ശക്തമായി പെയ്യുന്ന മഴയില്‍ നിന്ന് രക്ഷകാത്ത് നൂറുകണക്കിന് വീടുകള്‍.... മണ്ണുലോബികള്‍ ചുവട് തോണ്ടി കുന്നുകള്‍ ഇടിഞ്ഞ് വീഴുന്നു, നിരവധി വീടുകള്‍ നിലംപൊത്താറായി.

ഈയിടെ പെയ്ത മഴയില്‍ എംസി റോഡരികിലെ ഇരുപത് സെന്റോളം സ്ഥലത്തെ കുന്നുകളാണ് ഇടിഞ്ഞു വീണത്. പരിസരത്തെ വീടുകള്‍ അപകടഭീഷണിയിലാണ്. ഒട്ടേറെ വീടുകള്‍ ഏതു നിമിഷവും നിലം പൊത്താം.

മഴയുടെ കുത്തൊഴുക്കില്‍ കുന്നുകളില്‍ നിന്ന് ഒലിച്ചിറങ്ങിയ മണ്ണ് നിറഞ്ഞ് എംസി റോഡകരികിലെ ഓടകളും നിറഞ്ഞൊഴുകി. ചെറിയൊരു മഴയിലും എംസി റോഡില്‍ വെള്ളക്കെട്ടാണ്. പല മേഖലകളിലും അപകടസാധ്യത ്. പഞ്ചായത്തുകളിലെ എന്‍ജിനീയറിങ് വിഭാഗവും മണ്ണ് ലോബിയും തമ്മിലുള്ള കൂട്ടുകെട്ട് പരിസ്ഥിതിയെ തകിടം മറിച്ചതായാണ് പരാതിയിലുള്ളത്.

തദ്ദേശ സ്ഥാപനങ്ങള്‍ നല്‍കിയ ഡവലപ്‌മെന്റ് പെര്‍മിറ്റിന്റെ അടിസ്ഥാനത്തില്‍ അറുനൂറോളം പാസുകളാണ് സമീപകാലത്ത് ജിയോളജി വകുപ്പ് നല്‍കിയത്. കുന്നിടിച്ച് മണ്ണ് കടത്താനായിരുന്നു മിക്ക പാസുകളുമുള്ളത്. പഞ്ചായത്തുകള്‍ നല്‍കിയ ഡവലപ്‌മെന്റ് പെര്‍മിറ്റിന്റെ അടിസ്ഥാനത്തില്‍ എണ്ണൂറോളം പാസുകള്‍ ഇനിയും നല്‍കാനാണ് ജില്ലാ അധികൃതരുടെ തീരുമാനം.


മൈലത്ത് രണ്ട് കുന്നുകളാണ് സമീപകാലത്ത് ഇടിച്ചു നിരത്തിയത്. ഒട്ടേറെ വീടുകള്‍ അപകട ഭീഷണിയിലാണ്. എംസി റോഡില്‍ കൊട്ടാരക്കര മുതല്‍ നിലമേല്‍ വരെ സഞ്ചരിച്ചാല്‍ തകര്‍ന്നുവീഴാറായ വീടുകളുടെ നേര്‍ചിത്രം കാണാവുന്നതാണ്.

വീട് വയ്ക്കാന്‍ നല്‍കുന്ന പഞ്ചായത്ത് എന്‍ജിനീയറിങ് വിഭാഗം നല്‍കുന്ന ഡവലപ്‌മെന്റ് പെര്‍മിറ്റുകളുടെ വിവരങ്ങള്‍ കഴിഞ്ഞ താലൂക്ക് വികസനസമിതിയില്‍ ജിയോളജിസ്റ്റ് നല്‍കിയിരുന്നു. വീട് വയ്ക്കാന്‍ ആവശ്യമായ സ്ഥലത്ത് നിന്നും നീക്കേണ്ട മണ്ണിന്റെ പത്തിരട്ടിവരെ നീക്കാനാണ് പഞ്ചായത്ത് അധികൃതര്‍ പെര്‍മിറ്റ് നല്‍കുന്നത്.

കൈക്കൂലിയും രാഷ്ട്രീയ സമ്മര്‍ദവും നല്‍കിയാണ് മണ്ണ് ലോബി പെര്‍മിറ്റ് നേടുന്നതെന്നാണ് പരാതിയിലുള്ളത്. പൊലീസ്, റവന്യു, മോട്ടര്‍വാഹന വകുപ്പ് അധികൃതര്‍ക്കും മണ്ണെടുപ്പ് തടയാന്‍ അധികാരം ഉണ്ട്. കര്‍ശനമായ വ്യവസ്ഥകള്‍ ഉണ്ടെങ്കിലും നടപ്പാക്കത്തിനാല്‍ ജനങ്ങള്‍ ഏറെ ദുരിതത്തിലാണ്.