ജിമ്മില്‍ വര്‍ക്കൗട്ടിന് ശേഷം ഉറങ്ങിപ്പോയ യുവതിയുടെയും തുടര്‍ന്നുണ്ടായ സംഭവത്തിന്റെയും വീഡിയോ സമൂഹമാധ്യമങ്ങളില്‍ വൈറലായിമാറിയിരിക്കുകയാണ്. ദീര്‍ഘ നേരത്തെ വര്‍ക്കൗട്ടിന് ശേഷം റിലാക്‌സ് ചെയ്യാന്‍ കിടന്ന യുവതിയാണ് ഉറങ്ങിപ്പോയത്. യുവതി ഉറങ്ങുമ്പോള്‍ മറ്റുള്ളവര്‍ വര്‍ക്കൗട്ട് ചെയ്യുന്നത് വീഡിയോയില്‍ കാണാം. വീഡിയോയില്‍ യുവതിയെ സഹായിച്ച രണ്ട് പേര്‍ക്ക് സോഷ്യല്‍ മീഡിയ ഉപഭോക്താക്കളുടെ അഭിനന്ദന പ്രവാഹമാണ് വന്നുകൊണ്ടിരിക്കുന്നത്.

ഏത് ജിമ്മില്‍ വച്ച് എപ്പോള്‍ ചിത്രീകരിച്ചതാണ് ദൃശ്യങ്ങളെന്ന് വ്യക്തമല്ലെങ്കിലും വീഡിയോ സമൂഹ മാധ്യമങ്ങളില്‍ വൈറലായി. ഏതാണ്ട് രണ്ട് മണിക്കൂറോളം യുവതി ജിമ്മില്‍ കിടന്നുറങ്ങി. യുവതി ഉറങ്ങിക്കിടക്കുമ്പോഴും സമീപത്ത് മറ്റ് ചിലര്‍ വ്യായാമം ചെയ്യുന്നത് കാണാം. ഇതിനിടെ അതുവഴി പോയ ഒരാള്‍ ഒരു യോഗാ മാറ്റ് കൊണ്ട് വന്ന് യുവതിയെ പുതപ്പിക്കുന്നു. അല്പനേരം കഴിഞ്ഞ് മറ്റൊരാള്‍ വന്ന് യുവതിക്ക് തലയിണയായി ഒരു ബാഗ് വച്ച് കൊടുക്കുന്നതും കാണാം. ഈ സമയമെല്ലാം യുവതി ഗാഢനിദ്രയിലായിരുന്നു. ഏറെ നേരം കഴിഞ്ഞ് യുവതി ഞെട്ടിയുണരുമ്പോള്‍ തന്നെ പുതപ്പിച്ച യോഗ മാറ്റും തലയിണയായി വച്ച ബാഗും കണ്ട് അമ്പരന്ന് ചുറ്റും നോക്കുന്നതും വീഡിയോയില്‍ കാണാം.

യുവാക്കളുടെ ആരോഗ്യകരമായ പ്രവര്‍ത്തി സമൂഹ മാധ്യമ ഉപയോക്താക്കളെ ആകര്‍ഷിച്ചു. നിരവധി പേര്‍ യുവാക്കളെ അഭിനന്ദിച്ച് രംഗത്തെത്തി. അതേസമയം, ജിമ്മില്‍ അമിതമായി വര്‍ക്കൗട്ട് ചെയ്യുന്നത് ആരോഗ്യത്തിന് ദോഷമാണെന്നും ശരീരത്തിന് പരിശീലനം പോലെ വിശ്രമവും ആവശ്യമാണെന്നും നിരവധി പേരാണ് എഴുതിയത്. ആധുനിക ജീവിതം മനുഷ്യന് എന്തുമാത്രം ക്ഷീണം സമ്മാനിക്കുന്നുണ്ടെന്നും അത്തരമൊരു അവസ്ഥയില്‍ ജിമ്മല്ല, എവിടെയായാലും മനുഷ്യന്‍ ഉറങ്ങിപ്പോകുമെന്നും മറ്റ് കുറിച്ചു.