റോഡില് കുഴികണ്ടാല് ഇനി ചിത്രമെടുത്ത് പിഡബ്ല്യുഡി ഫിക്സിറ്റില് ഇട്ടാല് മതി; ഉടന് ശരിയാക്കും; പിഡബ്ല്യുഡി-യുടെ പുതിയ ആപ്പ്
പൊതുജനങ്ങള്ക്ക് ഇനി മുതല് റോഡുകളുടെ ശോചനീയാവസ്ഥ പിഡബ്ല്യുഡിയെ നേരിട്ടറിയിക്കാം. തകര്ന്ന റോഡുകളെക്കുറിച്ചു പൊതുജനങ്ങള്ക്കു പരാതിപ്പെടാന് പുതിയ ആപ്പ് പിഡബ്ല്യുഡി അവതരിപ്പിച്ചു. എവിടെ റോഡ് തകര്ന്നാലും ഇനി ഈ ആപ്പിലൂടെ പരാതികള് അയയ്ക്കാം. റോഡുകളുടെ ശോചനീയാവസ്ഥ, വെള്ളക്കെട്ട് തുടങ്ങി എല്ലാ പ്രശ്നങ്ങളും പൊതുമരാമത്ത് വകുപ്പ് അധികൃതരെ ഈ ആപ്പിലൂടെ അറിയിക്കാനാവും. പിഡബ്ല്യുഡി ഫിക്സിറ്റ് എന്നാണ് ആപ്പിന്റെ പേര്. ഇത് പ്ലേസ്റ്റോറില്നിന്നു ഡൗണ്ലോഡ് ചെയ്യാം. പ്രളയക്കെടുതിയില് തകര്ന്ന റോഡുകളും പാലങ്ങളും പുനര്നിര്മിക്കുന്നതിനാണ് ഇപ്പോള് ആദ്യപരിഗണന നല്കിയിരിക്കുന്നത്.
സ്മാര്ട്ട് ഫോണ് ഉള്ള ആര്ക്കും ഇനി ഈ ആപ്പിലൂടെ പിഡബ്ല്യുഡിയെ പരാതികള് എളുപ്പത്തില് അറിയിക്കാന് കഴിയും. റോഡില് ഒരു കുഴി കണ്ടാല് സ്മാര്ട്ട് ഫോണില് ചിത്രമെടുത്ത് ഈ ആപ്പില് ടാഗ് ചെയ്താല് വേഗത്തില് പരിഹാരം ഉണ്ടാകുമെന്ന് അധികൃതര് പറഞ്ഞു. ആപ്പ് വഴി അയയ്ക്കുന്ന പരാതികള് സംബന്ധിച്ച ജാഗ്രതാ നിര്ദേശം അതതു സ്ഥലങ്ങളിലെ അസിസ്റ്റന്റ് എന്ജിനീയര്മാര്, എക്സിക്യുട്ടീവ് എന്ജിനീയര് തുടങ്ങിയവര്ക്ക് ഇമെയിലായും മെസേജ് അലര്ട്ടായും ലഭിക്കും. പരാതി ലഭിച്ചാലുടന് നടപടിയെടുക്കാന് ഉദ്യോഗസ്ഥര്ക്ക് ഉത്തരവാദിത്തമുണ്ടായിരിക്കും. ഇതിനായി എന്ജിനീയര്മാര്ക്കു പ്രത്യേകം ഐഡികളിലൂടെ ലോഗിന് ചെയ്യാനുള്ള വെബ്സൈറ്റുമുണ്ട്. പൊതുമരാമത്ത് വകുപ്പിന്റെ ഇലക്ട്രോണിക്സ് വിഭാഗത്തിന്റെ നേതൃത്വത്തില് ഹബ്സ്പൈര് ആണ് ആപ്പ് നിര്മിച്ചത്.
ഇപ്പോള് പ്ലേ സ്റ്റോറില് മാത്രമേ ആപ്പ് ലഭിക്കൂ. ഒരാഴ്ചയ്ക്കകം ഐഒഎസിലും ലഭ്യമാകും. പ്രശ്നങ്ങള്ക്കു വേഗത്തില് പരിഹാരമുണ്ടാക്കുന്നതിനു സഹായകവുമാകുന്ന വിധമാണ് ആപ്പ് വികസിപ്പിച്ചിരിക്കുന്നത്. ഏതൊരു പരാതിയും ജിയോ ടാഗ് ചെയ്യപ്പെട്ടു ബന്ധപ്പെട്ട വിഭാഗം കൈകാര്യം ചെയ്യുന്ന എന്ജിനീയറുടെ മുമ്പിലെത്തുകയും പരാതി പരിഹരിക്കുന്നതു സംബന്ധമായ തുടര്നടപടികള് സ്വീകരിക്കുകയും ചെയ്യും.
ഇപ്പോള് ഈ ആപ്പിന്റെ മുഖ്യലക്ഷ്യം റോഡിലെ കുഴികളടയ്ക്കുന്നതു പരിഹരിക്കുകയെന്നതാണെങ്കിലും ഭാവിയില് റോഡുമായി ബന്ധപ്പെട്ട മറ്റു വിഷയങ്ങള്, പ്രവര്ത്തനക്ഷമമല്ലാത്ത ട്രാഫിക് സിഗ്നലുകള്, ഒടിഞ്ഞുതൂങ്ങിനില്ക്കുന്ന ഗതാഗത കുരുക്കുണ്ടാക്കുന്ന തൂണുകള്, മരക്കൊമ്പുകള്, ഒഴുക്കില്ലാത്ത ഓടകള് തുടങ്ങിയവയുമായി ബന്ധപ്പെട്ട പരാതികളും പരിഹരിക്കുന്നതിനു സംവിധാനമൊരുക്കും. സുരക്ഷിതവും സഞ്ചാരയോഗ്യവുമായ റോഡ് സംസ്കാരം ഉണ്ടാക്കുന്നതിനാണ് ആപ്പ് വികസിപ്പിച്ചിരിക്കുന്നതെന്ന് അധികൃതര് അറിയിച്ചു.
ഗൂഗിള് പ്ലേസ്റ്റോറില്നിന്നു പിഡബ്ല്യുഡി ഫിക്സിറ്റ് ആപ്പ് ഡൗണ്ലോഡ് ചെയ്യാം. ലോഗിന് ചെയ്താല് വലതു വശത്തായി റിപ്പോര്ട്ട് ഓപ്ഷന് ഉണ്ട്. ഇതു സെലക്ട് ചെയ്താല് ആഡ് കംപ്ലയിന്റ് എന്ന ഓപ്ഷന് കാണാം. ഇതില് ക്ലിക്ക് ചെയ്താല് താഴെയായി പരാതിയുള്ള റോഡിന്റെ ചിത്രവും പ്രശ്നം ഏതു പ്രദേശത്താണെന്നും ചേര്ക്കാനാവും.
https://www.facebook.com/Malayalivartha
