റോയല്‍ കനേഡിയന്‍ 22ാം റെജിമെന്റിന്റെ ശത്രുക്കള്‍ ഭയക്കുന്ന ഒരു സൈനീകനുണ്ടായിരുന്നു. ഇറാഖിലും അഫ്ഗാനിസ്ഥാനിലും യുദ്ധം ചെയ്ത വാലി എന്ന ഷാര്‍പ്പ് ഷൂട്ടര്‍. 2009 2011 കാലയളവില്‍ കാണ്ഡഹാറിലെ ദൗത്യത്തിലും ആ സൈനീകന്റെ കയ്യൊപ്പുണ്ടായിരുന്നു. ചിത്രങ്ങള്‍ പുറത്തു വന്നു എങ്കിലും യഥാര്‍ത്ഥ പേര് ഇപ്പോഴും അജ്ഞാതമാണ്. എന്നാല്‍ അഫ്ഗാനിസ്ഥാനില്‍ വച്ച് അവിടത്തെ തദ്ദേശീയരാണു അദേഹത്തിന് വാലി എന്നൊരു പേര് നല്‍കി. പിന്നീടതായി അദേഹത്തിന്റെ വിളിപ്പേര്. സംരക്ഷകന്‍ എന്നാണത്രേ ഈ വാക്കിന് അര്‍ഥം.

നാല്‍പതു വയസ്സുള്ള വാലി ഇപ്പോള്‍ വിവാഹിതനും ഒരു വയസ്സുള്ള കുട്ടിയുടെ പിതാവുമായിരുന്നു. കംപ്യൂട്ടര്‍ വിദഗ്ധന്‍ കൂടിയായ അദ്ദേഹം സൈനികസേവനത്തില്‍ നിന്നു വിരമിച്ച ശേഷം കംപ്യൂട്ടര്‍ പ്രോഗ്രാമിങ്ങുമായി കഴിഞ്ഞുകൂടുകയായിരുന്നു. എന്നാല്‍ യുക്രെയ്‌നില്‍ റഷ്യ നടത്തുന്ന യുദ്ധം വാലിയെ വീണ്ടും പടക്കോപ്പുകളണിയിച്ചു. യുക്രെയ്‌നു വേണ്ടി പോരാടാന്‍ മറ്റു രാജ്യങ്ങളില്‍ നിന്ന് ധാരാളം പേര്‍ എത്തുന്നുണ്ട്. ഇക്കൂട്ടത്തില്‍ വാലിയും ചേര്‍ന്നു. യുക്രെയ്‌നില്‍ മരിച്ചുവീഴുന്ന കുട്ടികളില്‍ താന്‍ തന്റെ മകന്റെ മുഖം കാണുന്നെന്നതാണ് യുദ്ധത്തിലിറങ്ങാന്‍ കാരണമായി വാലി പറയുന്നത്. മാര്‍ച്ച് നാലിന് മുന്‍പ് സഹപ്രവര്‍ത്തകരായിരുന്ന മൂന്ന് കനേഡിയന്‍ സൈനികര്‍ക്കൊപ്പം വാലി യുക്രെയ്‌നിലെത്തി റഷ്യയ്‌ക്കെതിരായ പോരാട്ടത്തില്‍ പങ്കുചേര്‍ന്നു. യുക്രെയ്‌നില്‍ വാലി എത്തിയ ശേഷം പതിനഞ്ച് ദിനങ്ങള്‍ പിന്നിട്ടിരിക്കുന്നു. ഇതിനകം തന്നെ ആറില്‍ കൂടുതല്‍ റഷ്യന്‍ സൈനികര്‍ വാലിയുടെ തോക്കിനിരയായെന്നാണു പ്രചരിക്കുന്ന റിപ്പോര്‍ട്ടുകള്‍.

ലാകത്തിലെ ഏറ്റവും മാരകമായ സ്‌നൈപ്പിങ് സ്‌കില്ലുകളുള്ളയാളാണു വാലിയെന്ന് യുദ്ധവിഗ്ധര്‍ പറയുന്നു. ഇറാഖിലെ മൊസൂളില്‍ മക്മിലന്‍ ടാക് 50 സ്‌നൈപ്പര്‍ റൈഫിള്‍ ഉപയോഗിച്ച് മൂന്നരക്കിലോമീറ്റര്‍ അകലെ നിന്ന ഒരു ഐഎസ് ഭീകരനെ വാലി വധിച്ചിട്ടുണ്ട്. ലോകത്തില്‍ രേഖപ്പെടുത്തപ്പെട്ട ഏറ്റവും ദൂരമേറിയ സ്‌നെപ്പര്‍ കൊലയാണ് ഇതെന്ന് പറയപ്പെടുന്നു. ഒറ്റ ദിവസം തന്നെ നാല്‍പതോളം ശത്രുക്കളെ തന്റെ റൈഫിളിനിരയാക്കാന്‍ വാലിക്കു കഴിയുമത്രേ. ദിവസത്തില്‍ അഞ്ച് ലക്ഷ്യം പൂര്‍ത്തീകരിക്കുന്നവര്‍ നല്ല സ്‌നൈപ്പര്‍മാരായും, 7, 10 വരെ ലക്ഷ്യങ്ങള്‍ പൂര്‍ത്തീകരിക്കുന്നവര്‍ മികവുറ്റ സ്‌നൈപ്പര്‍മാരായും കണക്കാക്കപ്പെടുന്നു. ഈ മാനദണ്ഡങ്ങള്‍ വച്ചുനോക്കുമ്പോഴാണു വാലി ലോകത്തിലെ തന്നെ ഏറ്റവും മാരകശേഷിയുള്ള സ്‌നൈപ്പറായി പരിഗണിക്കപ്പെടുന്നത്.