പൂട്ടാനൊരുങ്ങി പോലീസ്.... കൂത്തുപറമ്പില് മുസ്ലിം ലീഗ് പ്രവര്ത്തകന് മന്സൂര് കൊല്ലപ്പെട്ട സംഭവത്തില് സി പി എം പ്രവര്ത്തകരെ സംരക്ഷിക്കാനുള്ള കണ്ണൂരിലെ നേതാക്കളുടെ ശ്രമം കണ്ണൂരിലെ ഉന്നത പോലീസ് ഉദ്യോഗസ്ഥര് തടഞ്ഞതായി സൂചന
കൂത്തുപറമ്പില് മുസ്ലിം ലീഗ് പ്രവര്ത്തകന് മന്സൂര് കൊല്ലപ്പെട്ട സംഭവത്തില് സി പി എം പ്രവര്ത്തകരെ സംരക്ഷിക്കാനുള്ള കണ്ണൂരിലെ നേതാക്കളുടെ ശ്രമം കണ്ണൂരിലെ ഉന്നത പോലീസ് ഉദ്യോഗസ്ഥര് തടഞ്ഞതായി സൂചന.
പ്രതികളെ രക്ഷിക്കാന് ശ്രമിച്ചാല് പാര്ട്ടി ഓഫീസ് വരെ റെയ്ഡ് ചെയ്യാന് മടിക്കില്ലെന്ന വ്യക്തമായ സൂചന പോലീസ് നല്കിയിട്ടുണ്ടെന്നാണ് വിവരം. പോലീസ് ഭീഷണിയില് പ്രതികള് ശരിക്കും വിരണ്ടു എന്നാണ് കരുതേണ്ടത്. പ്രതികളെ രക്ഷിക്കാന് ശ്രമിച്ചാല് പണി കിട്ടുമെന്ന വ്യക്തമായ സൂചന സിപിഎം നല്കി കഴിഞ്ഞു.
മന്സൂറിന്റെ കൊലപാതകം രാഷ്ട്രീയ കൊലപാതകമണെന്ന് ജില്ലാ പോലീസ് മേധാവി കഴിഞ്ഞ ദിവസം പറഞ്ഞിരുന്നു. തനിക്ക് ലഭിക്കുന്ന വിവരം മാധ്യമങ്ങള്ക്ക് കൃത്യമായി കൈമാറുമെന്ന് അദ്ദേഹം അറിയിച്ചതായാണ് വിവരം. മന്സൂറിന്റെ കൊലപാതകം രാഷ്ട്രീയ കൊലപാതകം തന്നെയാണെന്ന് തറപ്പിച്ച് പറഞ്ഞിരിക്കുകയാണ് ജില്ലാ പോലീസ് മേധാവി ആര്. ഇളങ്കോ.
മൃതദേഹവും വഹിച്ചുള്ള വിലാപയാത്രക്കിടെ പെരിങ്ങത്തൂരില് സിപിഎം ഓഫീസുകള്ക്ക് തീയിട്ടു. മുസ്ലിം ലീഗ് പ്രവര്ത്തകരാണ് ഓഫീസ് ആക്രമിച്ചത്. പെരിങ്ങത്തൂര് ലോക്കല് കമ്മിറ്റി ഓഫീസ് തീവച്ച് നശിപ്പിച്ചു. ഇതിന് പുറമെ പാനൂര് ടൗണ് ബ്രാഞ്ച് കമ്മിറ്റി ഓഫീസ്, ആച്ചിമുക്ക് ബ്രാഞ്ച് കമ്മിറ്റി ഓഫീസുകളും തീവെച്ച് നശിപ്പിച്ചു.പി കൃഷ്ണപിള്ള സ്മാരകവും കത്തിച്ചു. സിപിഎം ഓഫീസ് കത്തിച്ചവര്ക്കെതിരെ ജില്ലാ പോലീസ് നടപടി എടുത്തിട്ടുണ്ട്.
വന്ജനാവലിയുടെ സാന്നിധ്യത്തിലാണ് മന്സൂറിന്റെ വിലാപയാത്ര കടന്നു പോയത്. കോഴിക്കോട് മെഡിക്കല് കോളേജില് നടന്ന പോസ്റ്റ്മോര്ട്ടത്തിന് ശേഷമാണ് മൃതദേഹം ബന്ധുക്കള്ക്ക് വിട്ടുനല്കിയത്. മന്സൂര് കൊല്ലപ്പെട്ടത് ബോംബേറിലെന്നാണ് പോസ്റ്റ്മോര്ട്ടം പ്രാഥമിക റിപ്പോര്ട്ട്. കാല്മുട്ടിലെ മുറിവ് വെട്ടേറ്റതല്ലെന്നും ബോംബേറ് മൂലമുണ്ടായതെന്നുമാണ് കണ്ടെത്തല്. ഇടത് കാല്മുട്ടിന് താഴെയായിരുന്നു ഗുരുതര പരിക്ക്. ബോംബ് സ്ഫോടനത്തില് ചിതറിപ്പോയത് കൊണ്ട് തലശ്ശേരിയിലെയും വടകരയിലെയും ആശുപത്രികളില് നിന്ന് പരിക്ക് തുന്നിച്ചേര്ക്കാന് പറ്റിയില്ല.
മന്സൂറിനെ അച്ഛന്റെ മുന്നില് വച്ച് ബോംബെറിഞ്ഞ ശേഷം വെട്ടുകയായിരുന്നു. ഇന്നലെ രാത്രി എട്ട് മണിയോടെയുണ്ടായ സംഘര്ഷത്തില് വെട്ടേറ്റ മന്സൂര് ഇന്ന് രാവിലെയാണ് മരിച്ചത്. ഇയാളുടെ സഹോദരന് മുഹ്സിനും ആക്രമണത്തില് പരിക്കേറ്റിരുന്നു. മുഹ്സിന് ഇവിടെ 150-ാം നമ്പര് ബൂത്തിലെ യുഡിഎഫ് ഏജന്റായിരുന്നു. ഇന്നലെ ഉച്ചയോടെ പോളിങിനിടെ മുക്കില്പീടിക ഭാഗത്ത് ലീഗ്-സിപിഎം പ്രവര്ത്തകര് തമ്മില് സംഘര്ഷമുണ്ടായിരുന്നു.
ഡിവൈഎഫ്ഐ തന്നെ ടാര്ഗെറ്റ് ചെയ്തിരുന്നെന്നാണ് പരിക്കേറ്റ് ചികിത്സയില് കഴിയുന്ന മുഹ്സിന് പറയുന്നത്. പേര് ചോദിച്ച് ഉറപ്പാക്കിയ ശേഷമാണ് ആക്രമിച്ചത്.
നിലവിളി ശബ്ദം കേട്ടപ്പോള് നാട്ടുകാര് ഓടിയെത്തി. ഈ സമയത്ത് ആക്രമികള് ഓടി രക്ഷപ്പെടാന് ശ്രമിച്ചു. അതില് ഒരാളെ താന് പിടിച്ച് വെച്ചു. പിടികൂടിയയാളെ വിട്ടുകിട്ടാന് പ്രതികള് ബോംബെറിയുകയായിരുന്നു. സംഘത്തില് ഉണ്ടായിരുന്നത് ഡിവൈഎഫ്ഐ നേതാക്കളും പ്രവര്ത്തകരാണെന്നും അക്രമികളെ എല്ലാവരെയും പരിചയമുണ്ടെന്നും മുഹ്സിന് പറഞ്ഞു.
സിപിഎം കേന്ദ്രങ്ങളില് മുസ്ലീം ലീഗ് പ്രവര്ത്തകര് ആളുകളെ ഓപ്പണ് വോട്ട് ചെയ്യിക്കാന് എത്തിച്ചതിനെ സിപിഎം പ്രവര്ത്തകര് ചോദ്യം ചെയ്തതോടെയാണ് സംഘര്ഷം തുടങ്ങിയത്. പിന്നാലെ കടവത്തൂര് ഭാഗത്തെ 150, 149 ബൂത്തുകളില് വലിയ തോതിലുള്ള വാക്കേറ്റവും കയ്യാങ്കളിയും ഉണ്ടായി.
പോളിങിനിടെ തന്നെ മുഹ്സിന് നേരെ ഭീഷണിയുണ്ടായിരുന്നു. 11 പ്രതികളെ തിരിച്ചറിഞ്ഞെന്ന് കണ്ണൂര് സിറ്റി പൊലീസ് കമ്മീഷണര് ആര് ഇളങ്കോ പറഞ്ഞു. ആക്രമണം നടത്തിയത് പത്തിലധികം പേരടങ്ങിയ സംഘമാണ്. കൊലപാതകത്തില് ഗൂഡാലോചനയുണ്ടോ എന്ന് അന്വേഷിക്കണമെന്നും അന്വേഷണത്തിന് പ്രത്യേക സംഘം രൂപീകരിക്കുമെന്നും ആര് ഇളങ്കോ അറിയിച്ചു. സംഘര്ഷവുമായി ബന്ധപ്പെട്ട് ഒരു സിപിഎം പ്രവര്ത്തകനെ പൊലീസ് കസ്റ്റഡിയിലെടുത്തിട്ടുണ്ട്. മന്സൂറിന്റെ അയല്വാസി ഷിനോസിനെയാണ് പൊലീസ് കസ്റ്റഡിയിലെടുത്തത്.
"
https://www.facebook.com/Malayalivartha
