യുക്രെനിലെ മരിയുപോള്‍ നഗരം കീഴടക്കാന്‍ ആക്രമണം കടുപ്പിച്ച് റഷ്യ. നാനൂറിലധികം പേര്‍ അഭയാര്‍ഥികളായി കഴിഞ്ഞ സ്‌കൂള്‍ കെട്ടിടം റഷ്യ ബോംബിട്ട് തകര്‍ത്തു. നിരവധി പേര്‍ കെട്ടിട അവശിഷ്ടങ്ങള്‍ക്കിടയില്‍ കുടുങ്ങി കിടക്കുന്നുണ്ടെന്ന് യുക്രെന്‍ അറിയിച്ചു. ആളപായത്തെ കുറിച്ച് വിവരങ്ങള്‍ പുറത്തുവിട്ടിട്ടില്ല.

മരിയുപോളില്‍ ജനവാസ മേഖലകളിലേത് ഉള്‍പ്പെടെ നഗരത്തിലെ 80% കെട്ടിടങ്ങളും ആക്രമണത്തില്‍ തകര്‍ന്നെന്നാണ് റിപ്പോര്‍ട്ട്. ബുധനാഴ്ച റഷ്യ ബോംബിട്ടു തകര്‍ത്ത ഡ്രാമാ തിയറ്ററിന്റെ ബേസ്‌മെന്റില്‍ കുടുങ്ങിയ നൂറുകണക്കിനു പേരെ പുറത്തെത്തിക്കാന്‍ കഴിഞ്ഞിട്ടില്ല. മരിയുപോളില്‍ റഷ്യന്‍ സേനയുടെ തുടര്‍ച്ചയായ ഷെല്ലാക്രമണം നടത്തുന്നത് രക്ഷാപ്രവര്‍ത്തനത്തെ ബാധിക്കുന്നു.

മൂന്നു ലക്ഷം പേര്‍ നഗരത്തിലുണ്ട്. ഇവര്‍ വെള്ളം, ഭക്ഷണം, വൈദ്യുതി എന്നിവ ലഭിക്കുന്നില്ല. റഷ്യന്‍ സേനയുടെ നിരന്തരമുള്ള ആക്രമണം മൂന്നാഴ്ചയായി നേരിടുന്ന മരിയു പോളില്‍ യുക്രെയ്ന്‍ സേനയുടെ പ്രതിരോധം ദുര്‍ബലമാണ്. ടാങ്കുകളും പീരങ്കികളും അടക്കം എല്ലാവിധ ആയുധങ്ങളും ഉപയോഗിച്ചാണ് റഷ്യയുടെ ആക്രമണമെന്ന് മരിയുപോള്‍ മേയര്‍ വാഡിം ബോയ്‌ചെങ്കോ പറഞ്ഞു. കരിങ്കടല്‍ തീരത്തെ തന്ത്രപ്രധാന തുറമുഖമായ മരിയുപോള്‍ പിടിക്കുന്നത് റഷ്യക്കു വലിയ നേട്ടമാകും.