തെക്കുകിഴക്കന്‍ ആഫ്രിക്കന്‍ രാജ്യമായ മലാവിയിലും കനത്തനാശം വിതച്ച് ഫ്രെഡി ചുഴലിക്കാറ്റ്. ശക്തമായ കാറ്റിലും അതിതീവ്രമഴയിലും 190 പേര്‍ മരിച്ചു. 584 പേര്‍ക്ക് പരിക്കേറ്റു. 37 പേരെ കാണാതായി. ഉരുള്‍പൊട്ടലിലും മണ്ണിടിച്ചിലിലും ഒട്ടേറെ വീടുകള്‍ ഒഴുകിപ്പോയി.

വടക്കുപടിഞ്ഞാറന്‍ ഓസ്‌ട്രേലിയയില്‍ ഫെബ്രുവരി ആദ്യ ആഴ്ചയാണ് ഫ്രെഡി ചുഴലിക്കാറ്റ് രൂപംകൊണ്ടത്. ഫെബ്രുവരി 21-ന് മഡഗാസ്‌കറിലും 24-ന് മൊസാംബിക്കിലും ഇത് ആഞ്ഞുവീശി. നീണ്ടകാലമായി വീശിയടിക്കുന്ന ചുഴലിക്കാറ്റെന്ന പ്രത്യേകതയും ഫ്രെഡിക്കുണ്ട്.

ഫ്രെഡി വാരാന്ത്യത്തില്‍ കൂടുതല്‍ ഉള്‍നാടുകളിലേക്ക് പോകുമെന്നും മൊസാംബിക്കിലും തെക്കന്‍ മലാവിയിലും കനത്ത മഴ സൃഷ്ടിക്കുമെന്നും, സിംബാബ്വെയിലും സാംബിയയിലും മഴയ്ക്ക് സാധ്യതയുണ്ടെന്നും ഫ്രഞ്ച് കാലാവസ്ഥാ ഏജന്‍സിയായ മെറ്റിയോഫ്രാന്‍സ് മുന്നറിയിപ്പ് നല്‍കി.

വരും ആഴ്ചയില്‍ ചുഴലിക്കാറ്റ് കരയില്‍ ദുര്‍ബലമാകാന്‍ സാധ്യതയില്ലെന്നും കടലിലേക്ക് തിരികെ പോകാനുള്ള ഉയര്‍ന്ന സാധ്യതയുണ്ടെന്നും മെറ്റിയോഫ്രാന്‍സ് ആശങ്ക ഉയര്‍ത്തിയിട്ടുണ്ട്.