ആദ്യം കുതറി, പിന്നെ കീഴടങ്ങി; അമ്മയാനയും കുട്ടിക്കൊമ്പനും കോന്നിയിലേക്ക്
പേപ്പാറ കുട്ടപ്പാറ ഫോറസ്റ്റ് സ്റ്റേഷനു സമീപം ഇറങ്ങിയ അമ്മയാനയെയും കുട്ടിക്കൊമ്പനെയും മയക്കുവെടി വച്ചു. ഇന്നലെ രാവിലെ ആറോടെയാണ് ആനകളെ തളയ്ക്കാനുള്ള ദൗത്യം ആരംഭിച്ചത്.
കൈതയ്ക്കപ്പരപ്പ്, പറക്കത്തേരി ഭാഗങ്ങളില് കാണ്ട ആനയെയും കുട്ടിയെയും ലോറിയെത്തുന്ന കൊച്ചു കിളിക്കോട് ഭാഗത്തെത്തിച്ചു. അമ്മയ്ക്കു ആദ്യ ഡോസ് മയക്കുവെടി 9.28നും രണ്ടാമത്തേത് ഒരു മണിക്കൂറിനു ശേഷവും നല്കി.
കുട്ടിക്കൊമ്പന് നല്കിയ ആദ്യ ഡോസ് സൂചിയുടെ തകരാറു മൂലം ഫലപ്രദമാകാതിരുന്നതിനെത്തുടര്ന്നു പത്തു മിനിറ്റിനു ശേഷം രണ്ടാമതൊന്നു കൂടി നല്കി. മയക്കു വെടിയേറ്റ അമ്മ പ്രശ്നമുണ്ടാക്കിയില്ലെങ്കിലും വെടികൊണ്ട കുട്ടിക്കൊമ്പന് അല്പ്പ ദൂരം ഓടി ആശങ്ക സൃഷ്ടിച്ചു. തുടര്ന്നു മണി, വിനായകന് എന്നീ താപ്പാനകളുടെ സഹായത്തോടെ പിടിയാനയെ ലോറിയിലേക്കു കയറ്റി. കുട്ടിയാനയെ വനം വകുപ്പ് അധികൃതരാണു ലോറിയിലേക്കു കയറ്റിയത്. ആനകളെ മയക്കി നിര്ത്തിയ പ്രദേശത്തേക്കു മണ്ണുമാന്തി ഉപയോഗിച്ചു വഴിയൊരുക്കിയാണു ലോറി എത്തിച്ചത്. തള്ളയാനയുടെ പരുക്കു ഗുരുതരമല്ലെന്നു ഡോക്ടര്മാര് പറഞ്ഞു. കാലിലും മുതുകിലും ചെറിയ പരുക്കുകളുണ്ട്. പല്ലിനു തേയ്മാനമുണ്ട്. ഇടതു കണ്ണിനു കാഴ്ചക്കുറവുള്ളതിനാല് ആനയുടെ ശരീരത്തിന്റെ ഇടതു ഭാഗത്തായിരുന്നു കൂടുതലും പരുക്കുകള്.ആനകളെയും വഹിച്ചുകൊണ്ടുള്ള രണ്ടു വാഹനങ്ങള് വൈകിട്ട് അഞ്ചോടെ കോന്നി ആന പരിപാലന കേന്ദ്രത്തിലേക്കു പുറപ്പെട്ടു.
ഡോക്ടര്മാരുടെ സംഘം ആനകള്ക്കൊപ്പം കോന്നിയിലേക്കു പുറപ്പെട്ടിട്ടുണ്ട്.വനം വകുപ്പ് വെറ്ററിനറി ഓഫിസര് ഡോ. ശശീന്ദ്ര ദേവ്, വെറ്ററിനറി അസിസ്റ്റന്റ് ഓഫിസര് ഡോ. ഫിജി ഫെര്ഡിനന്റ് ഫ്രാന്സ്, ഡോ. സുനില് കുമാര് എന്നിവരുടെ നേതൃത്വത്തിലായിരുന്നു മയക്കുവെടി. ഡിഎഫ്ഒമാരായ ടി. ഉമ, പ്രദീപ് കുമാര്, തിരുവനന്തപുരം വൈല്ഡ്ലൈഫ് വാര്ഡന് സുനില് സഹദേവന്, ആര്ഒമാരായ ജെ. സതീശന്, എസ്.വി. വിനോദ്, ജെ. സുരേഷ്, ഹാദി എന്നിവര് പ്രവര്ത്തനങ്ങള് ഏകോപിപ്പിച്ചു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha