യുദ്ധമുഖത്ത് മാര്‍പാപ്പയുടെ പിന്തുണ തേടി സെലന്‍സ്‌കി; യുദ്ധം നിര്‍ത്താനിടപെടണം; ആരെയും കൂസാതെ പുടിന്‍; പുതിയ ആയുധം തൊടുക്കുന്നു
യുദ്ധം അവസാനിപ്പിക്കാന്‍ മധ്യസ്ഥത വഹിക്കണമെന്ന് ഫ്രാന്‍സിസ് മാര്‍പാപ്പയോട് അഭ്യര്‍ഥിച്ച് യുക്രെയ്ന്‍ പ്രസിഡന്റ് വൊളോഡിമിര്‍ സെലെന്‍സ്‌കി. മാര്‍പാപ്പയെ ഫോണില്‍ വിളിച്ച സെലന്‍സ്‌കി രാജ്യത്തെ അവസ്ഥ വ്യക്തമാക്കി. രക്ഷാപ്രവര്‍ത്തനങ്ങളെക്കുറിച്ചും ജനം നേരിടുന്ന ദുരിതത്തെക്കുറിച്ചും വിശദീകരിച്ചു. യുദ്ധം അവസാനിപ്പിക്കാന്‍ മാര്‍പാപ്പ നടത്തുന്ന ശ്രമങ്ങള്‍ അഭിനന്ദനാര്‍ഹമാണെന്നും സെലെന്‍സ്‌കി പറഞ്ഞു.
യുദ്ധം അവസാനിപ്പിക്കണമെന്ന് ഫ്രാന്‍സിസ് മാര്‍പാപ്പ ഒന്നിലേറെ തവണ ആവശ്യപ്പെട്ടിരുന്നു. യുക്രെയ്‌നില്‍ നടക്കുന്നതു കൂട്ടക്കൊലപാതകമാണെന്നും മാര്‍പാപ്പ അപലപിച്ചു. റഷ്യന്‍ ഓര്‍ത്തഡോക്‌സ് പാട്രിയാര്‍ക്ക് കിറിലും മാര്‍പാപ്പയും ഈ മാസം ആദ്യം ചര്‍ച്ച നടത്തിയിരുന്നു. സമാധാനം പുനഃസ്ഥാപിക്കുന്നതിനുള്ള നീക്കം ശക്തമാക്കണമെന്ന് അവര്‍ ആഹ്വാനം ചെയ്തു.
ഇതിനിടെ യുദ്ധമുഖത്ത് ദുരൂഹ ആയുധവുമായി റഷ്യന്‍ സേന. സൈനിക വാഹനങ്ങളില്‍ നിന്നും തൊടുക്കാനാവുന്ന ഇസ്‌കാന്‍ഡര്‍ എം ഹ്രസ്വദൂര മിസൈലാണ് റഷ്യ യുക്രെയ്‌നെതിരെ പ്രയോഗിക്കുന്നത്. വ്യോമപ്രതിരോധ സംവിധാനങ്ങളെ നിര്‍വീര്യമാക്കാനും ഊഷ്മാവിനെ പിന്തുടര്‍ന്ന് ലക്ഷ്യം കാണാനും എതിരെ വരുന്ന മിസൈലുകളെ കബളിപ്പിക്കാനും റഷ്യയുടെ ഈ ആയുധത്തിന് ശേഷിയുണ്ടെന്ന് അമേരിക്കന്‍ രഹസ്യാന്വേഷണ വിഭാഗത്തെ ഉദ്ധരിച്ച് ന്യൂയോര്‍ക്ക് ടൈംസ് റിപ്പോര്‍ട്ടു ചെയ്തു.
ഏതാണ്ട് ഒരു അടി മാത്രം നീളവും അമ്പിനെ പോലെ ആകൃതിയും വെളുപ്പും ഓറഞ്ചും നിറമുള്ള വാല്‍ഭാഗവുമാണ് ഇസ്‌കാന്‍ഡര്‍ എം മിസൈലിന്റെ പ്രത്യേകത. അതിര്‍ത്തികളില്‍ പലയിടത്തു നിന്നും റഷ്യ സൈനിക വാഹനങ്ങള്‍ ഉപയോഗിച്ചാണ് ഇസ്‌കാന്‍ഡര്‍ എം ബാലിസ്റ്റിക് മിസൈല്‍ തൊടുക്കുന്നത്. വ്യോമ പ്രതിരോധ സംവിധാനത്തിന്റെ പരിധിയില്‍ വരുന്നുവെന്ന് തിരിച്ചറിഞ്ഞാല്‍ പ്രത്യേകം റേഡിയോ സിഗ്‌നലുകള്‍ പുറപ്പെടുവിച്ച് വ്യോമ പ്രതിരോധ മിസൈലുകളെ കബളിപ്പിക്കാന്‍ ഇസ്‌കാന്‍ഡര്‍ എമ്മിന് സാധിക്കും. ഈ മിസൈലില്‍ നിന്നുള്ള ഊഷ്മാവ് പുറത്തേക്ക് വരാതിരിക്കാനുള്ള സംവിധാനവും ഇതിലുണ്ട്.
റഷ്യന്‍ ഇസ്‌കാന്‍ഡര്‍ മിസൈലുകളെ പ്രതിരോധിക്കുന്നതില്‍ യുക്രെയ്ന്‍ വ്യോമ പ്രതിരോധ സംവിധാനത്തിനു സംഭവിക്കുന്ന തുടര്‍പിഴവുകളെ ഇത് വിശദീകരിക്കുന്നുണ്ട്. ഏതാണ്ട് 320 കിലോമീറ്റര്‍ ദൂരെയുള്ള ലക്ഷ്യത്തിലേക്ക് വരെ ഇസ്‌കാന്‍ഡറിനെ തൊടുക്കാനാകും. ഖര ഇന്ധന റോക്കറ്റ് മോട്ടോറാണ് ഇതില്‍ ഘടിപ്പിച്ചിരിക്കുന്നത്. മൊബൈല്‍ ലോഞ്ചറുകളില്‍ നിന്നും രണ്ട് ഇസ്‌കാന്‍ഡര്‍ മിസൈലുകളെയാണ് ഒരേസമയം വിക്ഷേപിക്കാനാവുക.
https://www.facebook.com/Malayalivartha
