രാജ്യത്തിനെങ്ങും കാസര്കോട്ടെ മാതൃക അനുകരണീയമാണെന്ന് കേന്ദ്രസര്ക്കാര്... ദൈവത്തിന്റെ സ്വന്തം നാടിനെ നെഞ്ചാട് ചേര്ത്ത് മോദി സര്ക്കാര്
കടല് കടക്കുകയാണ് അതിജീവനത്തിന്റെ ഇന്ത്യന് മാതൃക. ചര്ച്ചയാവുകയാണ് ലോകമെങ്ങും. കാസര്ഗോഡിനെ നെഞ്ചാട് ചേര്ത്ത് കേന്ദ്രത്തിലെ മോദി സര്ക്കാര് കൂടി വന്നതോടെ കേരളത്തിന്റെ കാസര്ഗോഡിന്റെ ഉയിര്ത്തെഴുന്നേല്പ് ആവേശമാവുകയാണ്, പ്രചോദനമാവുകയാണ്.
രാജ്യത്തിനെങ്ങും കാസര്കോട്ടെ മാതൃക അനുകരണീയമാണെന്ന് കേന്ദ്രസര്ക്കാര്. നേരത്തേ കാസര്ഗോഡ് കൊവിഡ് ഹോട്ട് സ്പോട്ടായിരുന്നിട്ടും, കൃത്യമായ നിയന്ത്രണങ്ങളിലൂടെ ഇവിടെ രോഗവ്യാപനം തടഞ്ഞ് നിര്ത്താനായി. കോവിഡിനെ പിടിച്ചുകെട്ടിയ കാസര്കോട് മാതൃകയ്ക്ക് അഭിനന്ദനവുമായി, കേരള മാതൃകയ്ക്ക് അഭിനന്ദനവുമായി കക്ഷി രാഷ്ട്രീയ വ്യത്യാസമില്ലാതെ ഏവരും വരുന്ന സമയമാണിത്. ആകെയുള്ള ജനസംഖ്യയില് 15.3 ശതമാനം പ്രവാസികളായിരിക്കെ, അവിടെ നിന്ന് തിരികെയെത്തിയവരെ എല്ലാം കൃത്യമായി ക്വാറന്റൈന് ചെയ്തതടക്കം കാസര്കോടിന്റെ നേട്ടങ്ങളും കേന്ദ്ര ആരോഗ്യമന്ത്രാലയമെടുത്തു പറഞ്ഞു.
54 ശതമാനം ആണ് കാസര്ഗോഡ് രോഗമുക്തിയുടെ ശതമാനക്കണക്ക്. ഇതുവരെ ഒരു മരണം പോലും റിപ്പോര്ട്ട് ചെയ്തിട്ടില്ല. തലസ്ഥാനവുമായി ദൂരെ കിടക്കുകയും, ഇത്ര വലിയ പ്രവാസിസമൂഹമുണ്ടായിട്ടും, കൃത്യമായ നടപടികളിലൂടെയാണ് കാസര്ഗോഡിന് കൊവിഡിനെ തടഞ്ഞു നിര്ത്താനായത്.
സംസ്ഥാനസര്ക്കാര് ഉടനടി കാസര്കോടിനായി പ്രത്യേക ഓഫീസറെ നിയമിച്ചു. പ്രത്യേക ആശുപത്രിയടക്കം സജ്ജമാക്കി ആരോഗ്യപ്രവര്ത്തകര് രാവും പകലാക്കി അധ്വാനിച്ചു. കോണ്ടാക്ട് ട്രേസിംഗിന് ജിയോ സ്പെഷ്യല് ട്രാക്കിംഗ് നടത്തി, വൈറസ് വ്യാപനം തടയാന് ബ്രേക്ക് ദ ചെയ്ന് ക്യാംപെയ്ന് സജീവമാക്കി, സാധനങ്ങള് വീട്ടിലെത്തിച്ച് നല്കാന് തുടങ്ങി. നാല് ദിവസം കൊണ്ട് സ്പെഷ്യലിസ്റ്റ് ഡോക്ടര്മാരും നഴ്സുമാരുമായി കാസര്ഗോഡ് ഒരു പ്രത്യേക ആശുപത്രി സജ്ജീകരിച്ചത് ഇന്ത്യയുടെ ആരോഗ്യചരിത്രത്തിലെ തന്നെ വിപ്ലവമായിരിക്കും.
17,373 പേരെ ഹോം ക്വാറന്റൈനിലാക്കി പരിശോധിച്ചു, നൂറ് ശതമാനം വീടുകളിലും പോയി രോഗവിവരം തിരക്കി, ഷെല്ട്ടര് ഹോമുകളും സമൂഹ അടുക്കളകളും സജ്ജീകരിച്ചു. അങ്ങനെ എല്ലാ തരത്തിലും പരിശോധന കര്ശനവും മനുഷ്യത്വപരവുമാക്കിയതിന്റെ ഫലമാണ് ഈ മാതൃകയുടെ വിജയമെന്നും കേന്ദ്ര ആരോഗ്യമന്ത്രാലയം അറിയിച്ചു. നമ്മള് ഓര്ക്കണം ആരോഗ്യ, സാമ്പത്തിക മേഖലകളില് സമ്പന്നമായ ഇറ്റലിക്കും, അമേരിക്കയും ബ്രിട്ടനും പോലും വീണിടത്താണ് ഇന്ത്യ കുതിച്ചത്. കേന്ദ്ര സര്ക്കാരിന്റെ, പ്രധാനമന്ത്രിയുടെ കൃത്യമായ ആസൂത്രണത്തോടെ, സംസ്ഥാനങ്ങളുടെ സഹകരണത്തോടെ.
https://www.facebook.com/Malayalivartha