സതേണ്‍ ഫിലിപ്പെയ്‌നില്‍ ബോട്ടിന് തീ പിടിച്ച് 31 ഓളം പേര്‍ മരിച്ചു. 195 യാത്രക്കാരെയും 35 ഓളം ജീവനക്കാരെയും രക്ഷിച്ചതായി അധികൃതര്‍ അറിയിച്ചു. ആളുകള്‍ ഉറങ്ങുമ്പോഴാണ് തീപിടിത്തമുണ്ടായത്. അതാണ് മരണ സംഖ്യ കൂട്ടാനിടയാക്കിയതെന്ന് അധികൃതര്‍ പറയുന്നു. ലേഡി മേരി ജോയ്3 എന്ന ബോട്ടാണ് അപകടത്തില്‍ പെട്ടത്.

മിന്‍ഡനാവോ ദ്വീപിലെ സംബോന്‍ഗയില്‍ നിന്ന് ജോലോ ദ്വീപിലേക്കുള്ള യാത്രക്കിടെയാണ് അപകടം നടന്നതെന്ന് എ.എഫ്.പി റിപ്പേര്‍ട്ട് ചെയ്തു. തീപിടര്‍ന്നതോടെ നിരവധി പേര്‍ വെള്ളത്തിലേക്ക് എടുത്തുചാടി. ഫിലിപ്പെയ്ന്‍ കോസ്റ്റ് ഗാര്‍ഡും മത്സ്യത്തൊഴിലാളികളും രക്ഷാപ്രവര്‍ത്തനത്തില്‍ ഏര്‍പ്പെട്ടിട്ടുണ്ട്.

തീരത്തോട് അടുത്ത സ്ഥലത്തു നിന്നാണ് തീപിടിത്തമുണ്ടായത്. വെള്ളത്തിലേക്ക് ചാടിയാലും കരയിലേക്ക് നീന്തിയെത്താവുന്നതാണ്. എന്നാല്‍ പലരും ഉറക്കത്തിലായത് മരണ സംഖ്യ കൂട്ടിയതെന്നും കോസ്റ്റ് ഗാര്‍ഡ് വ്യക്തമാക്കി. ആറ് മാസം പ്രായമുള്ള കുഞ്ഞുള്‍പ്പെടെ മൂന്നു കുട്ടികള്‍ മരിച്ചവരില്‍ ഉള്‍പ്പെടുന്നു. തീപിടിത്തത്തിന്റെ കാരണം വ്യക്തമായിട്ടില്ലെന്ന് അധികൃതര്‍ പറഞ്ഞു.