വയനാട്ടുകാരെ തേയ്ക്കുമോ... രാഹുല് വയനാട്ടില് നിന്നും പോകും, മറ്റൊരു സീറ്റില് മത്സരിക്കുമെന്ന പ്രഖ്യാപനം ഉടന് വരുമെന്ന് പ്രധാനമന്ത്രി; ലോക്സഭാ തെരഞ്ഞെടുപ്പിലെ ആദ്യഘട്ടത്തില് മികച്ച പ്രതികരണം, എന്ഡിഎക്ക് അനുകൂലമാകുമെന്ന് പ്രതീക്ഷയെന്ന് പ്രധാനമന്ത്രി
രാഹുല് ഗാന്ധി ഉത്തരേന്ത്യയില് മത്സരിക്കുമോ എന്ന ചോദ്യം ബാക്കിനില്ക്കെ അതിന് ഉത്തരം പ്രധാനമന്ത്രി നരേന്ദ്ര മോദി തന്നെ പറയുന്നു. കോണ്ഗ്രസിന്റെ യുവരാജാവ് വടക്കേ ഇന്ത്യയില് നിന്നും ഓടി തെക്കേ ഇന്ത്യയിലെ വയനാട്ടില് അഭയം പ്രാപിച്ചിരിക്കുകയാണ്. വയനാട്ടിലെ വോട്ടെടുപ്പ് കഴിയാനാണ് അദ്ദേഹം കാത്തിരിക്കുന്നത്. മറ്റൊരു സീറ്റില് അദ്ദേഹം മത്സരിക്കുമെന്ന പ്രഖ്യാപനം ഏപ്രില് ഇരുപത്തിയാറിന് ശേഷം വരും. കോണ്ഗ്രസ് നേരത്തെ തന്നെ പരാജയം സമ്മതിച്ച് കഴിഞ്ഞെന്നും പ്രധാനമന്ത്രി പറഞ്ഞു.
ലോക്സഭാ തെരഞ്ഞെടുപ്പിലെ ആദ്യഘട്ട വോട്ടെടുപ്പില് മികച്ച പ്രതികരണം ഉണ്ടാക്കിയെന്ന് നരേന്ദ്ര മോദി പറഞ്ഞു. എല്ലാ വോട്ടര്മാര്ക്കും നരേന്ദ്രമോദി എക്സിലൂടെ നന്ദി അറിയിച്ചു. എന്ഡിഎക്ക് അനുകൂലമാകും വിധിയെഴുത്ത് എന്നാണ് ആദ്യഘട്ട വോട്ടെടുപ്പ് നല്കുന്ന സൂചനയെന്നും മോദി പ്രതികരിച്ചു.
ലോക്സഭ തെരഞ്ഞെടുപ്പിന്റെ ആദ്യഘട്ടത്തില് പോളിംഗ് 60 ശതമാനം കടന്നു. ഹിന്ദിഹൃദയ ഭൂമിയിലും പശ്ചിമ ബംഗാളടക്കമുള്ള സംസ്ഥാനങ്ങളിലും പോളിഗ് ശതമാനം 60 കടന്നു. തെരഞ്ഞെടുപ്പ് ബഹിഷ്കരണ ആഹ്വാനത്തെ തുടര്ന്ന് മണിപ്പൂരിലെ കുക്കി വോട്ടര്മാര് തെരഞ്ഞെടുപ്പില് നിന്ന് വിട്ടുനിന്നു. മോദിയുടെ ഗ്യാരണ്ടി മണ്ഡലങ്ങളില് ചര്ച്ചയാകുമ്പോള് താഴേ തട്ടിലേക്ക് വികസന പദ്ധതികള് എത്തിയില്ലെന്ന പരാതിയും വോട്ടര്മാര് ഉന്നയിക്കുന്നു.
ആകെ 102 മണ്ഡലങ്ങളിലാണ് തെരഞ്ഞെടുപ്പ് നടന്നത്. 1656 സ്ഥാനാര്ത്ഥികളായിരുന്നു മത്സര രംഗത്ത്. ഒന്നാം ഘട്ടത്തില് നഗര കേന്ദ്രീകൃത മണ്ഡലങ്ങളിലും ഗ്രാമപ്രദേശങ്ങളിലും വോട്ടര്മാരുടെ നല്ല പ്രതികരണം കണ്ടു. ഉത്തര്പ്രദേശ്, രാജസ്ഥാന്, അരുണാചല് പ്രദേശ്, മണിപ്പൂരടക്കമുള്ള മണ്ഡലങ്ങളില് ഉച്ചയോടെ തന്നെ പോളിംഗ് ശതമാനം 50 കടന്നിരുന്നു. പരിശോധന നടപടികള് വൈകിപ്പിച്ച് വോട്ടിംഗ് മന്ദഗതിയിലാക്കുന്നുവെന്ന ആക്ഷേപം യുപിയില് സമാജ് വാദി പാര്ട്ടി ഉന്നയിച്ചെങ്കിലും തെരഞ്ഞെടുപ്പ് കമ്മീഷന് നിഷേധിച്ചു.
സുരക്ഷ വിലയിരുത്തലിനെ തുടര്ന്ന് മണിപ്പൂരിലെ വോട്ടിംഗ് നാല് മണിയോടെ അവസാനിപ്പിച്ചു. വോട്ട് ചെയ്യരുതെന്ന ആഹ്വാനം കുക്കി മേഖലകളില് കഴിഞ്ഞ ദിവസം നേതൃത്വം നല്കിയിരുന്നു. കേന്ദ്രാവിഷ്കൃത പദ്ധതികള് ചര്ച്ചയായ ആദ്യഘട്ട തെരഞ്ഞെടുപ്പില് ഭരണമാറ്റം വേണമെന്ന് അഭിപ്രായം പ്രകടിപ്പിച്ച വോട്ടര്മാരും നിരവധിയായിരുന്നു.
കഴിഞ്ഞ തവണ ആദ്യ ഘട്ട തെരഞ്ഞെടുപ്പില് 51 സീറ്റുകള് നേടിയ എന്ഡിഎക്കായിരുന്നു മേല്ക്കൈ. 48 സീറ്റ് നേടി പ്രതിപക്ഷം പിന്നിലുണ്ടായിരുന്നു. എന്നാല് രാജസ്ഥാന്, പടിഞ്ഞാറന് ഉത്തര്പ്രദേശ്, ബിഹാര് എന്നിവിടങ്ങളില് ഇക്കുറി മാറിയ സാഹചര്യം മുന്കണക്കുകളെ മറികടക്കുമെന്ന പ്രതീക്ഷ ഇന്ത്യ സഖ്യത്തിനുണ്ട്. ആദ്യഘട്ടത്തില് ഈ സംസ്ഥാനങ്ങളിലെ 8 സീറ്റുകളിലെങ്കിലും ഫലം മാറിയേക്കാമെന്ന വിലയിരുത്തലുകളുണ്ട്.
അതേസമയം രാഹുല്ഗാന്ധിയെ വിമര്ശിച്ച് മുഖ്യമന്ത്രിയടക്കം സിപിഎം നേതാക്കള് രംഗത്തെത്തി. താങ്കളുടെ പഴയ പേര് ആവര്ത്തിക്കാന് ഇടവരുത്തരുതെന്ന് പിണറായി വിജയന് പരിസഹിച്ചു. ബിജെപിക്ക് എതിരെ പോരാടുന്ന പിണറായിയെ അറസ്റ്റുചെയ്യാന് പറയുന്ന രാഹുല് എന്തു സന്ദേശമാണ് നല്കുന്നതെന്ന് ബൃന്ദ കാരാട്ട് പറഞ്ഞു. പിണറായി ബിജെപിയുടെ മൗത്ത് പീസെന്ന് പ്രതിപക്ഷ നേതാവ് വി.ഡി.സതീശന് തിരിച്ചടിച്ചു.
കേന്ദ്ര അന്വേഷണ ഏജന്സികള് മുഖ്യമന്ത്രിയെ എന്തുകൊണ്ട് ചോദ്യം ചെയ്യുന്നില്ലെന്ന് ചോദിക്കുന്ന രാഹുല് ഗാന്ധിയോട്, താങ്കളുടെ പഴയ പേര് ആവര്ത്തിക്കാന് ഇടവരുത്തരുതെന്നായിരുന്നു പിണറായിയുടെ മറുപടി. യാത്ര നടത്തിയപ്പോ കുറച്ച് മാറ്റം വന്നെന്നാണ് കരുതിയത്. അന്വേഷണമെന്നും ജയിലെന്നും കേട്ടാല് പേടിച്ചു പോകുന്നവരല്ല താനടക്കമുള്ളവരെന്നും ലാവ്ലിന് കേസ് പരാമര്ശിച്ച് മുഖ്യമന്ത്രി പറഞ്ഞു. ബിജെപിക്ക് എതിരെ പോരാടുന്ന പിണറായി വിജയനെ അറസ്റ്റുചെയ്യാനാണ് രാഹുല് പറയുന്നത്. എന്ത് സന്ദേശമാണ് ഇത് നല്കുന്നതെന്നും ബൃന്ദ കാരാട്ട് ചോദിച്ചു.
"
https://www.facebook.com/Malayalivartha