പ്രളയബാധിത പ്രദേശങ്ങളില്‍ പുനരധിവാസ പ്രവര്‍ത്തനങ്ങള്‍ നടത്തുന്നതിനായി കേന്ദ്രാവിഷ്‌കൃത പദ്ധതികളുടെ നിബന്ധനകളില്‍ ഇളവ് വരുത്തണമെന്ന് തദ്ദേശ സ്വയംഭരണ വകുപ്പ് മന്ത്രി എ.സി മൊയ്തീന്‍ ആവശ്യപ്പെട്ടു. ഇത് സംബന്ധിച്ച് കേന്ദ്ര ഗ്രാമവികസന വകുപ്പ് മന്ത്രി നരേന്ദ്ര സിംഗ് തോമാറിന് തദ്ദേശ സ്വയംഭരണ വകുപ്പ് മന്ത്രി കത്തയച്ചു. 

വെള്ളപൊക്കത്തിലൂടെ ഒഴുകി എത്തി പൊതുസ്ഥലങ്ങളിലും വീടുകളിലും അടിഞ്ഞ ചെളിയും മാലിന്യങ്ങളും നീക്കം ചെയ്യുന്ന പ്രവര്‍ത്തികളും, കിണറുകള്‍ വൃത്തിയാക്കുന്ന പ്രവര്‍ത്തികളും കേടുപാടുകള്‍ സംഭവിച്ച ജലസേചന കിണറുകളുടെ അറ്റകുറ്റപണികളും ഉള്‍പ്പെടുത്തണമെന്ന് പ്രധാനമായും കത്തില്‍ ആവശ്യപ്പെട്ടിട്ടുണ്ട്. പ്രധാനമന്ത്രി ആവാസ് യോജനയില്‍ നഷ്ടപ്പെട്ട വീടുകള്‍ക്ക് പകരം പുതിയ വീടും കേടുപാടുകള്‍ സംഭവിച്ച വീടുകളുടെ അറ്റകുറ്റപണിയും സ്വഛ് ഭാരത് പദ്ധതിയില്‍ കക്കൂസും പ്രധാനമന്ത്രി സഡക് യോജനയില്‍ റോഡുകളും ഉള്‍പ്പെടുത്തണമെന്നും കത്തില്‍ ആവശ്യപ്പെട്ടു.