രാജ്യത്തെ ഏറ്റവും മുതിര്ന്ന ബിഷപ്പ് ഡോ. ഫിലിപ്പോസ് മാര് ക്രിസോസ്റ്റം വലിയ മെത്രാപ്പൊലീത്തയ്ക്ക് 102 വയസ്സ്
കുമ്പനാട് വട്ടക്കോട്ടാല് അടങ്ങപ്പുറത്ത് കലമണ്ണില് കെ.ഇ. ഉമ്മന് കശീശയുടെയും ശോശാമ്മയുടെയും മകനായി ജനിച്ച മാര് ക്രിസോസ്റ്റം, ഇപ്പോള് രാജ്യത്തെ ഏറ്റവും മുതിര്ന്ന ബിഷപ്പായി. ഡോ. ഫിലിപ്പോസ് മാര് ക്രിസോസ്റ്റം വലിയ മെത്രാപ്പൊലീത്തയ്ക്ക് നാളെ 102 വയസ്സ് പൂര്ത്തിയാകുന്നു.1918 ഏപ്രില് 27-നായിരുന്നു ജനനം. 1953 മേയ് 23-നാണ് മാര്ത്തോമാ സഭയില് എപ്പിസ്കോപ്പ ആയി അഭിഷിക്തനായത്.
2007 ഒക്ടോബര് ഒന്നിന് ഭരണച്ചുമതല ഒഴിഞ്ഞ അദ്ദേഹം കുമ്പനാട് ഫെലോഷിപ് മിഷന് ആശുപത്രിയില് വിശ്രമജീവിതത്തിലാണ്. 1978 മേയില് സഫ്രഗന് മെത്രാപ്പൊലീത്തയും 1999 ഒക്ടോബര് 23-ന് സഭയുടെ പരമാധ്യക്ഷനായ മാര്ത്തോമാ മെത്രാപ്പോലീത്തയുമായി. കൊല്ലവര്ഷം 99-ലെയും (എഡി 1924) 2018 -ലെയും മഹാപ്രളയം അനുഭവിച്ചറിഞ്ഞ മാര് ക്രിസോസ്റ്റം വലിയ മെത്രാപ്പൊലീത്ത മഹാമാരിയായ കോവിഡ് ലോകത്ത് ആഞ്ഞടിക്കുമ്പോള് മനസ്സ് തുറക്കുന്നു:
1924-ലെ വെള്ളപ്പൊക്കത്തേക്കാള് ഭയാനകമായിരുന്നു 2018-ലേത്. ഇക്കുറി പ്രളയം ഉണ്ടായപ്പോള് മനുഷ്യത്വം തിരിച്ചുവന്നു. മാസങ്ങള് കഴിഞ്ഞപ്പോള് എല്ലാം പഴയപടിയായെന്നു മാത്രം. 99-ലെ വെള്ളപ്പൊക്കകാലം. ''ദുരിതാശ്വാസ ക്യാംപുകള് ഒന്നുമില്ല. വെള്ളം കയറാത്ത പള്ളിക്കൂടങ്ങളിലോ ക്ഷേത്ര വളപ്പിലോ പള്ളിക്കെട്ടിടങ്ങളിലോ എല്ലാവരും ഒത്തു ചേരും. എല്ലാവരും കൂടി ഭക്ഷണം ഉണ്ടാക്കും. അന്ന് ബുദ്ധിമുട്ടുകള് ഉണ്ടായിരുന്നുവെങ്കിലും എല്ലാ കാര്യത്തിലും ഒരു കൂട്ടായ്മ ഉണ്ടായിരുന്നു. .''
ഇന്ന് ലോകം വലിയ മഹാമാരിയെ നേരിടുന്നു. വൈദ്യശാസ്ത്രം പകച്ചുനില്ക്കുമ്പോള് ദൈവം മാത്രമാണ് ആശ്രയം. കോവിഡ് വ്യാപിക്കുമ്പോള് എറ്റവും ദുഃഖിക്കുന്നത് വിദേശ മലയാളികളാണ്. ഏഴു പതിറ്റാണ്ടിലേറെയായി മലയാളി സമൂഹം ഗള്ഫില് കഷ്ടപ്പെടുന്നുണ്ട്. അവരുടെ പണമാണ് ഈ നാടിന്റെ അഭിവൃദ്ധിക്ക് പ്രധാന കാരണം. പ്രവാസികള്ക്ക് എന്തെങ്കിലും പ്രയാസമുണ്ടാകുമ്പോള് അവരോടോപ്പം നില്ക്കേണ്ടതു നമ്മുടെ കടമയാണ്.
എന്റെ ആദ്യത്തെ വിമാനയാത്ര കുവൈത്തിലേക്കായിരുന്നു, 1952-ല്. അവിടത്തെ മാര്ത്തോമ്മാ വിശ്വാസികള് എന്നെ ഹാശാശുശ്രൂഷയ്ക്കാണ് ക്ഷണിച്ചത്. ഞാന് കണ്ട ഗള്ഫ് എറെ ചിന്തിപ്പിക്കുന്നതായിരുന്നു. നമ്മുടെ സഹോദരങ്ങള് എത്ര കഷ്ടപ്പെട്ടാണ് ജീവിക്കുന്നതും പണം സമ്പാദിക്കുന്നതും.
സ്നേഹിതരുടെയും സഹായികളുടെയും കരുതലാണ് ആയുസ്സ് നീളാന് കാരണം. ദൈവം തന്നതാണ് ആയുസ്സ്. ഇനി എത്രകാലം ജീവിക്കുമെന്ന ചോദ്യത്തിന് ഉത്തരമില്ല. ജീവിക്കുന്നതിന് താല്പര്യക്കുറവൊന്നുമില്ല, എന്നാല് വിട്ടുപോകാന് മടിയുമില്ല.
https://www.facebook.com/Malayalivartha