വിശക്കുന്നവന് ഭക്ഷണവുമായി കൊച്ചിയിലെ സിഖ് സമൂഹം പ്രളയമുഖത്ത്
പ്രളയം നാശം വിതച്ച ദുരന്തമേഖലയിലെ വിശപ്പ് തിരിച്ചറിഞ്ഞ് വടക്കന് കേരളത്തിലെ ദുരിതാശ്വാസ ക്യാമ്പുകളില് ഭക്ഷണവുമായി എത്തിയിരിക്കുകയാണ് കൊച്ചിയിലെ സിഖ് സമൂഹം. ദുരിതാശ്വാസ ക്യാമ്പില് അടുക്കള തുറന്നാണ് തേവര ഗുരുദ്വാര ശ്രീഗുരു സിംഗ് സഭയിലെ അഞ്ചു പേര് അടങ്ങുന്ന ടീം ദുരിതാശ്വാസം എത്തിക്കാനുള്ള ശ്രമങ്ങളില് പങ്കാളിയാവുന്നത്. ചൂടേറിയ പഞ്ചാബി വിഭവങ്ങളാണ്് ഇവര് വിളമ്പുന്നത്.
തേവരയിലെ ഗുരുദ്വാരയില് തയ്യാറാക്കിയ ഭക്ഷണം എറണാകുളത്തെ ദുരിതാശ്വാസ ക്യാമ്പില് നാലു ദിവസത്തോളം വിതരണം ചെയ്തിരുന്നു. അതിനു ശേഷം അവര് വയനാട്ടിലെത്തി. വടക്കന് കേരളത്തിലെ മേപ്പാടി ഗവണ്മെന്റ് ഹയര് സെക്കണ്ടറി സ്കൂളിലെ ക്യാമ്പില് പഞ്ചാബി വിഭവങ്ങളുമായി 1200 പേരെയാണ് ഇവര് തിങ്കളാഴ്ച ഊട്ടിയത്. ചൊവ്വാഴ്ച വയനാട്ടിലെ മറ്റൊരു ക്യാമ്പില് 1,500 പേര്ക്ക് ഭക്ഷണം നല്കാന് കൊച്ചിയില് നിന്നും മറ്റൊരു ടീമും പോയിരുന്നു.
ദിവസങ്ങള്ക്ക് മുമ്പ് ഇവര് ഒരു ട്രക്ക് നിറയെ അവശ്യ വസ്തുക്കളുമായി ട്രക്കില് വയനാടിന് പോയിരുന്നു. എന്നാല് വെള്ളപ്പൊക്കവും മണ്ണിടിച്ചിലും മൂലം യാത്ര പാതി വഴിയില് തടസ്സപ്പെട്ടു. ട്രക്കുമായി തിരിച്ചു പോന്നെങ്കിലും ബസില് വയനാട്ടില് എത്തുകയും അധികൃതരുടെ സഹായത്തോടെ ഭക്ഷണം ഉണ്ടാക്കി നല്കുകയുമായിരുന്നു. ചോറും, പരിപ്പും, ചപ്പാത്തിയും പച്ചക്കറിയുമാണ് കൂടുതലും വിതരണം ചെയ്തത്. മൂന്ന് ദിവസം കൊണ്ട് എറണാകുളത്തും വയനാട്ടിലുമായി 3000 പേര്ക്കായിരുന്നു ഭക്ഷണമൊരുക്കി നല്കിയത്.
തലേ ദിവസം തന്നെ വോളണ്ടിയര്മാരില് നിന്നും ക്യാമ്പ് ഓഫീസര്മാരില് നിന്നും നിര്ദേശങ്ങള് സ്വീകരിക്കും. അതനുസരിച്ചാണ് പിറ്റേ ദിവസത്തേക്ക് ഭക്ഷണം തയ്യാറാക്കുന്നത്. കഴിഞ്ഞ പ്രളയ കാലത്ത് കുട്ടനാട് ഉള്പ്പെടെ കേരളത്തില് അനേകം പ്രളയ ദുരിതാശ്വാസ പദ്ധതികളില് സഹായവുമായി എത്തിയ പാട്യാലയിലെ സിഖ് എന്ജിഒ ആയ ഖല്സാ ആയിരുന്നു ഇതിന് സഹായങ്ങളും പണവും നല്കിയത്.
പ്രകൃതിദൃരന്തത്തിനിരയായവരെ സഹായിക്കാന് എന്തെങ്കിലും ചെയ്യണമെന്ന മോഹമാണ് ഇവരെ ഇക്കാര്യത്തിന് പ്രേരിപ്പിച്ചതെന്ന് ടീം ലീഡര് അന്മോല് സിംഗ് പറയുന്നു. ദൗര്ഭാഗ്യത്തെ പങ്കുവെയ്ക്കാന് പന്തിഭോജനം ചെയ്യുക എന്ന ഗുരുനാനാക്കിന്റെ തത്വമാണ് തങ്ങള് അനുസരിച്ചതെന്നും വീടും സമ്പാദ്യവും നഷ്ടമായ അനേകര്ക്കൊപ്പം ഒരു കുടുംബത്തെ പോലെ ക്യാമ്പില് കഴിയാന് സാധിച്ചത് വലിയ കാര്യമായിട്ടാണ് സിഖ് സമൂഹം വിലയിരുത്തുന്നതെന്നും അവര് പറഞ്ഞു. ദുരിതാശ്വാസ ക്യാമ്പുകള് അടച്ചു കഴിഞ്ഞാല് വിവിധ ടീമായി ശുചീകരണ പ്രവര്ത്തനങ്ങളില് പങ്കാളികളാകാനും ഇവര്ക്ക് പദ്ധതിയുണ്ട്.
https://www.facebook.com/Malayalivartha
