ചെങ്ങമനാട് അത്താണിയില് ബാറിന് മുന്നില് നാട്ടുകാര് നോക്കിനില്ക്കെ ബൈക്കിലെത്തിയ മൂന്നംഗസംഘം യുവാവിനെ വെട്ടിക്കൊലപ്പെടുത്തി, ഗുണ്ടാസംഘങ്ങള് തമ്മിലുള്ള കുടിപ്പകയാണ് കൊലപാതകത്തില് കലാശിച്ചതെന്ന് സൂചന, പ്രതികള്ക്കായി പോലീസ് അന്വേഷണം ആരംഭിച്ചു
ചെങ്ങമനാട് അത്താണിയില് ബാറിന് മുന്നില് നാട്ടുകാര് നോക്കിനില്ക്കെ ബൈക്കിലെത്തിയ മൂന്നംഗസംഘം യുവാവിനെ വെട്ടിക്കൊലപ്പെടുത്തി, സംഭവത്തിനുശേഷം അക്രമികള് രക്ഷപ്പെട്ടു. ഗുണ്ടാസംഘങ്ങള് തമ്മിലുള്ള കുടിപ്പകയാണ് കൊലപാതകത്തില് കലാശിച്ചതെന്ന് സൂചന. പ്രതികള്ക്കായി പോലീസ് അന്വേഷണം ആരംഭിച്ചു. നെടുമ്പാശ്ശേരി തുരുത്തിശ്ശേരി വല്ലത്തുകാരന് വീട്ടില് പരേതനായ വര്ക്കിയുടെ മകന് ബിനോയിയാണ് (ഗില്ലപ്പി -34) മരിച്ചത്. ഇന്നലെ രാത്രി എട്ടിന് ചെങ്ങമനാട് റോഡില് അത്താണി ഓട്ടോ സ്റ്റാന്ഡിന് സമീപം 'ഡയന ഹൈറ്റ്സി'ന് മുന്നിലാണ് സംഭവം. തലക്ക് വെട്ടേറ്റ ബിനോയ് സംഭവസ്ഥലത്ത് തന്നെ മരിച്ചു.
പത്തു വര്ഷത്തോളമായി അത്താണി കേന്ദ്രീകരിച്ച് പ്രവര്ത്തിക്കുന്ന 'അത്താണി ബോയ്സ്' ഗുണ്ടാസംഘത്തിന് ആദ്യകാലത്ത് നേതൃത്വം നല്കിയിരുന്നത് ബിനോയിയായിരുന്നു. സംസ്ഥാനത്തിനകത്തും പുറത്തും നിരവധി കേസുകളില് പ്രതിയായ ബിനോയി 'കാപ്പ' ആക്ടില് ശിക്ഷ അനുഭവിച്ചിട്ടുണ്ട്.
ഏതാനും നാളുകളായി അക്രമങ്ങളില്നിന്ന് വിട്ടുനില്ക്കുകയും അത്താണി ബോയ്സുമായുള്ള ബന്ധം ഉപേക്ഷിക്കുകയുമായിരുന്നുവത്രെ. അക്രമത്തിന് പിന്നില് ആരെന്ന് വ്യക്തമായിട്ടില്ല. പൂര്വ വൈരാഗ്യമാണ് കൊലപാതകത്തില് കലാശിച്ചതെന്ന് സൂചനയുണ്ട്. കൊലപാതക വിവരമറിഞ്ഞ് ആലുവ ഡിവൈ.എസ്.പി വേണു, നാര്കോട്ടിക് ഡിവൈ.എസ്.പി മധുബാബു, സര്ക്കിള് ഇന്സ്പെക്ടര്മാരായ എസ്. മുഹമ്മദ് റിയാസ്, ബെന്നി തുടങ്ങിയവര് സ്ഥലത്തെത്തി. മൃതദേഹം പോസ്റ്റ്മോര്ട്ടത്തിനായി കളമശ്ശേരി മെഡിക്കല് കോളജിലേക്ക് മാറ്റി.
https://www.facebook.com/Malayalivartha