രാഹുല്‍ ഗാന്ധിക്ക് പിന്തുണ പ്രഖ്യാപിച്ച് കടല്‍കടന്നും പ്രതിഷേധം ശക്തമാകുന്നു. ലണ്ടന്‍ പാര്‍ലമെന്റ് സ്‌ക്വയറില്‍ നടന്ന പ്രതിഷേധം വൈറലാകുന്നു. യുകെയിലെ ഓവര്‍സീസ് ഇന്ത്യന്‍ കള്‍ച്ചറല്‍ കോണ്‍ഗ്രസ്സ് അംഗങ്ങളാണ് രാഹുല്‍ ഗാന്ധിക്ക് ഐക്യദാര്‍ഡ്യം പ്രഖ്യാപിച്ച് പ്രതിഷേധിച്ചത്. പ്ലക്കാര്‍ഡുകളും പിടിച്ച് മുദ്രാവാക്യവും വിളിച്ച് നിരവധിപേര്‍ ഒത്തുകൂടി. ഗാന്ധി പ്രതിമയ്ക്ക് താഴെ രാഹുലിന്റെ ചിത്രങ്ങളും പിടിച്ച് അണിനിരന്ന ഒഐസിസി അംഗങ്ങള്‍ രാഹുല്‍ ഗാന്ധി ജയ്‌വിളിക്കുകയും ധീരതയോടെ നയിച്ചോളു എന്ന് ഉച്ചത്തില്‍ വിളിക്കുന്നുണ്ടായിരുന്നു. രാഹുലിനെ അയോഗ്യനാക്കിയതിലുള്ള പ്രതിഷേധം ഇന്ത്യയില്‍ മാത്രം ഒതുങ്ങുന്നില്ല കടല്‍ക്കടന്നും പ്രതിഷേധം ശക്തം. മോദി സര്‍ക്കാരിന് കനത്ത തിരിച്ചടിയാകുകയാണ് ഈ സംഭവം.

കോണ്‍ഗ്രസ്സിന്റെ ഭാഗത്ത് നിന്നുള്ള ശക്തമായ പ്രതിഷേധം ബിജെപിയെ പൊള്ളിക്കുന്നുണ്ട്. കാരണം രാഹുല്‍ അദാനി വിഷയം പാര്‍ലമെന്റില്‍ ഉയര്‍ത്തിയതാണ് ബിജെപിയുടെ വായടപ്പിച്ചത്. രാഹുല്‍ ചോദിച്ച ചോദ്യങ്ങളാണ് മോദിയെ ചൊടിപ്പിച്ചത്. അതിന് മറുപടി പറയാന്‍ ഇല്ലാത്തത് കൊണ്ടാണ് രാഹുല്‍ ഗാന്ധിയെ എങ്ങനെയും നിശബ്ദനാക്കുക അഴിക്കുള്ളിലാക്കുക എന്ന അജണ്ട ബിജെപി സ്വീകരിക്കാന്‍ കാരണം. എന്നാല്‍ എത്ര വായടപ്പിക്കാന്‍ ശ്രമിച്ചിട്ടും രാഹുല്‍ ചോദ്യങ്ങള്‍ ചോദിച്ച് കൊണ്ടേയിരിക്കുന്നു. ഇത് ചില്ലറയല്ല ബിജെപിയെ വേവലാതിപ്പെടുത്തുന്നത്. നിങ്ങള്‍ എന്നെ ഏത് തുറുങ്കില്‍ വേണമെങ്കിലും അടച്ചോളൂ പക്ഷെ എന്റെ ചോദ്യങ്ങള്‍ക്ക് കൃത്യമായ ഉത്തരം നല്‍കൂ,മാപ്പ് പറയാന്‍ ഞാന്‍ സവര്‍ക്കറല്ല ഗാന്ധിയാണെന്ന പരാമര്‍ശങ്ങളൊക്കെ ബിജെപിക്ക് കുറിക്ക് കൊണ്ടു. പിന്നാലെ പ്രതിപക്ഷങ്ങളെല്ലാം രാഹുലിന് ഐക്യദാര്‍ഡ്യം പ്രഖ്യാപിച്ച് രംഗത്ത് വരികയായിരുന്നു. ഇപ്പോള്‍ കടല്‍ക്കടന്നുള്ള പ്രതിഷേധം കേന്ദ്ര സര്‍ക്കാരിന് ക്ഷീണം തന്നെയാണ്. ഇതുമാത്രമല്ല ചെറുപ്പക്കാരെല്ലാം രാഹുലിനായ് രംഗത്ത് വന്നു. സോഷ്യല്‍മീഡിയ ഗ്രൂപ്പുകളില്‍ രാഹുലിന് പിന്തുണ പ്രഖ്യാപിച്ചുള്ള പോസ്റ്റുകല്‍ വീഡിയോകള്‍ നിറഞ്ഞു. ഇതെല്ലാം ബിജെപി പക്ഷത്ത് അസ്വസ്ഥത ഉണ്ടാക്കി എന്നുള്ളതാണ് വാസ്തവം. രാഹുല്‍ ഞങ്ങള്‍ക്ക് ഒരു ഇരയേ അല്ലായെന്ന് പറയുന്ന ബിജെപി ഇപ്പോള്‍ രാഹുലിന് പിന്നാലെ ഓടുകയാണ്.

ഏതായാലും രാജ്യം രാഹുല്‍ ഗാന്ധിക്ക് പിന്നാലെ അണിചേരുന്ന കാഴ്ചയാണ് കാണാനാകുന്നത്. ഒപ്പം വിദേശത്ത് നിന്നും രാഹുലിന് പിന്തുണ. ഭരണകൂടത്തിന്റെ വേട്ടയാടലാണ് രാഹുലിന് നേരെ നടക്കുന്നതെന്ന് കോണ്‍ഗ്രസ്സ് വാദിക്കുന്നു. ജനാധിപത്യ മര്യാദകളെ ലംഘിച്ച് കൊണ്ട് ബിജെപി ശത്രുവിനെ അടിച്ചൊതുക്കാന്‍ വളഞ്ഞവഴി പ്രയോഗിക്കുന്നു. രാഹുില്‍ ഗാന്ധിയെ അയോഗ്യനാക്കാന്‍ നടത്തിയ നീക്കത്ിലൂടെ വ്യക്തമാണ് രാഹുല്‍ ഗാന്ധി വെല്ലുവിളി തന്നെയാണ് ബിജെപിക്കെന്ന്. അത് ബോധ്യപ്പെട്ട് തുടങ്ങിയത് കൊണ്ടാണ് ഈ തന്ത്രങ്ങള്‍ ബിജെപി പുറത്തെടുത്തതെന്നും കോണ്‍ഗ്രസ്സ് പരിഹസിക്കുന്നു.

ഇതിനിടെ മാനനഷ്ടക്കേസില്‍ സൂറത്ത് കോടതിയില്‍ നിന്നുണ്ടായ വിധി യാതൊരു വിധ തെളിവും പരിഗണിക്കാതെയാണ് എന്ന് രാഹുല്‍ ഗാന്ധി. എം പി സ്ഥാനത്ത് നിന്ന് അയോഗ്യനാക്കുന്നതിലേക്ക് നയിച്ച പ്രസ്തുത വിധി പ്രസ്താവത്തില്‍ നിരവധി അുപാകതകള്‍ ഉണ്ട് എന്നാണ് രാഹുല്‍ ഗാന്ധി നല്‍കിയ അപ്പീലില്‍ ചൂണ്ടിക്കാട്ടുന്നത്. തന്റെ പരാമര്‍ശത്തെ വക്രീകരിക്കുന്നതും തെറ്റിദ്ധരിപ്പിക്കുന്നതുമായ വിധിയാണ് കോടതിയില്‍ നിന്ന് വന്നിരിക്കുന്നത്. വിചാരണക്കോടതി തന്നോട് നടത്തിയ പെരുമാറ്റം നീതിയുക്തമല്ല എന്നാണ് രാഹുല്‍ വാദിക്കുന്നത്. തന്റെ എം പി സ്ഥാനം വിധി നിര്‍ണയത്തെ സ്വാധീനിച്ചു എന്ന് തോന്നുന്നുവെന്നും രാഹുല്‍ പറഞ്ഞു. തന്നെ അയോഗ്യനാക്കുന്നതിലെ ആദ്യപടിയായിരുന്നു വിധി എന്ന് ന്യായമായും സംശയിക്കപ്പെടുന്നുവെന്നും അദ്ദേഹം പറഞ്ഞു. ഒരു തെളിവുമില്ലാതെയാണ് ശിക്ഷാവിധി പാസാക്കിയതെന്നും ഹര്‍ജിയില്‍ അദ്ദേഹം ആരോപിച്ചു. ക്രിമിനല്‍ നിയമത്തില്‍ ഒട്ടും അനുവദനീയമല്ലാത്ത അനുമാനങ്ങളുടെ അടിസ്ഥാനത്തിലാണ് മജിസ്‌ട്രേറ്റ് കോടതി വിധി പുറപ്പെടുവിച്ചതെന്ന് ഹര്‍ജിയില്‍ പറയുന്നു. വിചാരണ ജഡ്ജിയെ ഒരു എം പി എന്ന തന്റെ നില 'അധികമായി സ്വാധീനിച്ചു' എന്നും അദ്ദേഹം ചൂണ്ടിക്കാട്ടി. രണ്ട് വര്‍ഷത്തെ ശിക്ഷ വിധിച്ചാല്‍ പാര്‍ലമെന്റ് അംഗമെന്ന നിലയില്‍ അയോഗ്യനാക്കപ്പെടുമെന്ന് വിചാരണ ജഡ്ജി അനുമാനിക്കുന്നു എന്നും ഹര്‍ജിയില്‍ പറയുന്നു.