റഷ്യയെ തീര്ക്കാര് യുക്രൈന് വജ്രായുധം കൈമാറി അമേരിക്ക; കര ആക്രമണത്തിലെ തിരിച്ചടിക്കു പിന്നാലെ ആകാശത്തും കോട്ട കെട്ടി യുക്രൈന്
യുക്രെയ്ന് രഹസ്യമായി സ്വന്തമാക്കിയ സോവിയറ്റ് വ്യോമപ്രതിരോധ സംവിധാനം നല്കാന് യുഎസ്. റഷ്യന് സൈന്യത്തിന്റെ സാങ്കേതികവിദ്യകളെക്കുറിച്ചു പഠിക്കാന് യുഎസ് രഹസ്യമായി ഇത് ഉപയോഗിച്ചിരുന്നെന്നാണു വിവരം. യുക്രെയ്നു കൂടുതല് സഹായങ്ങള് ഉറപ്പാക്കുമെന്ന് യുഎസ് പ്രസിഡന്റ് ജോ ബൈഡന് നേരത്തേ പ്രഖ്യാപിച്ചിരുന്നു. യുക്രെയ്നിലെ ഹാര്കീവ്, മരിയുപോള് തുടങ്ങിയ നഗരങ്ങള് വ്യോമാക്രമണം നടത്തിയാണു റഷ്യ തകര്ത്തത്. കരമാര്ഗത്തിലുള്ള ആക്രമണത്തില് യുക്രെയ്നിലെ പല സ്ഥലങ്ങളിലും റഷ്യയ്ക്കു തിരിച്ചടി നേരിടേണ്ടിവന്നതോടെയാണ് അവര് വ്യോമാക്രമണം ശക്തമാക്കിയത്.
യുക്രെയ്നു സ്വന്തമായി വ്യോമപ്രതിരോധ സംവിധാനമുണ്ടെങ്കിലും കൂടുതല് സഹായങ്ങളുറപ്പാക്കാനാണു സഖ്യരാഷ്ട്രങ്ങളുടെ തീരുമാനം. റഷ്യയുടെ ആക്രമണത്തെ പ്രതിരോധിക്കുന്നതിനായി യുക്രെയ്നിന്റെ ആകാശത്തെ 'നോ ഫ്ലൈ സോണ്' ആക്കണമെന്ന് പ്രസിഡന്റ് വൊളോഡിമിര് സെലെന്സ്കി ആവശ്യപ്പെട്ടിരുന്നു.
യുക്രെയ്നില് നിന്ന് റഷ്യന് സൈന്യത്തെ പിന്വലിക്കാന് റഷ്യന് പ്രസിഡന്റ് വ്ലാഡിമിര് പുട്ടിന് തയാറായാല് പകരമായി നാറ്റോ അംഗത്വം തേടുന്നതില് നിന്നു പിന്മാറാന് തയാറാണെന്നു യുക്രെയ്ന് പ്രസിഡന്റ് വൊളോഡിമിര് സെലെന്സ്കി. യുക്രെയ്നില് നിന്നുള്ള സൈനിക പിന്മാറ്റവും ജനങ്ങളുടെ സുരക്ഷിതത്വവും പുട്ടിന് ഉറപ്പ് നല്കിയാല് നാറ്റോ അംഗത്വം തേടേണ്ടതില്ലെന്ന തീരുമാനം ചര്ച്ച ചെയ്യാം. ടെലിവിഷന് അഭിമുഖത്തിനിടെയായിരുന്നു സെലെന്സ്കിയുടെ പ്രതികരണം. പുട്ടിനുമായി നേരിട്ടു ചര്ച്ചയ്ക്കു തയാറാണെന്ന് സെലെന്സ്കി ആവര്ത്തിച്ചു.
താനുമായി നേരിട്ടുള്ള ചര്ച്ചയ്ക്ക് തയാറാകുന്നില്ലെങ്കില് യുദ്ധം അവസാനിപ്പിക്കാന് റഷ്യ ആഗ്രഹിക്കുന്നില്ലെന്നു തന്നെ കരുതേണ്ടി വരുമെന്നും സെലെന്സ്കി പറഞ്ഞു. അതേസമയം യുദ്ധം രൂക്ഷമായ യുക്രെയ്നില് റഷ്യ രാസായുധമോ ജൈവായുധമോ പ്രയോഗിച്ചേക്കുമെന്ന ആരോപണവുമായി യുഎസ് പ്രസിഡന്റ് ജോ ബൈഡന് രംഗത്തെത്തി. യുക്രെയ്നു ജൈവ, രാസായുധങ്ങള് ഉണ്ടെന്ന റഷ്യന് ആരോപണം തികച്ചും വസ്തുതാവിരുദ്ധമാണ്. യുക്രെയ്നു മേല് ജൈവ, രാസായുധങ്ങള് പ്രയോഗിക്കാന് റഷ്യ ആലോചിക്കുന്നതിന്റെ വ്യക്തമായ സൂചനകളാണ് ഇത്തരം ആരോപണങ്ങളെന്നും ജോ ബെഡന് പറഞ്ഞു.
യുക്രെയ്!നില് റഷ്യ നടത്തിയ യുദ്ധക്കുറ്റങ്ങളുടെ തെളിവുകള് ശേഖരിക്കാന് പെന്റഗണ് യുക്രെയ്നിനെ സഹായിക്കുമെന്നും ബൈഡന് പറഞ്ഞു. അതിനിടെ കനത്ത പോരാട്ടത്തിനൊടുവില് കീവ് പ്രാന്തപ്രദേശമായ മകാരിവില് നിന്ന് റഷ്യന്സൈന്യത്തെ തുരുത്തിയതായി യുക്രെയ്ന് അവകാശപ്പെട്ടു. മരിയുപോള് നഗരം വളഞ്ഞുപിടിക്കാനുള്ള ശ്രമം വിജയിക്കാതെ വന്നപ്പോള് കീഴടങ്ങാന് റഷ്യ നല്കിയ അന്ത്യശാസനവും യുക്രെയ്ന് തള്ളിയിരുന്നു.
https://www.facebook.com/Malayalivartha
