ലോകരാജ്യങ്ങള്‍ ഉറ്റുനോക്കുന്നത് യുദ്ധഭൂമിയില്‍ റഷ്യ പ്രയോഗിക്കുന്ന ആയുധങ്ങളിലാണ്. ലോകത്തിലെ രണ്ടാമത്തെ വലിയ ആയുധ കയറ്റുമതി രാജ്യമായ റഷ്യയ്ക്ക് അവരുടെ ആയുധങ്ങളുടെ ശക്തി പ്രകടിപ്പിക്കുവാനുള്ള ഒരു അവസരമാണ് ഈ യുദ്ധം. അതിനാല്‍ തന്നെ റഷ്യയുക്രെയിന്‍ യുദ്ധം അവസാനിച്ചാല്‍ റഷ്യന്‍ ആയുധങ്ങളില്‍ കണ്ണുവച്ച് കൂടുതല്‍ രാജ്യങ്ങള്‍ മോസ്‌കോയുമായി ബന്ധം സ്ഥാപിക്കുവാനും സാദ്ധ്യതയുണ്ട്. ഇതില്‍ ഏറ്റവും കൂടുതല്‍ പരിഗണന ലഭിക്കുന്ന രാജ്യങ്ങല്‍ ഇന്ത്യയും ചൈനയുമായിരിക്കും എന്ന കാര്യത്തില്‍ സംശയമില്ല.

നിലവില്‍ ലോകത്തെ ആയുധ കയറ്റുമതിയില്‍ 19 ശതമാനമാണ് റഷ്യയുടെ പങ്ക്. 2016 വരെ ഇത് 24 ശതമാനമായിരുന്നു. എന്നാല്‍ അടുത്ത കുറച്ച് വര്‍ഷങ്ങളായി റഷ്യയില്‍ നിന്നുള്ള കയറ്റുമതി 26 ശതമാനം ഇടിവുണ്ടായി. പ്രധാനമായും ഇന്ത്യ അമേരിക്കയില്‍ നിന്നും, ഫ്രാന്‍സില്‍ നിന്നും ഭീമമായ തുകയ്ക്കുള്ള ആയുധങ്ങള്‍ ഇക്കാലയളവില്‍ വാങ്ങിയിരുന്നു എന്നതും റഷ്യന്‍ ഇടിവില്‍ പ്രതിഫലിച്ചു. റഷ്യയുടെ 90% ആയുധങ്ങളും പത്ത് രാജ്യങ്ങളിലേക്ക് മാത്രമാണ് വലിയ അളവില്‍ കയറ്റുമതി ചെയ്യുന്നത്. എന്നിരുന്നാലും റഷ്യന്‍ ആയുധങ്ങള്‍ക്ക് ആഗോളതലത്തില്‍ സ്വീകാര്യത ഏറെയാണ്.

റഷ്യയുടെ ആയുധ കയറ്റുമതിയുടെ ചരിത്രം പരിഗണിച്ചാല്‍ ഇന്ത്യ എക്കാലത്തും പ്രതിരോധ രംഗത്ത് മികച്ച പങ്കാളിയായിരുന്നു. 2016 നും 2020 നും ഇടയില്‍ റഷ്യയില്‍ നിന്നും 6.5 ബില്യണ്‍ ഡോളറിനുള്ള ആയുധങ്ങളാണ് ഇന്ത്യ വാങ്ങിയത്. ഇത് റഷ്യ കയറ്റുമതി ചെയ്തതില്‍ 19 ശതമാനത്തോളം വരും. ഇക്കാലയളവില്‍ റഷ്യയില്‍ നിന്നും 5.1 ബില്യണ്‍ ഡോളര്‍ ചെലവഴിച്ച് ആയുധം ഇറക്കുമതി ചെയ്ത ചൈനയാണ് രണ്ടാം സ്ഥാനത്തുള്ളത്. ഇന്ത്യയുടെ മൊത്തം ആയുധ ഇറക്കുമതിയുടെ 49.3% വും റഷ്യയില്‍ നിന്നുമാണ്. അതേസയമം യുക്രെയിന്‍ യുദ്ധം കൊടുമ്പിരികൊള്ളുന്ന സമയത്ത് റഷ്യയില്‍ നിന്നുള്ള ആയുധ ഇറക്കുമതിയില്‍ തടസം നേരിടുമെന്ന ആശങ്കയും ഇന്ത്യയിലെ പ്രതിരോധ വിദഗ്ദ്ധര്‍ പങ്കുവയ്ക്കുന്നുണ്ട്.

ഇന്ത്യയുടെ സൈനിക ആയുധശേഖരത്തിന്റെ 70 ശതമാനവും റഷ്യന്‍ നിര്‍മ്മിത ആയുധങ്ങളാണ്. നാവിക സേനയുടെ ഉപയോഗിച്ച് കൊണ്ടിരിക്കുന്ന യുദ്ധക്കപ്പലുകളില്‍ ഭൂരിഭാഗവും റഷ്യന്‍ കരങ്ങള്‍ പതിഞ്ഞിട്ടുള്ളവയാണ്. ഇന്ത്യയുടെ ഏക ഓപ്പറേറ്റിംഗ് എയര്‍ക്രാഫ്റ്റ് കാരിയര്‍, ഐ എന്‍ എസ് വിക്രമാദിത്യ സോവിയറ്റ് കാലഘട്ടത്തിലെ കപ്പലിനെ പരിഷ്‌കരിച്ചതാണ്. ഇതിന് പുറമേ നാവികസേനയുടെ 10 ഗൈഡഡ്മിസൈല്‍ ഡിസ്‌ട്രോയറുകളില്‍ നാലെണ്ണം റഷ്യന്‍ കാഷിന്‍ ക്ലാസ് കപ്പലുകളാണ്. ഇന്ത്യന്‍ നാവികസേനയുടെ കരുത്തായ ആണവ അന്തര്‍വാഹിനിയായ ഐഎന്‍എസ് ചക്ര റഷ്യയില്‍ നിന്നും പാട്ടത്തിനെടുത്തതാണ്.

നാവിക സേനയ്‌ക്കൊപ്പം ഇന്ത്യന്‍ വ്യോമസേനയുടെ കരുത്തും റഷ്യന്‍ ആയുധങ്ങളാണെന്നതില്‍ സംശയം വേണ്ട. റഫേലുകളുടെ കരുത്ത് അടുത്തകാലത്തായി സ്വന്തമാക്കിയെങ്കിലും മിഗ് വിമാനങ്ങളും സുഖോയും ഇപ്പോഴും വിശ്വസ്തരാണ്. ഇതിന് പുറമേ റഷ്യന്‍ നിര്‍മ്മിത എംഐ17, എംഐ8 ഹെലികോപ്ടറുകളും ഇന്ത്യ ഉപയോഗിക്കുന്നുണ്ട്. റഷ്യയും ഇന്ത്യയും സംയുക്തമായി വികസിപ്പിച്ച ബ്രഹ്മോസ് ക്രൂയിസ് മിസൈലുകള്‍ ലോകം കൊതിക്കുന്ന മിസൈലുകളാണ്. നിരവധി രാജ്യങ്ങളാണ് ബ്രഹ്മോസിനായി ഇന്ത്യയെ സമീപിക്കുന്നത്. വ്യോമപ്രതിരോധത്തിനായി റഷ്യയില്‍ നിന്ന് അടുത്തിടെ വാങ്ങിയ എസ്400 സംവിധാനങ്ങളും ഇന്ത്യയില്‍ എത്തിതുടങ്ങിയിട്ടുണ്ട്.

കരസേനയിലും റഷ്യന്‍ ആയുധങ്ങള്‍ ഇന്ത്യ ഉപയോഗിക്കുന്നുണ്ട്. റഷ്യന്‍ എ കെ 203 റൈഫിളുകളുടെ നിര്‍മ്മാണം ഇന്ത്യയില്‍ ആരംഭിക്കുന്നതും ഇതിന്റെ ഭാഗമാണ്. ഇതിനെല്ലാം പുറമേ യുക്രെയിനില്‍ റഷ്യ ഉപയോഗിക്കുന്ന ആയുധങ്ങളിലും സ്വാഭാവികമായും ഇന്ത്യ കണ്ണുവച്ചേക്കാം. ഇവിടെ പ്രവര്‍ത്തന മികവ് അറിഞ്ഞ് വാങ്ങാന്‍ കഴിയും എന്നതും നേട്ടമാണ്.