തമിഴ്‌നാട് മോഡല്‍ ക്ഷേമപ്രവര്‍ത്തനങ്ങളുമായി പാവങ്ങളെ കൈയിലെടുത്ത് രാജസ്ഥാന്‍ മുഖ്യമന്ത്രി 
ഇന്ത്യയിലെ വനിതാ മുഖ്യമന്ത്രിമാരില്‍ ശ്രദ്ധേയയായ വസുന്ധര രാജ സിന്ധ്യ ഇപ്പോള്‍ ജയലളിതയുടെ വഴിയേയാണ്. അന്നപൂര്‍ണ രസോയ് യോജന എന്ന പദ്ധതിയിലൂടെ പാവങ്ങള്‍ക്ക് വേണ്ടിയുള്ള ക്ഷേമപ്രവര്‍ത്തനങ്ങള്‍ക്ക് നേതൃത്വം കൊടുക്കുകയാണ് രാജസ്ഥാന്‍ മുഖ്യമന്ത്രി.
എല്ലാവര്‍ക്കും ഭക്ഷണം, എല്ലാവര്‍ക്കും മാന്യത എന്ന മുദ്രാവാക്യവുമായാണ് അന്നപൂര്‍ണ ഭക്ഷണ പദ്ധതി ആരംഭിച്ചിട്ടുള്ളത്. അതനുസരിച്ച് 24 രൂപ വിലയുള്ള ഉച്ചഭക്ഷണം എട്ടുരൂപയ്ക്കും 22 രൂപ വിലയുള്ള പ്രഭാത ഭക്ഷണം അഞ്ചുരൂപയ്ക്കും ലഭിക്കും. തൊഴിലാളികള്‍, റിക്ഷാത്തൊഴിലാളികള്‍, മുതിര്‍ന്ന പൗരന്മാര്‍ തുടങ്ങി സമൂഹത്തിലെ അവശതയനുഭവിക്കുന്ന ജനവിഭാഗങ്ങള്‍ക്കുവേണ്ടിയാണ് ഈ പദ്ധതിക്ക് മുഖ്യമന്ത്രി തുടക്കമിട്ടതെന്ന് ബിജെപി സംസ്ഥാനന പ്രസിഡന്റ് ശ്രീചന്ദ് കൃപാലിനി പറഞ്ഞു.
സംസ്ഥാന തദ്ദേശ സ്വയംഭരണ വകുപ്പിനാണ് പദ്ധതിയുടെ നടത്തിപ്പ് ചുമതല. പരിശീലനം സിദ്ധിച്ച ജീവനക്കാരാണ് ഭക്ഷണം തയ്യാറാക്കുന്നതും വിതരണം ചെയ്യുന്നതും. ജീവനക്കാര്‍ക്ക് പ്രത്യേക യൂണിഫോമുകളും ഗ്ലൗസും തൊപ്പിയും ഏപ്രണുകളുമുണ്ട്. വാനിനുചുറ്റും പ്രത്യേക സീറ്റുകളും തയ്യാറാക്കിയിട്ടുണ്ട്. ജീവന്‍ സംബാല്‍ ട്രസ്റ്റ് മുഖേനയാണ് പദ്ധതിയുടെ നടത്തിപ്പ്. ഭക്ഷണ വിലയില്‍ ജനങ്ങള്‍ ചെലവിടുന്ന തുക കഴിച്ചുള്ള തുക സര്‍ക്കാര്‍ സബ്‌സിഡിയാണ്. ഗുജ്ജാറുകളുടെ സംവരണ സമരവും നോട്ട് പിന്‍വലിക്കലും ഒക്കെച്ചേര്‍ന്ന് സര്‍ക്കാരിനെ പ്രതിസന്ധിയില്‍ നിര്‍ത്തിയവേളയിലാണ് വസുന്ധര ഈ ജനപ്രിയ പരിപാടിയുമായി മുന്നോട്ടുവന്നിട്ടുള്ളത്.
പ്രത്യേക വാനുകളിലാണ് ഭക്ഷണ വിതരണം നടത്തുക. എണ്‍പതുവാനുകളാണ് ഇപ്പോള്‍ ഇതിനായി തയ്യാറാക്കിയിട്ടുള്ളത്. സംസ്ഥാനം മുഴുവന്‍ പതുക്കെ പദ്ധതി വ്യാപിപ്പിക്കാനാണ് നീക്കം. തുടക്കത്തില്‍ 12 ജില്ലാ ആസ്ഥാനങ്ങളിലാണ് അന്നപൂര്‍ണ പദ്ധതി ആരംഭിച്ചിട്ടുള്ളത്. ജയ്പ്പുരില്‍ 25 വാനുകളിലാണ് ഭക്ഷണവിതരണം. ഝലവാറില്‍ ആറും ജോധ്പുര്‍, ഉദയ്പ്പുര്‍, അജ്‌മേര്‍, കോട്ട, ബിക്കാനീര്‍, ഭരത്പുര്‍ എന്നിവിടങ്ങളില്‍ അഞ്ച് വാനുകളുമുണ്ട്. ദുംഗാര്‍പുര്‍, ബന്‍സ്വാര എന്നീ ജില്ലകളില്‍ നാല് വാനുകളും പ്രതാപ്ഗഢ്, ബാരന്‍ എന്നിവിടങ്ങളില്‍ മൂന്നെണ്ണം വീതവും.