മലയാളി ഹൗസ് ബിഗ് ബോസിന് പാരയായോ. മോഹന്‍ലാല്‍ അവതാരകനായെത്തുന്ന ബിഗ് ബോസ് മലയാളം ജൂണ്‍ 24 ഞായറാഴ്ച യാണ് ഏഷ്യാനെറ്റില്‍ സംപ്രേഷണം ആരംഭിച്ചത്. ഏഷ്യാനെറ്റിന്റെ തന്നെ സീരിയലുകളാണ് ബാര്‍ക് റേറ്റിംഗിന്റെ ആദ്യ അഞ്ച് സ്ഥാനങ്ങളും കൈയടക്കിയിരിക്കുന്നത്. 44 കോടി ബജറ്റിലൊരുങ്ങിയ ബിഗ് ബോസിന് മലയാളി പ്രേക്ഷകരുടെ മനസ്സിലേക്ക് കയറാന്‍ സാധിച്ചിട്ടില്ലെന്നാണ് ബാര്‍ക് റേറ്റിംഗ് സൂചിപ്പിക്കുന്നത്. മലയാളി ഹൌസ് കണ്ടതിലെ ദുരനുഭവം, കാണാന്‍ കൊള്ളാത്ത ഷോയെന്ന സോഷ്യല്‍ മീഡിയ പ്രചാരണം ബിഗ് ബോസിന് തിരിച്ചടി ആയിട്ടുണ്ട്. ആറ് മണി മുതല്‍ 11 മണി വരെയുള്ള െ്രെപം ടൈം സ്ലോട്ടിലെ ബാര്‍ക് റേറ്റിംഗാണിത്. കസ്തൂരിമാന്‍, നീലക്കുയില്‍, വാനമ്പാടി, കറുത്ത മുത്ത്, ഭാര്യ തുടങ്ങിയ സീരിയലുകളാണ് ആദ്യ അഞ്ച് സ്ഥാനങ്ങളിലുള്ളത്. വര്‍ഷങ്ങളായി ഏഷ്യാനെറ്റ് സംപ്രേഷണം ചെയ്യുന്ന കസ്തൂരിമാനാണ് റേറ്റിംഗില്‍ മുന്നില്‍. 44 കോടി രൂപ മുതല്‍ മുടക്കില്‍ നിര്‍മ്മിക്കുന്ന ഷോയായ ബിഗ് ബോസ് പരസ്യങ്ങള്‍ക്കും വന്‍ തുകയാണ് കൈപ്പറ്റുന്നത്. ഇതിനിടെയാണ് ബാര്‍ക് റേറ്റിംഗ് കണക്കുകള്‍ പുറത്തു വരുന്നത്. രഞ്ജിനി ഹരിദാസ്, അര്‍ച്ചന സുഷീലന്‍, ഡേവിഡ് ജോണ്‍, അനൂപ് ചന്ദ്രന്‍, മനോജ് വര്‍മ, അതിഥി റായ്, ശ്രീനിഷ് അരവിന്ദ്, ബഷീര്‍ ബഷി, പേളി മാണി, ശ്രീലക്ഷ്മി ജഗതി ശ്രീകുമാര്‍, ദീപന്‍ മുരളി,തരികിട സാബു തടങ്ങി 16 സെലിബ്രിറ്റികള്‍ മത്സരാര്‍ത്ഥികളായെത്തിയ ഈ ഷോയ്ക്ക് സംപ്രേഷണം ആരംഭിച്ച് ആഴ്ച്ചകളായിട്ടും ബാര്‍ക് റേറ്റിംഗിന്റെ ആദ്യ അഞ്ച് സ്ഥാനങ്ങളിലിടം ഈ ഷോയ്ക്ക് സാധിച്ചിട്ടില്ല. അതിനാല്‍ കോടികള്‍ മുടക്കിയ ഷോയെ കരകയറ്റാന്‍ പ്രചാരണ പരിപാടികള്‍ സജീവമാക്കിയിരിക്കുകയാണ് അണിയറപ്രവര്‍ത്തകര്‍.