ക്രിമിനല്‍ കേസില്‍ കുറ്റം ചുമത്തപ്പെടുന്ന ആദ്യ യുഎസ് മുന്‍ പ്രസിഡന്റാണ് ട്രംപ്. ഫ്‌ലോറിഡയില്‍നിന്നു ട്രംപ് തിങ്കളാഴ്ച ന്യൂയോര്‍ക്കിലെത്തി ചൊവ്വാഴ്ച കോടതിയില്‍ ഹാജരായി കുറ്റപത്രം വായിച്ചുകേള്‍ക്കും.
ബന്ധം പുറത്തുപറയാതിരിക്കുന്നതിന് രതിചിത്രങ്ങളിലെ നടി സ്റ്റോമി ഡാനിയേല്‍സിനു പണം നല്‍കിയെന്ന കേസില്‍ യുഎസ് മുന്‍ പ്രസിഡന്റ് ഡോണള്‍ഡ് ട്രംപിനെതിരെ ന്യൂയോര്‍ക്ക് കോടതി കുറ്റം ചുമത്തി. ട്രംപിനോട് ഉടന്‍ കോടതിയില്‍ കീഴടങ്ങാന്‍ മന്‍ഹാറ്റന്‍ ഡിസ്ട്രിക്ട് അറ്റോര്‍ണി ആല്‍വിന്‍ ബ്രാഗ് ആവശ്യപ്പെട്ടു. ക്രിമിനല്‍ കേസില്‍ കുറ്റം ചുമത്തപ്പെടുന്ന ആദ്യ യുഎസ് മുന്‍ പ്രസിഡന്റാണ് ട്രംപ്. ഫ്‌ലോറിഡയില്‍നിന്നു ട്രംപ് തിങ്കളാഴ്ച ന്യൂയോര്‍ക്കിലെത്തി ചൊവ്വാഴ്ച കോടതിയില്‍ ഹാജരായി കുറ്റപത്രം വായിച്ചുകേള്‍ക്കും.
അടുത്ത വര്‍ഷത്തെ പ്രസിഡന്റ് തിരഞ്ഞെടുപ്പില്‍ റിപ്പബ്ലിക്കന്‍ സ്ഥാനാര്‍ഥിയാകാന്‍ കൂടുതല്‍ സാധ്യതയുള്ള ട്രംപിന് കനത്ത തിരിച്ചടിയാണിത്. കുറ്റം ചുമത്തപ്പെട്ടവര്‍ക്കോ ജയിലിലടയ്ക്കപ്പെട്ടവര്‍ക്കോ തിരഞ്ഞെടുപ്പില്‍ മത്സരിക്കാന്‍ പാടില്ലെന്നു യുഎസില്‍ നിയമമില്ലെങ്കിലും ട്രംപിന്റെ എതിരാളികള്‍ ഇത് ആയുധമാക്കിനിടയുണ്ട്. 2020 ലെ തിരഞ്ഞെടുപ്പുഫലം അട്ടിമറിക്കാന്‍ ശ്രമിച്ചതുള്‍പ്പെടെയുള്ള മറ്റു ക്രിമിനല്‍ കേസുകളിലും ട്രംപ് നടപടികള്‍ നേരിടുന്നുണ്ട്. 2017-21 ല്‍ പ്രസിഡന്റായിരുന്നപ്പോള്‍ ജനപ്രതിനിധിസഭ 2 തവണ ട്രംപിനെ ഇംപീച്ച് ചെയ്‌തെങ്കിലും സെനറ്റ് രക്ഷിക്കുകയായിരുന്നു.
ട്രംപ് 2016 ല്‍ പ്രസിഡന്റായി തിരഞ്ഞെടുക്കപ്പെടുന്നതിന് 2 ദിവസം മുന്‍പാണ് ഡാനിയേല്‍സിനു പണം നല്‍കിയത്. ട്രംപിന്റെ മുന്‍ അറ്റോര്‍ണി മൈക്കല്‍ കോഹനാണ് 130,000 ഡോളര്‍ ഇലക്ട്രോണിക് സംവിധാനത്തിലൂടെ കൈമാറിയത്. പണം നല്‍കിയതായി കോഹന്‍ കോടതിയില്‍ സമ്മതിച്ചിരുന്നു. ആരോപണം നിഷേധിച്ച ട്രംപ് രാഷ്ട്രീയ എതിരാളികളുടെ പകപോക്കലാണിതെന്ന് വാദിച്ചിരുന്നു. കുറ്റം ചുമത്തിയ മന്‍ഹാറ്റന്‍ ഡിസ്ട്രിക്ട് അറ്റോര്‍ണി നിയമ വ്യവസ്ഥയ്ക്ക് നാണക്കേടാണെന്ന് ട്രംപ് പ്രതികരിച്ചു.
https://www.facebook.com/Malayalivartha
