റഷ്യന്‍ പ്രസിഡന്റ് വഌദിമിര്‍ പുടിന്റെ കാമുകിയെന്ന് കരുതപ്പെടുന്ന മുന്‍ ഒളിമ്പിക്‌സ് സ്വര്‍ണമെഡല്‍ ജേതാവ് അലിന കബായേവ പുതിയൊരു പ്രതിസന്ധി നേരിടുന്നു. സ്വിറ്റ്‌സര്‍ലാന്‍ഡില്‍ പുടിന്റെ മക്കള്‍ എന്ന് കരുതപ്പെടുന്ന തന്റെ കുട്ടികളോടൊപ്പം ആഢംബര മാളികയില്‍ താമസിക്കുന്ന അലിനയെ അവിടെ നിന്നും ഇറക്കിവിടണമെന്ന ആവശ്യം ശക്തമാകുന്നു. പുടിന്റെ രാഷ്ട്രീയ എതിരാളികളാണ് ഇത്തരമൊരു ആവശ്യവുമായി ഒരു വെബ്‌സൈറ്റില്‍ പൊതുജന അഭിപ്രായം സ്വരൂപിക്കുന്നത്. ഇതിനോടകം നിരവധി പേര്‍ ഈ അഭിപ്രായത്തെ പിന്തുണച്ചു രംഗത്ത് എത്തിയിട്ടുണ്ട്.

ഒരു ലക്ഷത്തോളം സ്വിസ് പൗരന്‍മാര്‍ അലീനയെ തിരിച്ചയയ്ക്കണമെന്ന് ആവശ്യപ്പെട്ട് വലിയ ഒപ്പുതേടല്‍ ക്യാംപെയ്ന്‍ തുടങ്ങിയിട്ടുണ്ട്. വര്‍ത്തമാന കാല ഈവാ ബ്രൗണായ അലീന കബേവയെ അഭിനവ ഫ്യൂററായ പുട്ടിനുമായി ഒരുമിപ്പിക്കൂ, അവരെ സ്വിറ്റ്‌സര്‍ലന്‍ഡില്‍ നിന്നു പുറത്താക്കൂ എന്നാണു ക്യാംപെയ്ന്‍. ഹിറ്റ്‌ലറെയും കാമുകി ഈവാ ബ്രൗണിനെയും പുട്ടിനും അലീനയുമായി ഉപമിച്ചാണു ക്യാംപെയ്ന്‍. എന്നാല്‍ ക്യാംപെയ്ന്‍ പുരോഗമിക്കുമ്പോഴും അലീന സ്വിറ്റ്‌സര്‍ലന്‍ഡിലുണ്ടോ എന്ന കാര്യത്തില്‍ അഭ്യൂഹം മാത്രമാണു നിലനില്‍ക്കുന്നത്. യുദ്ധം തുടങ്ങിയ ശേഷം അലീന കബേവ മുഖ്യധാരയില്‍ വന്നിരുന്നില്ല.

അലീന ഒളിവിലാണെന്നു തുടങ്ങിയ വാര്‍ത്തകള്‍ പ്രചരിക്കുന്നതിന് ഇതൊരു കാരണമായി. യുക്രെയ്‌നില്‍ റഷ്യ സൃഷ്ടിച്ച യുദ്ധ പ്രതിസന്ധിക്കു ശേഷം പുട്ടിന്റെ ഏറ്റവുമടുത്ത സര്‍ക്കിളിലുള്ള വ്യവസായികള്‍ക്കുള്‍പ്പെടെ പ്രമുഖര്‍ക്കുമേല്‍ ഉപരോധമേര്‍പ്പെടുത്തിയിരുന്നു. ഇക്കൂട്ടത്തില്‍ അലീന കബേവയും ഉള്‍പ്പെട്ടിരുന്നു. മുപ്പത്തിയെട്ടു വയസ്സുകാരിയായ അലീന ഒളിംപിക്‌സില്‍ റഷ്യയെ പ്രതിനിധി പങ്കെടുത്തു സ്വര്‍ണമെഡല്‍ വാങ്ങിയ ജിംനാസ്റ്റിക്‌സ് താരമാണ്. 1983 മേയ് 12നു ഉസ്‌ബെക്കിസ്ഥാനിലാണ് അവര്‍ ജനിച്ചത്. അക്കാലത്ത് ഉസ്‌ബെക്കിസ്ഥാന്‍ സോവിയറ്റ് യൂണിയന്റെ ഭാഗമായിരുന്നു. ഒരു പ്രഫഷനല്‍ ഫുട്‌ബോള്‍ കളിക്കാരനായ മാറാറ്റ് കബേവിന്റെ പുത്രിയായാണ് അലീനയുടെ ജനനം. മൂന്നു വയസ്സുള്ളപ്പോള്‍ തന്നെ കായികമേഖലയില്‍ അരങ്ങേറിയ അലീന ജിംനാസ്റ്റിക്‌സാണു തിരഞ്ഞെടുത്തത്.

കൗമാരപ്രായമായപ്പോഴേക്കും അവര്‍ മികച്ചൊരു ജിംനാസ്റ്റിക്‌സ് താരമായി. പില്‍ക്കാലത്ത് 14 വേള്‍ഡ് ചാംപ്യന്‍ഷിപ് മെഡലുകളും 21 യൂറോപ്യന്‍ ചാംപ്യന്‍ഷിപ് മെഡലുകളും നേടിയ അലീന രണ്ടായിരാമാണ്ടിലെ സിഡ്‌നി ഒളിംപിക്‌സില്‍ സ്വര്‍ണവും തൊട്ടടുത്ത വര്‍ഷത്തെ ആതന്‍സ് ഒളിംപിക്‌സില്‍ വെങ്കലവും നേടി.

വളരെ വിജയകരമായ ഒരു സ്‌പോര്‍ട്‌സ് കരിയറിന് ഈ വിധം ഉടമയായ അലീന, കായിക മേഖലയില്‍ നിന്നു വിടവാങ്ങിയ ശേഷം രാഷ്ട്രീയത്തിലിറങ്ങാനാണു ശ്രമിച്ചത്. ആ ശ്രമം വിജയിക്കുകയും 2007 മുതല്‍ 2014 വരെയുള്ള കാലയളവില്‍ പുട്ടിന്റെ യുണൈറ്റഡ് റഷ്യ പാര്‍ട്ടിയുടെ പ്രതിനിധിയായി പാര്‍ലമെന്റിലെത്തുകയും ചെയ്തു. ഇക്കാലയളവില്‍ വിവാദം സൃഷ്ടിച്ച കുറേയേറെ ബില്ലുകള്‍ക്ക് അനുകൂലമായി ഇവര്‍ വോട്ടു ചെയ്യുകയും ചെയ്തു. 2014ല്‍ റഷ്യയിലെ ഏറ്റവും വലിയ മാധ്യമ കോര്‍പറേറ്റ് സ്ഥാപനമായ നാഷനല്‍ മീഡിയ ഗ്രൂപ്പിന്റെ ചെയര്‍പഴ്‌സന്‍ സ്ഥാനവും ഇവര്‍ക്കു ലഭിച്ചു.

2008ലാണ് ഇവര്‍ പുട്ടിനുമായി അടുത്തതെന്ന് കരുതപ്പെടുന്നു. അന്ന് പുട്ടിന് 56 വയസ്സും അലീനയ്ക്ക് ഇരുപത്തിയഞ്ചുമായിരുന്നു. മോസ്‌കോ ആസ്ഥാനമാക്കി ഒരു മുന്‍ കെജിബി ചാരന്‍ നടത്തുന്ന പത്രമാണ് ഇവര്‍ തമ്മിലുള്ള ബന്ധം പുറത്തറിയിച്ചത്. അത് റഷ്യയിലെ ഒരു ദേശീയ വിവാദമായി മാറാന്‍ അധികം സമയം വേണ്ടി വന്നില്ല. അക്കാലത്ത് പുടിന്‍ വിവാഹിതനായിരുന്നു. യുവതികളായ പുത്രിമാരുമുണ്ടായിരുന്നു. 5 വര്‍ഷങ്ങള്‍ക്കു ശേഷം, തന്റെ ഭാര്യ ല്യൂദ്മില്ലയെ പുട്ടിന്‍ വിവാഹമൊഴിയുകയും ചെയ്തു. ഇതോടെ അലീനയുടെ മേല്‍ റഷ്യക്കാരുടെ ശ്രദ്ധ ശക്തമായി. പുട്ടിന്‍ ഇവരെ വിവാഹം കഴിക്കുമെന്നായിരുന്നു ഉയര്‍ന്ന അഭ്യൂഹങ്ങള്‍.

എന്നാല്‍ വിവാഹം ഇതുവരെ നടന്നിട്ടില്ല. എന്നാല്‍ രഹസ്യമായി വിവാഹം നടന്നെന്നും അലീനയില്‍ പുട്ടിന് ഇരട്ടക്കുട്ടികളുണ്ടായെന്നും ശക്തമായ അഭ്യൂഹമുണ്ട്. ഇതിനിടെ റഷ്യ – യുക്രെയ്ന്‍ യുദ്ധം തുടങ്ങുന്നതിനു മുന്നോടിയായി റഷ്യന്‍ പ്രസിഡന്റ് വ്‌ലാദിമിര്‍ പുട്ടിന്‍, അലീനയെയും ആ ബന്ധത്തി!ല്‍ പിറന്ന കുട്ടികളെയും സൈബീരിയയില്‍ പണിത അതിസുരക്ഷാ, അത്യാധുനിക ബങ്കറില്‍ ഒളിപ്പിച്ചെന്ന് റഷ്യന്‍ പ്രഫസറും രാഷ്ട്രീയ പഠന വിദഗ്ധനുമായ വലേറി സോളോവി പറഞ്ഞിരുന്നു.

എന്നാല്‍ 2018ല്‍ ഒരു മാഗസിന്റെ കവര്‍ഫോട്ടോയ്ക്ക് വേണ്ടി നഗ്‌നയായി പോസ് ചെയ്തതോടെ അലിനയുടെ ജീവിതം തന്നെ മാറിമറിയുകയായിരുന്നു. അന്ന് അലിനയുടെ ചിത്രമെടുത്ത ഫോട്ടോഗ്രാഫര്‍ പറഞ്ഞത് നഗ്‌നയായി പോസ് ചെയ്യുന്നതിന് വേണ്ടി തനിക്ക് അലിനയെ ഒട്ടും നിര്‍ബന്ധിക്കേണ്ടി വന്നില്ലെന്നും കേട്ടയുടനെ അവര്‍ അതിന് സമ്മതിക്കുകയുമായിരുന്നു എന്നാണ്.

ഏതായാലും ആ ചിത്രം പുറത്തുവന്നതോടെ അലീനയെ കുറിച്ച് അധികമാരും പിന്നീട് കേട്ടില്ല. പുടിന്‍ അലീനയേയും മക്കളെയും റഷ്യയില്‍ നിന്ന് അകറ്റുകയായിരുന്നെന്നും വാര്‍ത്തകളുണ്ട്. ഒടുവില്‍ മിററിന്റെ റിപ്പോര്‍ട്ട് പുറത്തുവന്നതോടെയാണ് അലിന എവിടെയെന്ന ചോദ്യത്തിന് ഉത്തരമായത്.