ലോക രാജ്യങ്ങള്‍ ഉപരോധം ഏര്‍പ്പെടുത്തിയതിന് പിന്നാലെ റഷ്യയില്‍ അവശ്യ സധനങ്ങള്‍ക്ക് കൂട്ട അടിയാണ്. പഞ്ചസാരയ്ക്കായി സൂപ്പര്‍ മാര്‍ക്കറ്റില്‍ അടികൂടുന്ന റഷ്യന്‍ ജനതയുടെ വീഡിയോ പുറത്തുവന്നതിന് പിന്നാലെ മറ്റൊരു. അസാധാരണമായൊരു നീക്കം കൂടി റഷ്യന്‍ മാധ്യമങ്ങള്‍ റിപ്പോര്‍ട്ട് ചെയ്യുകയാണ്. ചില വസ്തുക്കള്‍ക്ക് ക്ഷാമം നേരിടുകയും ചെയ്യുന്നുണ്ട്. ക്ഷാമം വരും എന്ന് കരുതി സാധനങ്ങള്‍ ജനം ശേഖരിച്ച് വയ്ക്കുന്നതും വിലക്കയറ്റത്തിന് കാരണമാകുന്നുണ്ട്. എന്നാല്‍ റഷ്യയും യുക്രെയ്‌നും തമ്മില്‍ നടക്കുന്ന യുദ്ധത്തിനിടയില്‍, റഷ്യയില്‍ കോണ്ടം ഡിമാന്‍ഡ് കുത്തനെ വര്‍ദ്ധിച്ചുവെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്. റഷ്യയിലെ ഓണ്‍ലൈന്‍ റീട്ടെയിലറായ വൈല്‍ഡ്‌ബെറി നല്‍കുന്ന വിവരമനുസരിച്ച് മാര്‍ച്ചിലെ ആദ്യ രണ്ടാഴ്ചകളില്‍ കഴിഞ്ഞ വര്‍ഷത്തെ അപേക്ഷിച്ച് 170% വര്‍ദ്ധനവാണ് കോണ്ടത്തിനുണ്ടായത്.

ഗര്‍ഭനിരോധന ഉറകളുടെ വില്‍പ്പനയിലെ ഈ പെട്ടെന്നുള്ള വര്‍ധനയ്ക്ക് കാരണം ഭാവിയില്‍ വിലക്കയറ്റത്തെക്കുറിച്ചുള്ള ജനങ്ങളുടെ ഭയവും പാശ്ചാത്യ ഉപരോധങ്ങള്‍ മൂലമുണ്ടാകുന്ന ക്ഷാമവുമാണ്. കോണ്ടം വില്‍പ്പന 26% വര്‍ദ്ധിച്ചതായി റഷ്യയില്‍ പ്രവര്‍ത്തിക്കുന്ന ഒരു ഫാര്‍മസി ശൃംഖലയും വെളിപ്പെടുത്തിയിട്ടുണ്ട്. ഇതിനൊപ്പം ബ്രാന്‍ഡഡ് കോണ്ടത്തിന് വിലയും വര്‍ദ്ധിച്ചിട്ടുണ്ട്.

പാശ്ചാത്യ കറന്‍സികളേക്കാള്‍ റഷ്യന്‍ റൂബിളിന്റെ മൂല്യം കുറഞ്ഞതാണ് വില വര്‍ദ്ധിക്കാന്‍ കാരണം. റഷ്യയിലേക്ക് ഓരോ വര്‍ഷവും ഏകദേശം 600 ദശലക്ഷം കോണ്ടം ഇറക്കുമതി ചെയ്യുന്നു എന്നാണ് കണക്കുകള്‍. 100 ദശലക്ഷം കോണ്ടം മാത്രമാണ് റഷ്യയില്‍ നിര്‍മ്മിക്കുന്നത്. 12, 18, 30 എണ്ണമുള്ള പാക്കറ്റുകള്‍ക്കാണ് ഇപ്പോള്‍ ഡിമാന്റ് കൂടിയിട്ടുള്ളത്. ഉപരോധം ഏര്‍പ്പെടുത്തുന്ന പാശ്ചാത്യ രാജ്യങ്ങളില്‍ നിര്‍മ്മിക്കുന്നതിനേക്കാള്‍ സൗഹൃദ രാജ്യങ്ങളില്‍ നിന്നുള്ള 'നല്ല കോണ്ടം' ഉപയോഗിക്കണമെന്ന് സെക്‌സോളജിസ്റ്റ് യെവ്‌ജെനി കല്‍ഗവ്ചുക്ക് റഷ്യന്‍ ജനയോട് ആവശ്യപ്പെട്ടു.