മോഡിയുടെ നിര്ദ്ദേശം പ്രാവര്ത്തികമാക്കി ബീഹാര് മുഖ്യമന്ത്രി
സന്ദര്ശനങ്ങള്ക്കിടയില് തന്നെ സ്വീകരിക്കുമ്പോള് പൂച്ചെണ്ടുകള് നല്കി സ്വീകരിക്കരുതെന്ന പ്രധാന മന്ത്രി നരേന്ദ്ര മോഡിയുടെ നിര്ദ്ദേശം ബിഹാര് മുഖ്യമന്ത്രി നിതീഷ് കുമാര് പ്രാവര്ത്തികമാക്കി. എന്നാല് പൂച്ചെണ്ടിനു പകരം ഒരു പൂവെങ്കിലും കൊടുക്കാതിരിക്കാന് നിതീഷിന് കഴിഞ്ഞില്ല. പാട്നയിലെത്തിയ പ്രധാനമന്ത്രിയെ ചുവന്ന റോസാ പൂവ് നല്കിയാണ് ബിഹാര് മുഖ്യന് സ്വീകരിച്ചത്.
നവീകരിച്ച ബിഹാര് മ്യൂസിയം സന്ദര്ശിക്കാന് എത്തിയതായിരുന്നു പ്രധാനമന്ത്രി. മഹാസഖ്യത്തില് നിന്ന് പുറത്തു വന്ന ശേഷം നിതീഷ് എന്.ഡി.എയില് ചേര്ന്നിരുന്നു. ഇതിനുശേഷമുള്ള ഇരുനേതാക്കളുടെയും ആദ്യ കൂടിക്കാഴ്ചയാണിത്. പാട്ന യൂണിവേഴ്സിറ്റിയുടെ നൂറാം വാര്ഷികാഘോഷത്തിലും മോദി പങ്കെടുത്തു.
തന്റെ സന്ദര്ശന വേളകളില് പൂച്ചെണ്ടുകള്ക്കു പകരം പുസ്തകങ്ങളോ അതുമല്ലെങ്കില് ഖാദി കൈലേസുകള്ക്കൊപ്പം ചെറു പുഷ്പമോ നല്കിയാല് മതി എന്ന് പ്രധാന മന്ത്രി നിര്ദ്ദേശിച്ചിരുന്നു. പുസ്തകങ്ങള് നല്കി സ്വീകരിക്കുന്നതാണ് തനിക്ക് ഏറെ സന്തോഷം പകരുന്നതെന്നും മോദി പറഞ്ഞിരുന്നു. തുടര്ന്ന് ഇത് സംബന്ധിച്ച് ആഭ്യന്തര മന്ത്രാലയം ഉത്തരവും പുറപ്പെടുവിച്ചിരുന്നു.
https://www.facebook.com/Malayalivartha
