ദുരിതാശ്വാസ ക്യാംപുകളില്‍നിന്ന് കൂടുതല്‍ പേര്‍ വീടുകളിലേക്കു മടങ്ങുകയാണെന്ന് മുഖ്യമന്ത്രി പിണറായി വിജയന്‍. 8,69,224 പേര്‍ ഇപ്പോഴും ക്യാംപുകളില്‍ തുടരുന്നു. വെള്ളത്തില്‍ മുങ്ങിയ 31 ശതമാനം വീടുകളും വാസയോഗ്യമാക്കിയിട്ടുണ്ട്. 7,000 വീടുകള്‍ പൂര്‍ണമായും തകര്‍ന്നു. 50,000 വീടുകള്‍ ഭാഗികമായിട്ടാണ് നശിച്ചിരിക്കുന്നത്. ക്യാംപുകളിലുള്ളവര്‍ വീട്ടില്‍ പോകുമ്പോള്‍ ഒരു കുടുംബത്തിന് അക്കൗണ്ടില്‍ 10,000 രൂപ നല്‍കും. ഇതിനായി അക്കൗണ്ട് വിവരങ്ങള്‍ ക്യാംപുകളിലെ റവന്യു അധികൃതരെ അറിയിക്കണമെന്നും മുഖ്യമന്ത്രി പറഞ്ഞു. തിരുവോണദിവസം തന്റെ ഓഫിസ് പ്രവര്‍ത്തിക്കുമെന്നും പിണറായി വിജയന്‍ വ്യക്തമാക്കി.

പ്രളയക്കെടുതിയില്‍ എല്ലാം നഷ്ടപ്പെട്ടവര്‍ ഓണ്‍ലൈനായി അപേക്ഷ നല്‍കണം. ദുരന്തം നേരിട്ടവര്‍ അക്ഷയകേന്ദ്രങ്ങള്‍ വഴി റജിസ്റ്റര്‍ ചെയ്യണം. നേരിട്ടും റജിസ്റ്റര്‍ ചെയ്യാം. അക്ഷയയിലൂടെയുള്ള സേവനം സൗജന്യമായിരിക്കും. അതിനായുള്ള ചെലവ് സര്‍ക്കാര്‍ വഹിക്കും. മഴക്കെടുതി നാശം വിതച്ച എല്ലായിടത്തും ഇതു ബാധകമായിരിക്കും. നഷ്ടപ്പെട്ട രേഖകള്‍ തിരിച്ചുനല്‍കുന്നതിനായി ഐടി വകുപ്പ് സോഫ്റ്റ്‌വെയര്‍ തയാറാക്കി. ഒരു കേന്ദ്രത്തില്‍നിന്ന് എല്ലാ സര്‍ട്ടിഫിക്കറ്റുകളും നല്‍കാന്‍ സംവിധാനമൊരുക്കുമെന്നും മുഖ്യമന്ത്രി പറഞ്ഞു.

അതേസമയം, വീടുകളിലെ മാലിന്യ നീക്കത്തിന് പ്രത്യേക മാര്‍ഗനിര്‍ദേശവും പുറപ്പെടുവിച്ചു. അവയില്‍ ചിലതിങ്ങനെ. പ്രളയത്തില്‍ വന്നടിഞ്ഞ ചെളിയും മണ്ണും ജലാശയങ്ങളില്‍ നിക്ഷേപിക്കരുത്. തദ്ദേശസ്വയംഭരണ സ്ഥാപനം നിശ്ചയിക്കുന്ന പൊതുവായ സ്ഥലത്ത് നിക്ഷേപിക്കണം. അഴുകിയ മാലിന്യങ്ങള്‍ സ്വന്തം സ്ഥലത്ത് സുരക്ഷിതമായി സംസ്‌കരിക്കണം