കുട്ടികളെ കെണിയില് വീഴ്ത്താന് സൈബര് ബുള്ളികള്
സരിതയുടെ വാട്സ്ആപ് പറഞ്ഞു തരുന്ന ചില നല്ല ഗുണപാഠങ്ങളുണ്ട്. സൈബര് ലോകത്തെ ആ ചിലന്തിവലകള്, നമ്മുടെ കുട്ടികള് അറിയുന്നില്ല. ചതിക്കുഴികളും, കെണികളും ഒരുക്കി പുതിയ പൂവാലന്മാര്, ബ്ലാക് മെയിലിംഗ് മാര്ഗങ്ങളിലൂടെ പണം തട്ടുന്ന നെറ്റ്മാഫിയ, ഇന്റര്നെറ്റ് യാത്ര അപകടങ്ങള് നിറഞ്ഞതാണ്.
തെരക്കേറിയ വീഥിയില് കൊച്ചുകുട്ടികളെ വണ്ടി തട്ടാതെ സൂക്ഷിച്ച് ആവുന്നത്ര ജാഗ്രതയോടെ കൊണ്ടു പോകുന്ന മാതാപിതാക്കളെപ്പോലെ നമ്മുടെ കൗമാരക്കാരെയും കുട്ടികളെയും സൂക്ഷിക്കണം. ദൃശ്യം സിനിമ മനസ്സില് നിന്നു മായാതെ നില്ക്കുന്ന കാഴ്ചയാണ്. നിഷ്കളങ്കരായ കുട്ടികളില് ഭയവും ഉത്കണ്ഠയും ഉണ്ടാക്കി അവരെ ആത്മഹത്യയില് എത്തിക്കരുത്.
കുട്ടികള് ചാറ്റിംഗിനിടെ അപ്ലോഡ് ചെയ്തതും, ബുള്ളികള് സേവ് ചെയ്തതുമായ നൂറുക്കണക്കിന് സോഫ്റ്റ് പോണ് വീഡിയോകളാണ് ഇന്ന് നെറ്റിലുള്ളത്.
സൈബര് ബുള്ളികള് എങ്ങനെ ?
നിങ്ങളുടെ ഫേസ്ബുക്ക് പ്രൊഫൈലില്, ചാറ്റ് ബോക്സില് അപരിചിതനായ ബുള്ളിയെത്തുന്നു. ഒരു കുശലാന്വേഷണം. പേരു മറച്ച് നിങ്ങളുടെ സുഹൃത്വലയത്തിലാക്കുന്നു. വളരെ പ്രൊഫഷണലായ മെസേജുകളും ചിത്രങ്ങളുമാണ് അവരുപയോഗിക്കുന്നത്. ക്രമേള വളരെ ശക്തമായ അടുപ്പം സൃഷ്ടിക്കുന്നു. ഇവര് അനുനയത്തില് നിങ്ങളുടെ കുടുംബപ്പേര്, അച്ഛന്റെയുമമ്മയുടെയും വിശദാംശങ്ങള്, നിങ്ങളുടെ ഇഷ്ടാനിഷ്ടങ്ങള് എല്ലാമറിയുന്നു. വളരെയെളുപ്പത്തില് നിങ്ങളുടെ പാസ്വേഡ് മനസ്സിലാക്കുന്നു.
പെട്ടെന്ന് ഒരു ദിവസം നിങ്ങളുടെ ഇ-മെയില് ഹാക്ക് ചെയ്യപ്പെടുന്നു, ബാങ്ക് ക്രെഡിറ്റ് കാര്ഡ് തുടങ്ങി പലതലങ്ങളിലേക്ക് ഈ അപകടം നീളാം. പലപ്പോഴും ബുള്ളികള് ലൈംഗീക ചൂഷഷണങ്ങളാവും മുഖ്യ ലക്ഷ്യമാക്കുക. ദൃശ്യരീതിയില് മാത്രം നിര്വൃതിയടയുന്നവരല്ല മിക്ക ബുള്ളികളും. നിങ്ങളുമായുള്ള ചാറ്റിംഗിനിടയില് കിട്ടുന്ന ക്ലിപ്പുകള് പലപ്പോഴും ബ്ലാക് മെയിലിംഗ് ഉപാധികളാകും. സൈബര് ബുള്ളിംഗിലൂടെ മാനം നഷ്ടപ്പെട്ട, ജീവന് നഷ്ടപ്പെട്ട നിരവധി പേരാണ് നമുക്കു ചുറ്റുമുള്ളത്.
നിര്ദോഷമെന്നു തോന്നുന്ന ഫോട്ടോപോലും പലപ്പോഴും സൈബര്ബുള്ളിംഗ് ഉപാധികളാകാം. അധിക സമയം നെറ്റില് ചെലവഴിക്കുന്നുണ്ട് നിങ്ങളുടെ കുട്ടികളെങ്കില് അവരെ ശ്രദ്ധിക്കണം.
സ്മാര്ട്ട്ഫോണ് അധിഷ്ഠിതമാണ് മിക്ക ഇന്സ്റ്റന്റ് മെസേജിംഗ് ഉപാധികളും. കുട്ടികള് പലപ്പോഴും ഇതിനെ ഒരു കളിയായി എടുക്കാറുണ്ട്. നിങ്ങളുടെ ജീവിതത്തിലെ പല നിമിഷങ്ങളും അടുത്ത സുഹൃത്തുക്കള്ക്ക് അയച്ചുക്കൊടുക്കാറുണ്ട്. ഹോസ്റ്റലുകളിലും മറ്റുമുള്ള സ്വകാര്യനിമിഷങ്ങള് കൂട്ടുകാര് ഒരു ക്ലിക്കിലൊപ്പിയെടുത്ത് കൗതുകത്തിനായി സുഹൃത്തുക്കള്ക്കയക്കാറുമുണ്ടാവാം. എല്ലാ സ്മാര്ട്ട്ഫോണുകളില് നിന്നും ചിത്രങ്ങള് മായ്ച്ചു കളഞ്ഞാലും റീട്രീവ് ചെയ്യാന് കഴിയും എന്ന യാഥാര്ത്ഥ്യം ഓര്ക്കുക.
ഒരു കൗതുകത്തിന് ഭാര്യയുടെ നഗ്നവീഡിയോ മൊബൈലിലാക്കി ഗള്ഫിനുപോയ തിരുവനന്തപുരം കഴക്കൂട്ടം നിവാസിയായ യുവാവ്, പിന്നീട് മൊബൈല് റിപ്പയര് ചെയ്യാന് ഫോണ് കടയിലേല്പ്പിച്ചു. കടക്കാരന് റിട്രീവ് ചെയ്തെടുത്ത ഈ വീഡിയോ അയാളുടെ സുഹൃത്തിനയച്ചുകൊടുക്കുന്നു, ഈ സുഹൃത്ത് മറ്റു പലര്ക്കും. കേന്ദ്രഗവണ്മെന്റ് സ്ഥാപനത്തില് ജോലിചെയ്യുന്ന യുവതി തന്റെ നഗ്നവീഡിയോ നെറ്റിലുണ്ടെന്നറിഞ്ഞ് അന്ധാളിക്കുന്നു. പിന്നീട് സൈബര് സെല് നടത്തിയ അന്വേഷണത്തെത്തുടര്ന്ന് സത്യം വെളിപ്പെട്ടു, തുടര്ന്ന് വിവാഹമോചനവും.
സാധാരണയുള്ള ഏതു സൈറ്റ് തുറന്നാലും ഒരു അഡല്റ്റ് ഡേറ്റിംഗ് സൈറ്റിന്റെ പോപ് അപ് പരസ്യങ്ങള് കാണാറുണ്ട്. അറിയാതെയെങ്കിലും ഒന്നു ക്ലിക്കു ചെയ്താലോ? നമ്മുടെ കുട്ടികളുടെ മനസ്സിടറും - തീര്ച്ച.
സൈബര് ബുള്ളിംഗില് ജീവിതം നശിച്ച അനേകമാളുകളുണ്ട്. അമാന്ഡ ടോഡ് അവരില് ഒരാള് മാത്രം.
അമാന്ഡ ടോഡ് യൂട്യൂബിലിട്ട അവസാന വിഡിയോ അവരുടെ ജീവിതം പറയുന്നു.
ചതിയുടെ - കണ്ണീരിന്റെ - ക്രൂരതയുടെ ഒരു പാഠം.
സ്റ്റണ്ണിംഗ് ബ്യൂട്ടി എന്നു കൂട്ടുകാര്ക്കിടയില് അറിയപ്പെട്ടിരുന്ന അമാന്ഡ ടോഡ് ഏഴാം ക്ലാസില് പഠിക്കുമ്പോഴാണ് വെബ്-ക്യാം ഉപയോഗിച്ചു തുടങ്ങുന്നത്. ഒരിക്കല് കൂട്ടുകാരുടെ നിര്ബന്ധത്തിനു വഴങ്ങി തന്റെ മാറിടത്തിന്റെ ഫോട്ടോ എടുക്കുകയും ചെയ്തിരുന്നു. ഒരു വര്ഷത്തിനുശേഷം അമാന്ഡയുടെ ഫേസ് ബുക്ക് പേജില് അപരിചിതനായ ഒരാളുടെ മെസേജ് വന്നു - അയാള്ക്കായി വെബ്-ക്യാം ഷോ നടത്തിയില്ലെങ്കില് അമാന്ഡയുടെ നഗ്നഫോട്ടോ പുറത്തു വിടുമെന്നായിരുന്നു ഭീഷണി. അമാന്ഡയെ പറ്റിയുള്ള എല്ലാ വിവരങ്ങളും അയാള് ശേഖരിച്ചിരുന്നു. അങ്ങനെ അവള് പോലീസ് കസ്റ്റഡിയിലായി. ആകെ തകര്ന്നു പോയ അവള് മയക്കുമരുന്നിലും മദ്യത്തിലും അഭയം തേടി. വീണ്ടും ഒരു വര്ഷത്തിനുശേഷം അയാള് ഫേസ്ബുക്കില് വീണ്ടും പ്രത്യക്ഷപ്പെട്ടു. അമാന്ഡയുടെ നഗ്നഫോട്ടോയാണ് അയാള് പ്രൊഫൈല് പിക്ചറാക്കിയിട്ടിരുന്നത്. അപ്പോഴേക്കും അമാന്ഡയുടെ ചിത്രം നെറ്റിന്റെ സ്വന്തമായി കഴിഞ്ഞിരുന്നു.
ഇതിനിടെ അമാന്ഡ ഫേസ്ബുക്കിലൂടെ ഒരാളെ പരിചയപ്പെടുകയും മെസേജുകള് കൈമാറുകയും ചെയ്തു. പരിചയം വളര്ന്നപ്പോള് അവന് അമാന്ഡയെ ക്ഷണിക്കുകയും അവള് പോകുകയും ചെയ്തു. കുറച്ചു ദിവസങ്ങള്ക്കുള്ളില് അവള് ചെയ്ത തെറ്റിന്റെ ഭീകരത ബോധ്യപ്പെട്ടു - അമാന്ഡയുടെ സുഹൃത്ത്, തന്റെ ഗേള്ഫ്രണ്ടും കൂട്ടുകാരുമായി വന്ന് അവളെ ശാരീരികമായും മാനസികമായും ഉപദ്രവിച്ചു - ജീവിതം അവസാനിപ്പിക്കാനായി ബ്ലീച്ചെടുത്തു കുടിച്ചെങ്കിലും അവള് രക്ഷപ്പെട്ടു. പിന്നെ, അതിന്റെ പേരിലായി പീഡനം - വീര്യം കൂടിയ ബ്ലീച്ചിന്റെയും ക്ലോറാക്സിന്റെയും പടം ഫേസ്ബുക്കില് അവര് ടാഗ് ചെയ്തു. പുറത്തിറങ്ങാനാകാതെ ജീവിതത്തിലെ പ്രതീക്ഷകള് നഷ്ടപ്പെട്ട അമാന്ഡ ആത്മഹത്യയില് അഭയം തേടി.
സൈബര്ലോകത്തെ അറിവിന്റെ അക്ഷയഖനിയായി കാണാനും ആരോഗ്യകരമായ സൗഹൃദങ്ങള് വളര്ത്തിയെടുക്കാനും നമ്മുടെ കുട്ടികളെ പഠിപ്പിക്കാം.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha