തന്റെതായ അഭിപ്രായങ്ങൾ എവിടെയും തുറന്നു പറയുന്ന ഒരു വ്യക്തിയാണ് സന്തോഷ് പണ്ഡിറ്റ്. രാഷ്ട്രീയപരമായും കായികപരമായും സാമൂഹികപരവുമായുള്ള എല്ലാ കാഴ്ചപ്പാടുകളും അദ്ദേഹം തന്റെ ഫേസ്ബുക്ക് കുറിപ്പിലൂടെ പങ്കുവയ്ക്കാറുണ്ട്. ഇപ്പോൾ ഇതാ ഒരു വിഷയത്തെ കുറിച്ച് അദ്ദേഹം ഒരു കുറിപ്പ് പങ്കുവെച്ചിരിക്കുകയാണ്. സന്തോഷ് പണ്ഡിറ്റ് ഫെയ്സ്ബുക്കിൽ പങ്കുവെച്ച കുറുപ്പിന്റെ പൂർണ്ണരൂപം ഇങ്ങനെ : പണ്ഡിറ്റിന്റെ ഇന്റർനാഷണൽ നിരീക്ഷണം.

ലോകം മുഴുവൻ ഗോതമ്പു കിട്ടാതെ വിഷമിക്കുകയും , ഇന്ത്യ ഗോതമ്പു കയറ്റുമതി നിറുത്തി വെക്കുകയും ചെയ്തത് അമേരിക്ക അടക്കം പ്രമുഖ രാജ്യങ്ങൾക്കു ഇടയിൽ വലിയ വിമർശനത്തിന് കാരണമായല്ലോ . യുക്രൈൻ യുദ്ധത്തെ തുടർന്നുള്ള സാഹചര്യത്തിൽ , അമേരിക്കയുടെ വിലക്ക് കാരണം റഷ്യയിൽ നിന്നുള്ള ഗോതമ്പ് കയറ്റുമതി നിരവധി രാജ്യങ്ങൾ ഒഴിവാക്കിയല്ലോ . ഉക്രൈൻ മൊത്തം റഷ്യ ആക്രമിച്ചു തകർത്തതോടെ ആ രാജ്യത്തിലെ ഗോതമ്പു ഉത്പാദനവും നിന്നു പോയി . ഇതോടെ യൂറോപ്പ് രാജ്യങ്ങൾ ഗോതമ്പു കിട്ടാതെ വൻ പ്രതിസന്ധിയിൽ ആയി .

ഇന്ത്യയും ചൈനയും കഴിഞ്ഞാൽ ലോകത്ത് ഏറ്റവും കൂടുതൽ ഗോതമ്പ് വിളയിക്കുന്നത് റഷ്യയാണ്. ആ ഗോതമ്പു മൊത്തം കെട്ടി കിടക്കുന്നു . ഗോതമ്പ് ഉൽപ്പാദിപ്പിക്കുന്ന പല രാജ്യങ്ങളിലും ഇത്തവണ ഉൽപ്പാദനം കുറയുകയും ചെയ്തു. കോടിക്കണക്കിന് ആളുകൾ നിലവിൽ പട്ടിണിയിലാവുന്ന സാഹചര്യമാണ് ഉള്ളത് . ഈ ഗുരുതര സാഹചര്യത്തിൽ ഇന്ത്യ കയറ്റുമതി നിർത്തരുതായിരുന്നുവെന്ന് അമേരിക്ക അടക്കം എല്ലാ രാജ്യങ്ങളും വാദിക്കുന്നു.

എന്നാൽ ഇന്ത്യയിൽ ഗോതമ്പ് വില റെക്കോഡിലേക്ക് കുതിക്കുമ്പോൾ ഇതല്ലാതെ കേന്ദ്രത്തിനു മുന്നിൽ മറ്റു വഴികൾ ഇല്ലാതായി എന്നതാണ് സത്യം. കയറ്റുമതി കൂടി ചെയ്‌താൽ ഇന്ത്യയിൽ ഗോതമ്പു വില ഇരട്ടിയായേനെ . പാശ്ചാത്യർ കുറെ എഞ്ചിനീയർ , ഡോക്ടർ , കമ്പ്യൂട്ടർ സ്പെഷ്യലിസ്റ്റ് , വലിയ ബിസിനസുക്കാരേയും സൃഷ്ടിക്കുമ്പോഴും വിശക്കുമ്പോൾ അന്നമായി ഗോതമ്പു കിട്ടണമെങ്കിൽ റഷ്യ , ഉക്രൈൻ , ഇന്ത്യ എന്നിവരെയാണ് ആശ്രയിക്കുന്നത്. നിലവിൽ ഇന്ത്യയിൽ ആവശ്യത്തിന് ഗോതമ്പു ഉണ്ടെങ്കിലും , ഉക്രൈൻ യുദ്ധം മൂന്നു മാസം കഴിഞ്ഞും തുടരുന്ന സാഹചര്യത്തിൽ ഇന്ത്യ റിസ്ക് എടുക്കുന്നില്ല .

ഒടുവിൽ ഇന്ത്യക്കു വേണ്ട ഗോതമ്പു കിട്ടാതായാൽ ഇന്ത്യക്കുള്ളിൽ വൻ പ്രതിസന്ധി ഉണ്ടാകാം എന്നാണു കേന്ദ്ര സർക്കാർ ചിന്തിക്കുന്നത് . സ്വന്തം രാജ്യത്തിലെ ജനങ്ങളുടെ ഭാവിയാണ് ചിന്തിച്ചത് . അതിനാൽ അമേരിക്കയും, യൂറോപ്പും എന്ത് വിമര്ശിച്ചാലും ഇന്ത്യയുടെ ഇപ്പോഴത്തെ നിലപാട് ആണ് നല്ലത് . ഏതായാലും യൂറോപ്യൻ രാജ്യങ്ങൾ വൻ ഗോതമ്പു പ്രതിസന്ധിയിലാണ് .

(വാൽകഷ്ണം .. ശ്രീലങ്കയിൽ ഇന്നത്തോടെ പെട്രോൾ, ഡീസൽ സംഭരിച്ചു വെച്ചത് പൂർണമായും കഴിഞ്ഞു . എത്ര പണം കൊടുത്താലും പെട്രോൾ, ഡീസൽ ശ്രീലങ്കയിൽ എങ്ങും കിട്ടാനില്ല . കടം വാങ്ങി ചില പദ്ധതികൾ ഉണ്ടാക്കിയ നേപ്പാളും , ഫിലിപ്പീൻസും അടക്കം ഭൂരിഭാഗം ലോക രാജ്യങ്ങളും വൻ സാമ്പത്തിക പ്രതിസന്ധിയിലാണ് . ) (മറയില്ലാത്ത വാക്കുകൾ , മായമില്ലാത്ത പ്രവർത്തികൾ , ആയിരം സാംസ്കാരിക നായകന്മാർക്ക് അര പണ്ഡിറ്റ് .. പണ്ഡിറ്റിനെ പോലെ ആരും ഇല്ല ).