ബുധനാഴ്ച പുലര്‍ച്ചെ നേരത്തേ എഴുനേറ്റ് ആകാശത്തേകക്കുനോക്കു ചൊവ്വയെയും ശനിയെയും ; ആ അത്ഭുത പ്രതിഭാസവുംകാത്ത് ജനങ്ങള്‍
ഉല്‍ക്കവര്‍ഷവും ഗ്രഹയോഗവും മതിയാവോളം കാണണമെന്നുണ്ടോ നാളെ പുലര്‍ച്ചെ 5ന് ആകാശത്തേക്കു നോക്കിക്കോളൂ. കിഴക്കന്‍ ചക്രവാളത്തില്‍ 70 ഡിഗ്രി മുകളിലായി 'അള്‍ടേയര്‍ ' എന്ന നക്ഷത്രം തിളങ്ങിനില്‍പ്പുണ്ടാകും. ഇതിനു വടക്കായി 'വേഗ'എന്ന തിളക്കമുള്ള മറ്റൊരു നക്ഷത്രവും. മണിക്കൂറില്‍ ഇരുപതോളം ഉല്‍ക്കകള്‍ മിന്നിത്തിളങ്ങും. ബാല്‍ക്കണിയിലോ തുറസ്സായ സ്ഥലത്തോ നിന്നാല്‍ ഈ ദൃശ്യചാരുത കാണാം.
ഇതേ സമയത്തുതന്നെ തെക്കുഭാഗത്തായി ചൊവ്വയും തൊട്ടു മുകളിലായി ശനിയും അതിനും മുകളിലായി ഏറ്റവും വലിയ ഗ്രഹമായ വ്യാഴവും ദൃശ്യമാകും. തൊട്ടടുത്ത ദിവസങ്ങളിലും ഈ കാഴ്ചകള്‍ കാണാമെന്ന് മലപ്പുറം അമച്വര്‍ അസ്‌ട്രോണമേഴ്‌സ് സൊസൈറ്റി ജോയിന്റ് കണ്‍വീനര്‍ ഉണ്ണിക്കൃഷ്ണന്‍ മംഗലശേരി പറഞ്ഞു.
പൊടിപടലങ്ങളും കൃത്രിമ വെളിച്ചങ്ങളുമില്ലാത്ത നാട്ടിന്‍പുറങ്ങളിലായിരിക്കും കാഴ്ച കൂടുതല്‍ മനോഹരമാവുക. പ്രകാശം കുറഞ്ഞ ഉല്‍ക്കകളെ കാണണമെങ്കില്‍ അരമണിക്കൂര്‍ നേരമെങ്കിലും കണ്ണിനു നല്ല ഇരുട്ടില്‍ വിശ്രമം കൊടുക്കണം. ഉപകരണങ്ങളുടെ സഹായമില്ലാതെ ഇതു കാണാം. ഓരോ പ്രദേശത്തിന്റെയും പ്രത്യേകതയനുസരിച്ച് മണിക്കൂറില്‍ 60 മുതല്‍ 200 വരെ ഉല്‍ക്കകളായിരിക്കും മാനത്തു മിന്നിമറയുക. നാസയുടെ കണക്കുകൂട്ടല്‍ പ്രകാരം ഏറ്റവും നന്നായി ഉല്‍ക്കവര്‍ഷം കാണാവുന്ന ഇടങ്ങളിലൊന്ന് ഇന്ത്യയാണ്.
അതുപോലെതന്നെ 133 വര്‍ഷം കൂടുമ്പോള്‍ സൗരയൂഥത്തിലൂടെ സൂര്യനെച്ചുറ്റി സ്വിഫ്റ്റ്-ടട്ട്ല്‍ എന്ന ഭീമന്‍ വാല്‍നക്ഷത്രം കടന്നു പോകാറുണ്ട്. അപ്പോള്‍ അതില്‍നിന്നു തെറിച്ചു പോകുന്ന മഞ്ഞും പൊടിപടലങ്ങളുമെല്ലാം സൗരയൂഥത്തില്‍ത്തന്നെ തങ്ങി നില്‍ക്കും. വര്‍ഷത്തിലൊരിക്കല്‍ ഭൂമിയുടെ അന്തരീക്ഷം ഈ അവശിഷ്ടങ്ങളുമായി സമ്പര്‍ക്കത്തില്‍ വരുമ്പോള്‍ പെഴ്‌സ്യൂസ് ഉല്‍ക്കവര്‍ഷം ഉണ്ടാകാറുണ്ട്. ആയിരക്കണക്കിനു വര്‍ഷങ്ങള്‍ക്കു മുന്‍പ് സ്വിഫ്റ്റ്-ടട്ട്‌ലില്‍നിന്നു തെറിച്ചു പോയ പൊടിപടലങ്ങളും മഞ്ഞിന്‍കട്ടകളുമൊക്കെയാണ് ഇത്തരത്തില്‍ ഇത്തവണ ഭൗമാന്തരീക്ഷത്തിലേക്കു കടക്കുന്നത്.
അന്തരീക്ഷവുമായി സമ്പര്‍ക്കമുണ്ടാകുന്നതോടെ കത്തിജ്വലിക്കുന്ന ആ വസ്തുക്കളാണ് ഉല്‍ക്കവര്‍ഷമായി നാം കാണുന്നത്. സെക്കന്‍ഡില്‍ 60 കിലോമീറ്റര്‍ വേഗത്തിലാണ് ഉല്‍ക്കകളുടെ വരവ്. ആകാശത്ത് പെഴ്‌സ്യൂസ് എന്ന നക്ഷത്രസമൂഹം നിലനില്‍ക്കുന്ന സ്ഥാനത്തുനിന്ന് വരുന്നതിനാലാണ് ഉല്‍ക്കവര്‍ഷം പെഴ്‌സ്യൂസിന്റെ പേരില്‍ അറിയപ്പെടുന്നത്. ഓരോ മണിക്കൂറിലുമുള്ള ഉല്‍ക്കകളുടെ എണ്ണം രേഖപ്പെടുത്തുന്നതു പ്രയോജനകരമായിരിക്കും. ഓര്‍ക്കുക! ഉല്‍ക്കാ പ്രവാഹം ഏറെക്കുറെ പ്രാദേശികമാണ്. ഉദാഹരണമായി തിരുവനന്തപുരത്തു കണ്ട ഉല്‍ക്കകളെ കോഴിക്കോട്ടുള്ളവര്‍ കണ്ടുകൊള്ളണമെന്നില്ല. അതുകൊണ്ടുതന്നെ ഈ പാതിരാവിലെ വാനക്കാഴ്ചയുടെ അപൂര്‍വ സാക്ഷികളില്‍ ഒരാളാവാം നമ്മളോരോരുത്തരും.
എന്തായാലും 'അള്‍ടേയര്‍ നക്ഷത്രത്തെ കാണാനുള്ള ആകാംശയാണ് നാളെ. ഇതിനു വടക്കായി 'വേഗ'എന്ന തിളക്കമുള്ള മറ്റൊരു നക്ഷത്രവും ദൃശ്യമാകും.
https://www.facebook.com/Malayalivartha
