മേപ്പാടിയിൽ കൊവിഡ് ബാധിതന്‍ ആശുപത്രിയില്‍നിന്ന് വീട്ടിലെത്തിയത് 10 കിലോമീറ്ററോളം നടന്ന്. നത്തന്‍കുനി പള്ളിക്കവല സ്വദേശിക്കാണ് ഈ ദുര്യോഗമുണ്ടായത്.കടുത്ത പനിയെ തുടര്‍ന്ന് വെള്ളിയാഴ്ച്ച രാവിലെ മേപ്പാടി കുടുംബാരോഗ്യ കേന്ദ്രത്തില്‍ എത്തിയ ഇയാളെ പരിശോധനയ്ക്ക് വിധേയനാക്കി. ആന്റിജന്‍ പരിശോധനയില്‍ പോസിറ്റിവ് ആണെന്ന് വ്യക്തമായി.

ആംബുലന്‍സ് എത്തുമെന്ന പ്രതീക്ഷയില്‍ രണ്ടുമണിവരെ ആശുപത്രി പരിസരത്തുനിന്നു. എന്നാല്‍ ആംബുലന്‍സ് ലഭിക്കില്ലെന്നു ജീവനക്കാര്‍ അറിയിച്ചു. ട്രിപ്പിള്‍ ലോക്ക്ഡൗണുള്ള മേപ്പാടിയില്‍ മറ്റു വാഹനങ്ങള്‍ ലഭിക്കാതായതോടെ കാല്‍നടയായി വീട്ടിലേക്ക് പോവുക അല്ലാതെ മറ്റുമാര്‍ഗം ഉണ്ടായില്ലെന്ന് ഇദ്ദേഹം പറഞ്ഞു. തനിക്ക് യാത്രാസൗകര്യം ഉണ്ടോ എന്നുപോലും ആശുപത്രി അധികൃതര്‍ തിരക്കിയില്ലെന്നും കൊവിഡ് ബാധിതന്‍ ആരോപിച്ചു.