കഴിഞ്ഞ കുറച്ച് വര്‍ഷങ്ങളായി ഇന്ത്യയും ആഫ്രിക്കന്‍ രാജ്യമായ ഉഗാണ്ടയും തമ്മിലുള്ള വളരെ ദൃഢമായ ബന്ധമാണുള്ളത്. 2018ല്‍ ഇന്ത്യന്‍ പ്രധാനമന്ത്രി നരേന്ദ്ര മോദി ഉഗാണ്ടയില്‍ നടത്തിയ സന്ദര്‍ശനം ഇരു രാജ്യങ്ങളുടെയും ബന്ധത്തിന് മുതല്‍കൂട്ടായിരുന്നു. 20 വര്‍ഷത്തിനിടെ ഒരു ഇന്ത്യന്‍ പ്രധാനമന്ത്രിയുടെ ആദ്യ സന്ദര്‍ശനമായിരുന്നു ഇത്. ഈ കൂടിക്കാഴ്ചയില്‍ പ്രതിരോധ മേഖലയില്‍ ഉഭയകക്ഷി സഹകരണം ശക്തമാക്കാന്‍ ഇരുരാജ്യങ്ങളും ധാരണയിലെത്തിയിരുന്നു. ഇപ്പോഴിതാ ഉഗാണ്ടയും ഇന്ത്യയും തമ്മില്‍ പ്രതിരോധ കരാറില്‍ ഏര്‍പ്പെടുകയാണ്.

എണ്ണപ്പാടങ്ങളാല്‍ സമ്പന്നമായ ഉഗാണ്ടയില്‍ വിഘടനവാദികളെ പ്രതിരോധിക്കുന്നതിന് വേണ്ടിയാണ് പ്രധാനമായും റഷ്യന്‍ ആയുധങ്ങള്‍ സൈന്യം ഉപയോഗിക്കുന്നത്. എന്നാല്‍ റഷ്യ യുക്രെയിനിലെ യുദ്ധത്തിന്റെ തിരക്കിലായതോടെ തങ്ങളുടെ പ്രതിരോധ ആവശ്യങ്ങള്‍ക്കായി ഇന്ത്യയുടെ സഹായം തേടിയിരിക്കുകയാണ് ഉഗാണ്ട ഇപ്പോള്‍. പതിനൊന്ന് വര്‍ഷങ്ങള്‍ക്ക് മുന്‍പ് ഉഗാണ്ട റഷ്യയില്‍ നിന്നും സ്വന്തമാക്കിയ സുഖോയ് യുദ്ധവിമാനങ്ങളുടെ പരിപാലനത്തിനായാണ് ഇന്ത്യ സഹായം നല്‍കാമെന്നേറ്റത്. ഇത് സംബന്ധിച്ച കരാര്‍ മാര്‍ച്ച് നാലിന് ഉഗാണ്ട ഇന്ത്യയുമായി ഒപ്പുവച്ചു. കമ്പാലയിലെ ഇന്ത്യന്‍ ഹൈക്കമ്മീഷനിലാണ് ധാരണാപത്രം ഒപ്പുവച്ചത്.

റഷ്യന്‍ സുഖോയ് എസ് യു 30 യുദ്ധവിമാനങ്ങളുടെ പരിപാലനത്തിനുള്ള ലൈസന്‍സ് ഇന്ത്യയുടെ സര്‍ക്കാര്‍ ഉടമസ്ഥതയിലുള്ള ഹിന്ദുസ്ഥാന്‍ എയ്‌റോനോട്ടിക്‌സ് ലിമിറ്റഡിനുള്ളതാണ് ഉഗാണ്ടയെ ഇന്ത്യയെ തിരഞ്ഞെടുക്കാന്‍ പ്രേരിപ്പിച്ചത്. ഇരു രാജ്യങ്ങളും തമ്മില്‍ ഒപ്പിട്ട കരാറിലെ വിശദാംശങ്ങള്‍ രഹസ്യ സ്വഭാവമുള്ളതിനാല്‍ പുറത്ത് വിട്ടിട്ടില്ല. ഉഗാണ്ടന്‍ ദിനപത്രമായ ദി ഇന്‍ഡിപെന്‍ഡന്റാണ് ഇത് സംബന്ധിച്ച് വിവരങ്ങള്‍ ആദ്യം റിപ്പോര്‍ട്ട് ചെയ്തത്. കഴിഞ്ഞ വര്‍ഷം ഉഗാണ്ടയിലെ സര്‍ക്കാര്‍ വിഘടനവാദികളെ നേരിടാന്‍ സുഖോയ് ഉപയോഗിച്ചതായി റിപ്പോര്‍ട്ടുകളുണ്ടായിരുന്നു.

2011ലാണ് ഉഗാണ്ട റഷ്യയില്‍ നിന്നു സുഖോയ് സ്വന്തമാക്കിയത്. റഷ്യന്‍ സുഖോയ് സ്വന്തമാക്കിയ ആദ്യത്തെ ആഫ്രിക്കന്‍ രാജ്യം എന്ന വിശേഷണവും ഇതിലൂടെ ഉഗാണ്ട സ്വന്തമാക്കി. ആഫ്രിക്കന്‍ രാജ്യങ്ങളില്‍ റഷ്യയ്ക്ക് വലിയ സ്വാധീനമാണുള്ളത്. യുക്രെയിനിലെ റഷ്യന്‍ അധിനിവേശത്തിനെതിരെ യു എന്നില്‍ നടന്ന വോട്ടെടുപ്പുകളില്‍ ഉഗാണ്ട ഉള്‍പ്പടെ 17 ആഫ്രിക്കന്‍ രാജ്യങ്ങളാണ് വിട്ടുനിന്നത്. 2017ന് ശേഷം ആഫ്രിക്കയിലേക്ക് ഏറ്റവും കൂടുതല്‍ ആയുധങ്ങള്‍ കയറ്റുമതി ചെയ്യുന്നത് റഷ്യയില്‍ നിന്നുമാണ്. ആഫ്രിക്കയുടെ പ്രതിരോധ ഇറക്കുമതിയുടെ 44 ശതമാനവും റഷ്യയാണ്.