റഷ്യന്‍ പ്രസിഡന്റ് വ്‌ളാഡിമിര്‍ പുടിനുമായി ചര്‍ച്ചയ്ക്ക് തയ്യാറാണെന്ന് ഉക്രേനിയന്‍ പ്രസിഡന്റ് വോളോഡിമര്‍ സെലെന്‍സ്‌കി, എന്നാല്‍ ഈ ചര്‍ച്ച പരാജയപ്പെട്ടാല്‍, ഇരു രാജ്യങ്ങളും തമ്മിലുള്ള പോരാട്ടം 'മൂന്നാം ലോക മഹായുദ്ധത്തിന്' കാരണമാകുമെന്നും സലന്‍സ്‌കി മുന്നറിയിപ്പ് നല്‍കി.

'ഞാന്‍ അദ്ദേഹവുമായി ചര്‍ച്ചകള്‍ക്ക് തയ്യാറാണ്. കഴിഞ്ഞ രണ്ട് വര്‍ഷമായി ഞാന്‍ തയ്യാറായിരുന്നു. ചര്‍ച്ചകളില്ലാതെ നമുക്ക് ഈ യുദ്ധം അവസാനിപ്പിക്കാന്‍ കഴിയില്ലെന്നാണ് ഞാന്‍ കരുതുന്നതെന്നാണ് സെലന്‍സ്‌കി പറഞ്ഞത്, 'ഈ യുദ്ധം നിര്‍ത്താന്‍ ഞങ്ങള്‍ക്ക് 1% അവസരമുണ്ടെങ്കില്‍, ഞങ്ങള്‍ ഈ അവസരം ഉപയോഗിക്കും. ഈ ചര്‍ച്ചകളുടെ ഫലം യുദ്ധത്തിന്റെ അവസാനമായിരിക്കണം. ഞങ്ങള്‍ക്ക് ഓരോ ദിവസം കഴിയും തോറും ആളുകളെ നഷ്ടപ്പെടുന്നു, അതും നിരപരാധികളായ ആളുകള്‍,' എന്നാണ് അദ്ദേഹം പറഞ്ഞത്

'റഷ്യന്‍ സൈന്യം ഞങ്ങളെ ഉന്മൂലനം ചെയ്യാനും കൊല്ലാനുമായാണ് ഇവിടെ എത്തിയത്. എന്നാല്‍ ശക്തമായ പ്രഹരം ഏല്‍പ്പിക്കാന്‍ കഴിയുന്ന ഒരു സൈന്യം ഞങ്ങള്‍ക്കുണ്ടായിരുന്നു. എങ്കിലും മാന്യത കൈവെടിഞ്ഞ് ഞങ്ങള്‍ ഒന്നുതന്നെ ച്യ്തില്ല, ഞങ്ങള്‍ക്കും തിരിച്ചടിക്കാന്‍ കഴിയുമെന്ന് ഞങ്ങള്‍ തെളിയിച്ചു. പക്ഷേ, നിര്‍ഭാഗ്യവശാല്‍, ഈ യുദ്ധം തുടര്‍ന്നാല്‍ ഇനിയും ജീവനുകള്‍ നഷ്ടമാകും. അതിനാല്‍, പുടിനുമായി ചര്‍ച്ച ചെയ്യാനുള്ള ഏത് അവസരവും ഞങ്ങള്‍ ഉപയോഗിക്കും. എന്നാല്‍ ഈ ശ്രമങ്ങള്‍ പരാജയപ്പെട്ടാല്‍, ഇത് മൂന്നാം ലോക മഹായുദ്ധമാണെന്നാണ് അര്‍ത്ഥമെന്നും സെലന്‍സ്‌കി പറഞ്ഞു.

അതേസമയം യുക്രെയ്ന്‍ യുദ്ധം തുടങ്ങുന്നതിനു മുന്നോടിയായി റഷ്യന്‍ പ്രസിഡന്റ് വ്‌ലാദിമിര്‍ പുട്ടിന്‍ തന്റെ കുടുംബാംഗങ്ങളെ സൈബീരിയയില്‍ പണിത അതിസുരക്ഷാ, അത്യാധുനിക ബങ്കറില്‍ ഒളിപ്പിച്ചെന്ന് റഷ്യന്‍ പ്രഫസറും രാഷ്ട്രീയ പഠന വിദഗ്ധനുമായ വലേറി സോളോവി. ഹര്‍കീവില്‍ റഷ്യ കനത്ത ആക്രമണം നടത്തിക്കൊണ്ടിരിക്കുന്നതിനിടെയാണു വലേറിയുടെ ആരോപണം. സൈബീരിയയിലെ ആള്‍ട്ടായ് പര്‍വതനിരയിലാണ് പുട്ടിന്റെ കുടുംബമുള്ള ബങ്കര്‍ സ്ഥിതി ചെയ്യുന്നതെന്നും വലേറി പറഞ്ഞിട്ടുണ്ട്.

ആണവ ബോംബുകള്‍ വീണാല്‍ പോലും തകരാത്തത്ര കരുത്തുറ്റതാണ് ഈ ബങ്കറുകളത്രേ. മോസ്‌കോ സ്റ്റേറ്റ് ഇന്‍സ്റ്റിറ്റ്യൂട്ട് ഓഫ് ഇന്റര്‍നാഷനല്‍ റിലേഷന്‍സിലെ മുന്‍ പ്രഫസറാണു വലേറി. തന്റെ അധ്യാപക കരിയറിന്റെ ഭാഗമായി റഷ്യയിലെ പ്രമുഖ ചാര, ഇന്റലിജന്‍സ് ഉദ്യോഗസ്ഥരുമായി തനിക്കു ബന്ധമുണ്ടെന്നും അവരില്‍ നിന്നാണു താന്‍ ഈ വിവരങ്ങള്‍ അറിയുന്നതെന്നും അദ്ദേഹം നേരത്തെ പറഞ്ഞിട്ടുണ്ട്.

പുട്ടിനു ഗുരുതരമായ രോഗങ്ങളുണ്ടെന്നും അദ്ദേഹം പ്രതിരോധമന്ത്രി സെര്‍ജി ഷൂഗുവിനൊപ്പം ആഭിചാര കര്‍മങ്ങളില്‍ ഏര്‍പ്പെടാറുണ്ടെന്നും പറഞ്ഞ് വലേറി നേരത്തെ ശ്രദ്ധേയനായിരുന്നു. ഇത്തരമൊരു കര്‍മത്തിനിടയില്‍ ഒരു കറുത്ത ചെന്നായയെ ബലി നല്‍കിയെന്നും അദ്ദേഹം ആരോപിച്ചിരുന്നു. പുട്ടിന്‍ ഭരണത്തെക്കുറിച്ച് ദുരൂഹതാസിദ്ധാന്തങ്ങളിറക്കുന്നയാളായിട്ടാണു വലേറിയെ കരുതിപ്പോരുന്നത്. പുട്ടിന്റെ ആരോഗ്യത്തെക്കുറിച്ചു കഥകള്‍ മെന!ഞ്ഞെന്നു പറഞ്ഞ് റഷ്യന്‍ ഇന്റലിജന്‍സ് ഏഴു മണിക്കൂറോളം ഇദ്ദേഹത്തെ നേരത്തെ ചോദ്യം ചെയ്തിരുന്നു.

വെറുമൊരു ബങ്കറിലല്ല പുട്ടിന്റെ കുടുംബമുള്ളതെന്നും മറിച്ച് എല്ലാ സൗകര്യങ്ങളുമുള്ള ഒരു ഭൂഗര്‍ഭ പട്ടണമാണിതെന്നും വലേറി പറയുന്നു. പുട്ടിന്റെ കുടുംബാംഗങ്ങളില്‍ ആരെല്ലാമാണു ബങ്കറിലുള്ളതെന്ന ചോദ്യത്തിനു വലേറി പക്ഷേ മൗനം പാലിച്ചു. വിവാഹമോചിതനായ പുട്ടിന്‍ നിലവില്‍ മറ്റൊരു വിവാഹം കഴിച്ചിട്ടില്ല. എന്നാല്‍ റഷ്യയിലെ മുന്‍ ജിംനാസ്റ്റും രാഷ്ട്രീയപ്രവര്‍ത്തകയുമായ അലീന കബേവ അദ്ദേഹത്തിന്റെ കാമുകിയാണെന്നാണു പരക്കെയുള്ള അഭ്യൂഹം. ഈ ബന്ധത്തില്‍ ഒരു കുട്ടിയുമുണ്ടെന്ന് പറച്ചിലുകളുണ്ട്.

ജനിതകശാസ്ത്രജ്ഞയായ ഡോ. മരിയ വോറന്റ്‌സോവ, നര്‍ത്തകിയും ഗണിത ശാസ്ത്രജ്ഞയുമായ കാറ്ററീന എന്നീ മുതിര്‍ന്ന രണ്ട് പെണ്‍മക്കള്‍ പുടിന് ആദ്യഭാര്യയിലുണ്ട്. സ്വെറ്റ്‌ലാന ക്രിവോനോഗിക് എന്ന റഷ്യന്‍ യുവതിയില്‍ പതിനെട്ടു വയസ്സുള്ള ഒരു മകളും പുട്ടിനുണ്ടെന്നു പറയപ്പെടുന്നു. ഇക്കാര്യങ്ങള്‍ക്കൊന്നും പുട്ടിന്‍ ചെവികൊടുക്കാറില്ല. തന്റെ സ്വകാര്യ ജീവിതം ഏറ്റവും സ്വകാര്യമായി തന്നെ വയ്ക്കാനാണ് അദ്ദേഹത്തിന് ഇഷ്ടം.

മംഗോളിയ, കാനഡ,കസഖ്സ്ഥാന്‍ തുടങ്ങിയ രാജ്യങ്ങളുമായി അതി!ര്‍ത്തി പങ്കിടുന്ന റഷ്യന്‍ റിപ്പബ്ലിക്കാണു അള്‍ട്ടായി. ഇവിടത്തെ ഒംഗുഡായ്‌സ്‌കൈ ജില്ലയില്‍ റഷ്യന്‍ ഊര്‍ജ കമ്പനിയായ ഗാസ്‌പ്രോം ഒരു വലിയ റിസോര്‍ട്ടും മറ്റു ഘടനകളും നേരത്തെ പണിതതായി റിപ്പോര്‍ട്ടുകളുണ്ടായിരുന്നു. ഇതൊരു രഹസ്യകേന്ദ്രമാണെന്നും ഇങ്ങോട്ടേക്ക് ഊര്‍ജം നല്‍കാനായി 110 കിലോവോള്‍ട്ട് ശേഷിയുള്ള സബ്‌സ്റ്റേഷനും, ഗതാഗതത്തിനായി രഹസ്യ ടണലുകളുമൊക്കെയുണ്ടെന്നു നേരത്തെ അഭ്യൂഹങ്ങളുണ്ടായിരുന്നു.