അശ്വതി അന്ന് മറ്റുള്ളവര്ക്കായി കോവിഡിനോട് പൊരുതി; ഇന്ന് സ്വയം പൊരുതി തോല്പിച്ചു!
യുപിയില് നഴ്സായിരുന്ന അശ്വതി സതീഷ് കോവിഡ് പോസിറ്റീവ് ആയവരെ പരിചരിച്ചും ധൈര്യം പകര്ന്നും പ്രതിരോധ പ്രവര്ത്തനത്തില് സജീവമായിരുന്നു. നാട്ടില് തിരിച്ചെത്തിയപ്പോള് തനിക്കും കോവിഡ് ബാധിച്ചെന്നറിഞ്ഞപ്പോള് ആദ്യമൊന്ന് ഞെട്ടി. പിന്നെ എന്തും വരട്ടെയെന്ന ധൈര്യത്തോടെ കോവിഡിനോടു പൊരുതി. 10 ദിവസത്തിനുള്ളില് വിജയവും നേടി.
യുപിയിലെ മഥുരയിലുള്ള സ്വകാര്യ ആശുപത്രിയിലെ സ്റ്റാഫ് നഴ്സായിരുന്ന തെങ്ങമം കളീക്കല് വീട്ടില് അശ്വതി സതീഷിനാണ് നാട്ടിലെത്തിയപ്പോള് കോവിഡ് സ്ഥിരീകരിച്ചത്. ഒരു വര്ഷം മുന്പാണ് മധുരയിലെ സ്വകാര്യ ആശുപത്രിയില് ജോലിയില് പ്രവേശിച്ചത്. മാര്ച്ച് പകുതിയോടെ ചികിത്സയ്ക്കെത്തിയ 4-5 പേര്ക്ക് കോവിഡ് സ്ഥിരീകരിച്ചു. പിന്നീട് എണ്ണം കൂടി.
രോഗികളുടെ എണ്ണം 3 മാസത്തിനിടെ നൂറിലേറെയെത്തി. രോഗികള് കൂടിയിട്ടും ഭയമൊന്നും കൂടാതെ 3 ഷിഫ്റ്റുകളിലായി മാറി മാറി കോവിഡ് ബാധിതരുടെ പരിചരണം ഏറ്റെടുത്തു. 3 മാസത്തിനിടെ 70% പേരെയും കോവിഡ് മുക്തരാക്കി വിട്ടതായും 5 പേര് മരിച്ചതായും അശ്വതി പറഞ്ഞു.
ഈ ആശുപത്രിയില്നിന്ന് കൃത്യമായി ശമ്പളം കിട്ടാത്തതിനാലും വിദേശത്തേക്ക് ജോലിക്ക് ഓഫര് വന്നതിനാലും ജോലി രാജിവച്ച് കഴിഞ്ഞ 14-ാം തീയതി നാട്ടില് തിരിച്ചെത്തി വീട്ടില് നിരീക്ഷണത്തിലായി.
കോവിഡ് പരിശോധനയ്ക്ക് വിധേയായപ്പോള് 18-ാം തീയതി സ്ഥിരീകരിച്ചതോടെ കോഴഞ്ചേരിയിലെ ജില്ലാ ആശുപത്രിയില് പ്രവേശിപ്പിച്ചു. 28-ാം തീയതി കോവിഡ് മുക്തയായി വീട്ടിലെത്തി. സൗദിയിലായിരുന്ന ഭര്ത്താവും നാലു ദിവസം മുന്പ് വീട്ടിലെത്തി മറ്റൊരു മുറിയില് നിരീക്ഷണത്തിലാണ്. ഏക മകന് ഭര്തൃസഹോദരിയുടെ വീട്ടിലാണ്.
https://www.facebook.com/Malayalivartha