ഓണം കഴിഞ്ഞാലുടന്‍ മന്ത്രി കെ.രാജു രാജിവച്ചേക്കും. 28 ന് പാര്‍ട്ടി എക്‌സിക്യൂട്ടീവ് ചേരാനിരിക്കെ പാര്‍ട്ടിയില്‍ നിന്നും രാജി ആവശ്യം ഉയരുന്നതിനു മുമ്പ് രാജിവയ്ക്കാനാണ് രാജുവിന് ലഭിച്ച ഉപദേശം.

മന്ത്രിയുടെ നിലപാട് തീര്‍ത്തും അനുചിതമെന്ന് വിശേഷിപ്പിച്ച കാനം രാജേന്ദ്രന്‍ തന്നെയാണ് മന്ത്രി രാജിവയ്ക്കുന്നതാണ് ഉത്തമമെന്ന് കരുതുന്നത്. കാനവുമായി ബന്ധപ്പെട്ടവര്‍ തന്നെയാണ് ഇക്കാര്യം പുറത്തുവിട്ടത്. കാനത്തിന്റെ സ്വരം കടുപ്പിക്കാന്‍ അവസരം നല്‍കരുതെന്നാണ് രാജുവിന് ലഭിച്ച ഉപദേശം. കാരണം കാനത്തിന്റെ സ്വരം കടുത്താല്‍ അദ്ദേഹം രാജി ആവശ്യപ്പെടും.

രാജുവിന്റെ രാജിക്കായി പാര്‍ട്ടിയിലെ ഒരു വിഭാഗം ശക്തമായ നിലപാട് എടുത്തിരിക്കുകയാണ്. കാനത്തിന്റെ നിലപാട് പരസ്യ ശാസനയാണെന്ന് കരുതുന്നവര്‍ ഉണ്ട്. എക്‌സിക്യൂട്ടീവും സംസ്ഥാന കൗണ്‍സിലും ചേര്‍ന്ന് തീരുമാനമെടുക്കട്ടെ എന്നാണ് കാനത്തിന്റെ ഒടുവിലത്തെ നിലപാട്. രാജുവിന് ഒപ്പം നിന്ന പല നേതാക്കളും ഇപ്പോള്‍ സ്വയംരക്ഷാര്‍ത്ഥം കാലുമാറിയിരിക്കുകയാണ്. അതിനിടെ പാര്‍ട്ടി സെക്രട്ടറിയുടെയും മുഖ്യമന്ത്രിയുടെയും അറിവോടെയാണ് താന്‍ ജര്‍മ്മനിയില്‍ പോയതെന്ന മന്ത്രിയുടെ പരസ്യ പ്രസ്താവന ഒഴിവാക്കണമായിരുന്നു എന്ന് പാര്‍ട്ടിക്കുള്ളില്‍ അഭിപ്രായമുണ്ട്. അതു വരെ മന്ത്രിയെ വ്യക്തിപരമായി ചോദ്യം ചെയ്യാതിരുന്ന മുഖ്യമന്ത്രിയില്‍ പോലും രാജുവിന്റെ പ്രതികരണം നീരസമുണ്ടാക്കിയെന്നാണ് കേള്‍ക്കുന്നത്.

രാജു രാജി വയ്ക്കുകയാണെങ്കില്‍ മുല്ലക്കര രത്‌നാകരനോ സി.ദിവാകരനോ ബിജിമോളോ മന്ത്രിയാകാന്‍ സാധ്യതയുണ്ട്. ഇതില്‍ ദിവാകരനോട് കാനത്തിന് യോജിപ്പില്ല. ദിവാകരനെ ഏതെങ്കിലും ഒരു പ്രത്യേക പദവിയില്‍ കൊണ്ടുവരേണ്ടതില്ലെന്ന അഭിപ്രായമാണ് കാനത്തിന് ഉള്ളത്. മുല്ലക്കരക്കോ ബിജിമോള്‍ക്കോ സാധ്യതയുണ്ട്.

സി പി ഐ യില്‍ നിന്നു തന്നെ ഇത്തരമൊരു സംഭവമുണ്ടായതില്‍ കാനത്തിന് വിഷമമുണ്ട്. സിപിഐ എക്കാലവും ആദര്‍ശങ്ങളില്‍ സി പി എമ്മിന് മേലെയാണ് നിന്നിട്ടുള്ളത്, അതിലാണ് ഇടിവു വന്നത്. ഇത്തരമൊരു ഇടിവ് പാര്‍ട്ടിക്ക് വന്നതില്‍ പിണറായിക്ക് വ്യക്തിപരമായ സന്തോഷമുണ്ട്. രാജുവിന്റെ കാര്യത്തില്‍ പിണറായി ഇടപെടില്ല. സി പി എമ്മും ഇടപെടില്ല. സി പി ഐ യുടെ തലയില്‍ സകല പാപദോഷവും കെട്ടി വയ്ക്കാനാണ് ശ്രമം.

അതേ സമയം മന്ത്രി രാജുവിനെ ജര്‍മ്മനിയില്‍ അയച്ച് വിവാദമാക്കിയത് അദ്ദേഹത്തിന്റെ സ്റ്റാഫില്‍ തന്നെയുള്ള ഒരു സെക്രട്ടേറിയറ്റ് ഉദ്യോഗസ്ഥനാണെന്ന് കേള്‍ക്കുന്നു. യാത്രകളില്‍ തത്പരനായ ഉദ്യോഗസ്ഥന്‍ രാജുവിനെ ജര്‍മ്മനിയിലേക്ക് അയച്ചു എന്നാണ് സംസാരം. ജര്‍മ്മനിയില്‍ പോയപ്പോള്‍ ഇതേ ഉദ്യോഗസ്ഥന്‍ അദ്ദേഹത്തെ അനുഗമിച്ചിരുന്നത്രേ. വിവാദമുണ്ടായപ്പോള്‍ ഉദ്യോഗസ്ഥന്‍ രംഗത്ത് നിന്നും നിഷ്‌ക്രമിച്ചു.

അതിനിടെ തനിക്ക് വനം വകുപ്പിന്റെ ചുമതല നല്‍കിയിരുന്നുവെന്ന മന്ത്രി രാജുവിന്റെ പ്രസ്താവന മന്ത്രി തിലോത്തമന്‍ നിഷേധിച്ചു. തനിക്ക് ഒരു ചുമതലയും നല്‍കിയിട്ടില്ലെന്നാണ് തിലോത്തമന്‍ പറയുന്നത്.