ആലപ്പുഴയില്‍ മത്സ്യബന്ധന വള്ളങ്ങള്‍ മണല്‍ തിട്ടയില്‍ കുടുങ്ങി
തുറവൂര്‍ അന്ധകാരനഴി അഴിമുഖം വേലിയേറ്റ സമയങ്ങളില്‍ ശക്തമായി കയറുന്ന കടല്‍ വെള്ളത്തെ തുടര്‍ന്ന് രൂപപ്പെട്ട മണല്‍ തിട്ടയില്‍ മത്സ്യബന്ധന വള്ളങ്ങള്‍ ഉറച്ചു. മണല്‍ നിറഞ്ഞ് അഴിമുഖംഭാഗികമായി അടഞ്ഞതോടെ 40-തോളം മത്സ്യബന്ധന വള്ളങ്ങളാണ് മണല്‍ തിട്ടയില്‍ ഉറച്ചത്. ലോക് ഡൗണ്‍ മൂലം മത്സ്യബന്ധനത്തിനു പോകാന്‍ കഴിയാതെ അന്ധകാരനഴിയില്‍ സൂക്ഷിച്ചിരുന്ന വള്ളങ്ങളാണ് മണലില്‍ ഉറച്ചത്. മഴ കുറവായതു മൂലം പൊഴിച്ചാലില്‍ നിന്നു കടലിലേയ്ക്കുള്ള വേലിയിറക്കം കുറഞ്ഞതാണ് വേലിയേറ്റ സമയത്തു പൊഴി ഭാഗികമായി അടയാന്‍ കാരണമായതെന്ന് മത്സ്യത്തൊഴിലാളികള്‍ പറഞ്ഞു.
കോവിഡ് ഭീഷണിയെത്തുടര്‍ന്നുള്ള ലോക്ഡൗണിന്റെ പശ്ചാത്തലത്തില്‍ ഒരു മാസമായി വലിയ വള്ളങ്ങളൊന്നും കടലില്‍ പോകുന്നില്ല. ഇനി നിയന്ത്രണങ്ങള്‍ക്ക് ശേഷം മത്സ്യബന്ധനത്തിനു പോകണമെങ്കില്‍ ഏറെ ബുദ്ധിമുട്ടി വള്ളങ്ങള്‍ പൊക്കിയെടുത്ത് കടലിലേക്കു കൊണ്ടുപോകണം. മണ്ണിലുറച്ച വള്ളങ്ങള്‍ക്കു കേടുപാടുകള്‍ സംഭവിക്കാനും സാധ്യതയുണ്ട്. മത്സ്യബന്ധനത്തിനു പോകാന്‍ കഴിയാത്തതു മൂലം വള്ളവും മറ്റു മത്സ്യബന്ധന ഉപകരണങ്ങളും നശിക്കുകയാണ്. വള്ളം ഇറക്കണമെങ്കില്‍ ഇവയെല്ലാം നന്നാക്കണം.
അന്ധകാരനഴിയിലും ചെല്ലാനം മിനി ഫിഷിങ് ഹാര്‍ബറിലും നൂറുകണക്കിനു വള്ളങ്ങളാണ് മത്സ്യബന്ധനത്തിനു പോകാതെ കരയില്‍ കയറ്റിയിട്ടിരിക്കുന്നത്. 500 മീറ്റര്‍ നീളം വരുന്ന അന്ധകാരനഴിയുടെ ഇരു ഭാഗത്തും മണല്‍ വന്‍തോതില്‍ അടിഞ്ഞിരിക്കുകയാണ്. മണല്‍ അടിയാതെ പൊഴി തുറന്നു കിടക്കണമെങ്കില്‍ പൊഴിയുടെ ഇരു ഭാഗത്തും പുലിമുട്ടു നിര്‍മിക്കണമെന്നാണ് തൊഴിലാളികളുടെ ആവശ്യം.
https://www.facebook.com/Malayalivartha
