിസൈല്‍ റഷ്യന്‍ വ്യോമസേനയുടെ ഭാഗമാകുമെന്നാണ് റിപ്പോര്‍ട്ടുകള്‍.