എന്‍എച്ച്എസിന്റെ ഹെല്‍ത്ത് സര്‍വീസ് ഉപയോഗപ്പെടുത്തുന്നതിനു നഴ്‌സുമാര്‍ക്കും ഡോക്ടര്‍മാര്‍ക്കും ഏര്‍പ്പെടുത്തിയിട്ടുള്ള സര്‍ചാര്‍ജ് റിവ്യൂ ചെയ്യുമെന്ന് ഹോം സെക്രട്ടറി പ്രീതി പട്ടേല്‍. യൂറോപ്യന്‍ യൂണിയനു പുറത്തുനിന്നും വര്‍ക്ക് പെര്‍മിറ്റില്‍ എത്തിയിട്ടുള്ള ഡോക്ടര്‍മാരും നഴ്‌സുമാരുമാണ് നിലവില്‍ വര്‍ഷം തോറും 400 പൗണ്ട് ഹെല്‍ത്ത് സര്‍ചാര്‍ജ് നല്‍കുന്നത്. ബ്രിട്ടനില്‍ മൈഗ്രന്റ് നഴ്‌സുമാര്‍ക്കും ഡോക്ടര്‍മാര്‍ക്കുമുള്ള ഹെല്‍ത്ത് സര്‍ചാര്‍ജ് പുനഃപരിശോധിക്കാനുള്ള സര്‍ക്കാര്‍ തീരുമാനം തുണയാകുക പുതുതായി വര്‍ക്ക് പെര്‍മിറ്റ് വീസയില്‍ എത്തിയ ആയിരക്കണക്കിന് മലയാളികള്‍ക്കായിരിക്കും. ഫ്രണ്ട് ലൈന്‍ സ്റ്റാഫിന് അനുയോജ്യമായ ജോലി സാഹചര്യങ്ങള്‍ ഒരുക്കുന്നതിന്റെ ഭാഗമായാണു നടപടി.

ഹെല്‍ത്ത് സര്‍ചാര്‍ജ് അടുത്ത ഒക്ടോബര്‍ മുതല്‍ 624 പൗണ്ടായി ഉയര്‍ത്തുമെന്ന് കഴിഞ്ഞ ബജറ്റില്‍ പ്രഖ്യാപനവും വന്നിരുന്നു. ഇതാണ് ഇപ്പോള്‍ റിവ്യൂ ചെയ്യുമെന്ന് പ്രീതി പട്ടേല്‍ അറിയിച്ചത്. നാലംഗങ്ങളുള്ള ഒരു നഴ്‌സിന്റെ കുടുംബത്തിന് നിലവിലെ നിരക്കനുസരിച്ച് വര്‍ഷം 1600 പൗണ്ടും പുതുക്കിയ നിരക്കനുസരിച്ച് ഒക്ടോബര്‍ മുതല്‍ 2500 പൗണ്ടുമാണ് സര്‍ചാര്‍ജ് നല്‍കേണ്ടത്. ഇത് ഒഴിവാക്കുന്നത് പുതുതായി വര്‍ക്ക് പെര്‍മിറ്റില്‍ എത്തിയിട്ടുള്ള മലയാളി നഴ്‌സുമാര്‍ക്ക് വന്‍ ആശ്വാസമാകും.

പരമാവധി 25,000 പൗണ്ടുവരെ മാത്രം ശമ്പളം ലഭിക്കുന്ന, വര്‍ക്ക് പെര്‍മിറ്റിലുള്ള നഴ്‌സുമാരില്‍നിന്ന് ഇത്തരത്തില്‍ വലിയ തുക സര്‍ചാര്‍ജായി ഈടാക്കുന്നതിനെതിരെ റോയല്‍ കോളജ് ഓഫ് നഴ്‌സിങ്ങും ബ്രിട്ടിഷ് മെഡിക്കല്‍ അസോസിയേഷനും ഉള്‍പ്പെടെയുള്ള സംഘടനകള്‍ പ്രതിഷേധമുയര്‍ത്തിയിരുന്നു. ഇതൊന്നും ഗൗനിക്കാതിരുന്ന സര്‍ക്കാരാണ് കൊറോണയുടെ പശ്ചാത്തലത്തില്‍ പ്രത്യുപകാരമെന്നവണ്ണം ഇത്തരമൊരു ആനുകൂല്യം നല്‍കുന്നതിനെക്കുറിച്ച് ചിന്തിക്കുന്നത്.

ഒക്ടോബര്‍/2020-ന് മുമ്പ് വീസ അവസാനിക്കുന്ന എന്‍എച്ച്എസ് സ്റ്റാഫിനും കുടുംബാംഗങ്ങള്‍ക്കും ഒരുവര്‍ഷത്തേക്കു സൗജന്യമായി വീസ കാലാവധി നീട്ടിനല്‍കുമെന്നു സര്‍ക്കാര്‍ നേരത്തെ പ്രഖ്യാപിച്ചിരുന്നു. ഇതിനു പുറമേയാണ് ഇപ്പോള്‍ ഹെല്‍ത്ത് സര്‍ചാര്‍ജും റിവ്യൂ ചെയ്യുമെന്ന പ്രഖ്യാപനം. നിശ്ചിത കാലയളവിലേക്കുള്ള വീസയില്‍ എത്തുന്ന ഡോക്ടര്‍മാരും നഴ്‌സുമാരും അവരുടെ ഡിപ്പന്‍ഡന്റുമാരും വലിയൊരു തുക സര്‍ചാര്‍ജ് മുന്‍കൂട്ടി അടയ്‌ക്കേണ്ട സ്ഥിതിയാണു നിലവിലുള്ളത്. വീസ കാലാവധി പൂര്‍ത്തിയാകുന്നതുവരെയുള്ള തുകയാണ് ഇത്തരത്തില്‍ മുന്‍കൂറായി വീസ അപേക്ഷയോടൊപ്പം വാങ്ങുന്നത്.

ബ്രിട്ടനില്‍ നിലവില്‍ 1,53,000 നോണ്‍ യൂറോപ്യന്‍ മൈഗ്രന്‍സാണ് ഇത്തരത്തില്‍ സര്‍ചാര്‍ജ് നല്‍കി ജീവിക്കുന്നത്. ഇതില്‍ മഹാഭൂരിപക്ഷവും ആരോഗ്യമേഖലയില്‍ പണിയെടുക്കുന്ന ഡോക്ടര്‍മാരും നഴ്‌സുമാരുമാണ്. 2015-ലാണ് ഡോക്ടര്‍മാര്‍, നഴ്‌സുമാര്‍ തുടങ്ങിയ ആരോഗ്യ പ്രവര്‍ത്തകര്‍ക്കും അവരുടെ ഡിപ്പന്‍ഡന്റുമാര്‍ക്കും 400 പൗണ്ട് വീതം സര്‍ചാര്‍ജ് നിശ്ചയിച്ചത്. സ്റ്റുഡന്റ് വീസയിലും യൂത്ത് മൊബിലിറ്റി സ്‌കീം വിസയില്‍ എത്തുന്നവര്‍ക്കും 300 പൗണ്ടും നിശ്ചയിച്ചു. നാഷനല്‍ ഇന്‍ഷുറന്‍സ് ഉള്‍പ്പെടെയുള്ള ഇന്‍കം ടാക്‌സിന് പുറമേയാണ് ഇവരില്‍നിന്നും ഈ തുക അഡ്വാന്‍സായി ഈടാക്കുന്നത്.

2018ല്‍ ഇമിഗ്രേഷന്‍ ഹെല്‍ത്ത് ചാര്‍ജ് അമന്‍ഡ്‌മെന്‍ഡ് ഉത്തരവിലൂടെ ഇതു വീണ്ടും പരിഷ്‌കരിച്ചു. മാര്‍ച്ച് 11-ന് ചാന്‍സലര്‍ ഋഷി സുനാക് അവതരിപ്പിച്ച ബജറ്റിലാണ് ഇത് വീണ്ടും ഉയര്‍ത്തി ഒക്ടോബര്‍ മുതല്‍ 624 പൗണ്ടാക്കാന്‍ തീരുമാനിച്ചത്. ഈ കടുംവെട്ട് ചാര്‍ജാണ് ഇപ്പോള്‍ കൊറോണയുടെ പശ്ചാത്തലത്തില്‍ റിവ്യൂ ചെയ്യുമെന്ന് പ്രഖ്യാപിച്ചിരിക്കുന്നത്. സര്‍ചാര്‍ജ് റദ്ദാക്കുകയോ പഴയ നിരക്കിലേക്ക് കുറയ്ക്കുകയോ ചെയ്താല്‍ പോലും മലയാളികളായ ആയിരക്കണക്കിനു പേര്‍ക്ക് വലിയൊരു തുക ലാഭിക്കാന്‍ വഴിയൊരുക്കുമെന്നാണു വിലയിരുത്തല്‍.