പ്രണയ വിവാഹത്തിന്റെ പേരില്‍ കോട്ടയം മാന്നാനത്ത് കെവിനെ കൊലപ്പെടുത്തിയ കേസിൽ കുറ്റപത്രം സമര്‍പ്പിച്ചു. കുറ്റപത്രത്തില്‍ കെവിന്റെ ഭാര്യാ സഹോദരന്‍ ഷാനു ചാക്കോയുള്‍പ്പടെ 12 പേര്‍ക്കെതിരെ കൊലക്കുറ്റം ചുമത്തിയിട്ടുണ്ട്.

കെവിന്‍ കൊല്ലപ്പെട്ടിട്ട് 85-ാം ദിവസമാണ് അന്വേഷണ സംഘം കുറ്റപത്രം സമര്‍പ്പിച്ചത്. ഏറ്റമാനൂര്‍ മജിസ്‌ട്രേറ്റ് കോടതിയിലാണ് കുറ്റപത്രം സമര്‍പ്പിച്ചത്. കെവിന്റെ ഭാര്യ നീനുവിന്റെ സഹോദരന്‍ ഷാനു ചാക്കോയാണ് കേസിലെ മുഖ്യസൂത്രധാരന്‍. വൈരാഗ്യത്തിന് കാരണം കെവിനും നീനുമായുള്ള ബന്ധമാണ്. നീനുവിന്റെ പിതാവ് ചാക്കോയ്‌ക്കെതിരെ ഗൂഢാലോചന കുറ്റമാണ് ചേര്‍ത്തിട്ടുള്ളത്.

പ്രദേശത്ത് പുഴ ഉണ്ട് എന്നറിയുന്ന പ്രതികള്‍ നീന്തലറിയാത്ത കെവിനെ ഓടിച്ച് പുഴയില്‍ ചാടിക്കുകയായിരുന്നു. നീനുവിന്റെ ബന്ധു നിയാസ് ഉള്‍പ്പടെയുള്ളവരാണ് ആയുധങ്ങളുമായി പിന്തുടര്‍ന്ന് കെവിനെ ഓടിച്ചതെന്നും കുറ്റപത്രത്തില്‍ പറയുന്നത്. 186 സാക്ഷി മൊഴികളും 118 രേഖകളും കുറ്റപത്രത്തോടൊപ്പം സമര്‍പ്പിച്ചു.